مدد ويريجى ايتمز ايسه معلوماتِ پريشانندن بر صورتِ عجيبه تمثّل ايدهجكدر.
تنوير ايچون بر لطيفۀِ فرَضيهدر:
ناصلكه باشقه عالمدن بو كرهيه گلن تصويرجى بر نقّاش فرض اولونسه؛ حالبوكه نه إنسانى و نه إنسانڭ غيريسى، تام صورتنى گورمهمش بلكه هر بريسندن بعض أعضاسنى گورمكله إنسانڭ تصويرى وياخود گورديگى أشيانڭ عمومندن بر صورتى تصوير ايتمك ايسترسه؛ مثلا: إنساندن گورديگى بر أل، بر آياق، بر گوز، بر قولاق، يارى يوز و بورون و عمامه گبى شيلرڭ تركيبيله بر إنسانڭ تمثالى؛ ياخود نظرينه تصادف ايدن آتڭ قويروغى، دوهنڭ بويننى؛ إنسانڭ يوزينى، آرسلانڭ باشى بر حيوانڭ صورتى ياپسه؛ ناصلكه إمتزاجسزلقله قابلِ حيات اولماديغى ايچون شرائطِ حيات بويله اعجوبهلره مساعد دگلدر دييهجكلر و نقّاشى متّهم ايدهجكلر.