اون آلتنجى إشارت:
إرهاصات دينيلن؛ بعثتِ نبوّتدن أوّل فقط نبوّتله علاقهدار اولارق وجوده گلن خارقهلر دخى، دلائلِ نبوّتدر. شو ده اوچ قسمدر:
برنجى قسم:
نصِّ قرآنله؛ تورات، إنجيل، زبور و صحفِ أنبيانڭ، نبوّتِ أحمديه عليه الصلاة والسلامه دائر ويردكلرى خبردر. أوت مادام او كتابلر سماويدرلر و مادام او كتاب صاحبلرى أنبيادرلر؛ ألبته و هر حالده اونلرڭ دينلرينى نسخ ايدن و كائناتڭ شكلنى دگيشديرن و يرڭ ياريسنى گتيرديگى بر نور ايله ايشيقلانديران بر ذاتدن بحث ايتمهلرى، ضرورى و قطعيدر. أوت كوچك حادثهلرى خبر ويرن او كتابلر، نوعِ بشرڭ أڭ بيوك حادثهسى اولان حادثۀِ محمّديه عليه الصلاة والسلامى خبر ويرمهمك قابل ميدر؟ ايشته مادام بِالبداهه خبر ويرهجكلر، هر حالده يا تكذيب ايدهجكلر، تا كه دينلرينى تخريبدن و كتابلرينى نسخدن قورتارسينلر.. ويا تصديق ايدهجكلر، تا كه او حقيقتلى ذات ايله، دينلرى خرافاتدن و تحريفاتدن قورتولسون. حالبوكه دوست و دشمنڭ إتّفاقيله، تكذيب أمارهسى هيچ بر كتابده يوقدر. اويله ايسه، تصديق واردر. مادام مطلق بر صورتده تصديق واردر و مادام شو تصديقڭ وجودينى إقتضا ايدن قطعى بر علّت و أساسلى بر سبب واردر؛ بز دخى، او تصديقڭ وجودينه دلالت ايدن اوچ حجّتِ قاطعه ايله إثبات ايدهجگز:
برنجى حجّت: رسولِ أكرم عليه الصلاة والسلام قرآنڭ لسانيله اونلره دير كه: «كتابلريڭزده، بنم تصديقم و أوصافم واردر. بنم بيان ايتديگم شيلرده، كتابلريڭز بنى تصديق ايدييور.»
﴿قُلْ فَاْتُوا بِالتَّوْرٰيةِ فَاتْلُوهَٓا اِنْ كُنْتُمْ صَادِقٖينَ ۞ قُلْ تَعَالَوْا نَدْعُ اَبْنَٓاءَنَا وَاَبْنَٓاءَكُمْ وَنِسَٓاءَنَا وَنِسَٓاءَكُمْ وَاَنْفُسَنَا وَاَنْفُسَكُمْ ثُمَّ نَبْتَهِلْ فَنَجْعَلْ لَعْنَةَ اللّٰهِ عَلَى الْكَاذِبٖينَ﴾
گبى آيتلرله، اونلره ميدان اوقويور. «توراتڭزى گتيريڭز، اوقويڭز و گليڭز؛ بز چولوق و چوجغمزى آلوب جنابِ حقّڭ درگاهنه أل آچوب، يالانجيلر عليهنده لعنتله دعا ايدهجگز!» دييه متماديًا اونلرڭ باشنه وورديغى حالده، هيچ يهودى بر عالم ويا نصرانى بر قسّيس، اونڭ بر ياڭليشنى گوسترهمدى. أگر گوسترسه ايدى، پك چوق كثرتده بولونان و پك چوق عنادلى و حسدلى اولان كافرلر و منافق يهوديلر و بتون عالمِ كفر، هر طرفده إعلان ايدهجكلردى. هم ديمش: «يا ياڭليشمى بولڭز وياخود سزڭله محو اولنجهيه قدر جهاد ايدهجگم!» حالبوكه بونلر، حربى و پريشانيتى و هجرتى إختيار ايتديلر. ديمك ياڭليشنى بولامديلر. بر ياڭليش بولونسه ايدى، اونلر قورتولورلردى.
