دردنجى مقدّمه
شهرت، إنسانڭ مالى اولميانى ده إنسانه مال ايدر. شويله كه: بشرڭ سجيهلرندندر، غريب ويا قيمتدار بر شيئى أصيلزاده گوسترمك ايچون، او قيمتدار شيلرڭ جنسيله مشتهر اولان ذاته نسبت و إسناد ايتمكدر. يعنى سوزلرى رواج بولمق ويا تكذيب اولونمامق وياخود باشقه أغراض ايچون، ظالمانه و إستبدادكارانه، بر ملّتڭ نتائجِ أفكارينى ويا محاسنِ أطوارينى بر شخصده گوروب اوندن بيليرلر. حالبوكه او آدمڭ شانندندر، او هديۀِ مستبدانه يى ردّ ايده... زيرا گوزل بر صفت ويا علوى بر صنعتله مشهور اولان بر آدم، حسنِ صورينڭ ماوراسنى گورمك شانندن اولان نظرِ صنعتپرورانهسنه حقسز اولارق اوڭا إسناد اولونان أمر عرض ايديلوب گوستريلير ايسه؛ «سنڭ دستِ خطّڭدر» دينيلير ايسه؛ او أمر صنعتڭ تناسب و موازنهسندن ناشى اولان گوزللگنى إخلال ايتديگى ايچون، ردّ ايدوب إعراض و