مشهوردر: «جهنّم ير آلتندهدر.» فقط بز أهلِ سنّت و جماعت قطعًا و يقينًا يرينى تعيين ايدهمه يز. لٰكن ظاهر اولان تحتيتدر و ير آلتنده اولماسيدر. بوڭا بناءً ديرم: شجرۀِ طوبٰى گبى اولان خلقتِ عالمڭ سائر نجوملرى گبى بزم كرهمز دخى بر ثمرهسيدر. ثمرهنڭ آلتى او آغاجڭ عموم أغصانى آلتنه شامل اولور. بوڭا بناءً جهنّم ير آلتنده او داللر ايچندهدر. نرهده اولسه يرى واردر. تحتيتڭ مسافهسى اوزون و إتّصالى إقتضا ايتمز. حكمتِ جديدهنڭ نقطۀِ نظرنده، آتش أكثر كائناته مستوليدر. بو حال آرقه طرفنده گوسترر كه: بو آتشڭ أصل و أساسى و نوعِ بشر ايله برابر أبده گيدن و يولده رفاقت ايدن جهنّم، بر گون پرده يى ييرتهجق، حاضر اولڭ دييهجك، ميدانه چيقهجقدر. بو نقطهده دقّت ايسترم...