تنبيه: وقتا كه بو بويلهدر. «قاف»ه إشارت ايدن قطعىّ المتنلردن يالڭز (قٓ وَالْقُرْاٰنِ الْمَجٖيدِ) در. حالبوكه جائزدر؛ «ق» ، «ص» گبى اولسون. دنيانڭ شرقنده دگل، بلكه آغزڭ غربندهدر. شو إحتمال ايله دليل يقينيتدن دوشر. هم ده قطعىّ الدلالت بوندن باشقه اولماديغنڭ بر دليلى؛ شرعڭ مجتهدلرندن اولان قرافينڭ (لَا اَصْلَ لَهُ) ديمهسيدر. لٰكن ابن عبّاسه إسناد اولونان كيفيتِ مشهورهسى، دردنجى مقدّمهيه باق، وجهِ نسبتى سڭا تمثّل ايدهجكدر. حالبوكه ابن عبّاسڭ هر سويلهديگى سوزى، حديث اولماسى لازم گلمديگى گبى، هر نقل ايتديگى شيئى ده اونڭ مقبولى اولمق لازم گلمز. زيرا ابن عبّاس گنجلگنده إسرائلياته، بعض حقائقڭ تظاهرى ايچون حكايت طريقيله بر درجه عطفِ نظر أيلهمشدر.