بر چاديره بڭزهتيلسه، عجبا طبيعتِ خياله مخالفت اولور مى؟ فرضا سن او سلسلهلرى مستقل طاغلر ايله برابر سطحِ أرضه كيفيتِ وضعيتى بر بدوى عربڭ قارشيسنده تصوير طرزنده تخيّل و تخييل ايدرسهڭ، شويله: بو سلسلهلر أعرابِ بدويهنڭ خيمهلرى گبى، أرض صحراسنده قورولمش و طرف طرف ده چاديرلر تخلّل ايتمش ديسهڭ... عربلرڭ خيالى اولان اسلوبلرندن اوزاق دوشمييورسڭ... هم ده أگر وهم ايله بو قصرِ مشيَّدِ عالمدن تجرّد ايدوب اوزاقدن حكمت دوربينيله مهدِ بشر اولان يره و سقفِ مرفوع اولان سمايه تماشا ايدرسهڭ.. صوڭره سلسلۀِ جبالده تمثّل و أطرافِ سمايه تماس ايدن دائرۀِ اُفق ايله محدود اولان سمايى، بر فسطاط گبى يرڭ اوستنه وضع و جبال أوتاديله ربط اولونمش بر چادير قبّهسنى تخيّل و توهّم ايدرسهڭ متّهم ايدهمزلر. سكزنجى مسئلهنڭ تنبيهنده بر ايكى مثال داها گلهجكدر.