ايكنجى حجّت: تورات، إنجيل و زبورڭ عبارهلرى؛ قرآن گبى إعجازلرى اولماديغندن، هم متماديًا ترجمه ترجمه اوستنه اولديغندن، پك چوق يبانى كلمهلر ايچلرينه قاريشدى. هم مفسّرلرڭ سوزلرى و ياڭليش تأويللرى، اونلرڭ آيتلريله إلتباس ايديلدى؛ هم بعض نادانلرڭ و بعض أهلِ غرضڭ تحريفاتى ده علاوه ايديلدى. شو صورتده او كتابلرده تحريفات، تغييرات چوغالدى. حتّى شيخ رحمة اللّٰه هندى (علاّمۀِ مشهور) كتبِ سابقهنڭ بيڭلر يرده تحريفاتنى، كشيشلرينه و يهودى و نصارا علماسنه إثبات ايدهرك، إسكات ايتمش. ايشته بو قدر تحريفاتله برابر، شو زمانده دخى مشهور حسينِ جسرى (رحمة اللّٰه عليه) او كتابلردن يوز اون درت دليل نبوّتِ أحمديهيه دائر چيقارمشدر. «رسالۀِ حميديه»ده يازمش. او رسالهيى ده، مناسترلى مرحوم إسماعيل حقّى ترجمه ايتمش. كيم آرزو ايدرسه، اوڭا مراجعت ايدر، گورور.
هم پك چوق يهودى علماسى و نصارا علماسى، إقرار و إعتراف ايتمشلر كه: «كتابلريمزده محمّدِ عربى عليه الصلاة والسلامڭ أوصافى يازيليدر.» أوت غيرِ مسلم اولارق باشده مشهور روم مَلِكلرندن هرقل إعتراف ايتمش، ديمش كه: «أوت عيسى عليه السلام، محمّد عليه الصلاة والسلامدن خبر ويرييور.»
هم روم مَلِكى، مُقَوْقِسْ نامنده مصر حاكمى و علماءِ يهودڭ أڭ مشهورلرندن ابن صوريا و ابن أخطب و اونڭ قارداشى، كعب بن أسد و زبير بن باطيا گبى مشهور علما و رئيسلر، غيرِ مسلم قالدقلرى حالده إقرار ايتمشلر كه: «أوت كتابلريمزده اونڭ أوصافى واردر، اوندن بحث ايدييورلر.»
هم يهودڭ مشهور علماسندن و نصارانڭ مشهور قسّيسلرندن، كتبِ سابقهده أوصافِ محمّديهيى (عصم) گوردكدن صوڭره عنادى ترك ايدوب ايمانه گلنلر، أوصافنى تورات و إنجيلده گوسترمشلر و سائر يهودى و نصرانى علماسنى اونڭله إلزام ايتمشلر. أزجمله، مشهور عبد اللّٰه ابن سلام و وهب ابن مُنَبِّهْ و أبى ياسير و شامول (كه بو ذات، مَلِكِ يمن تُبَّعْ زماننده ايدى. تُبَّعْ ناصل غيابًا و بعثتدن أوّل ايمان گتيرمش، شامول ده اويله.) و سعيهنڭ ايكى اوغلى اولان أسيد و ثعلبه كه؛ ابن هيبان دينيلن بر عارفِ بِاللّٰه بعثتدن أوّل بنى نضير قبيلهسنه مسافر اولمش.
﴿قَرٖيبٌ ظُهُورُ نَبِىٍّ هٰذَا دَارُ هِجْرَتِهٖ﴾
ديمش، اوراده وفات ايتمش. صوڭره او قبيله رسولِ أكرم عليه الصلاة والسلام ايله حرب ايتدكلرى زمان أسيد و ثعلبه ميدانه چيقديلر، او قبيلهيه باغرديلر:
﴿وَاللّٰهِ هُوَ الَّذٖى عَهَدَ اِلَيْكُمْ فٖيهِ ابْنُ هَيْبَانْ﴾
يعنى: «ابن هيبانڭ خبر ويرديگى ذات بودر؛ اونڭله حرب ايتمهيڭز!» فقط اونلر اونلرى ديڭلهمديلر، بلالرينى بولديلر.
هم علماءِ يهوددن ابن بنيامن و مُخيرِقْ و كعب الأحبار گبى چوق علماءِ يهود، أوصافِ نبويهيى كتابلرنده گوردكلرندن، ايمانه گلمشلر؛ سائر ايمانه گلمهينلرى ده إلزام ايتمشلر.
هم علماءِ نصارادن، بحثى گچن مشهور بحيراءِ راهب كه؛ رسولِ أكرم عليه الصلاة والسلام شام طرفنه عموجهسيله گيتديگى وقت اون ايكى ياشنده ايدى. بحيراءِ راهب، اونڭ خاطرى ايچون قُريشيلرى دعوت ايتمش. باقدى كه، قافلهيه گولگه ايدن بر پارچه بلوط، داها قافله يرنده گولگه ايدييور. «ديمك آراديغم آدم اوراده قالمش!» صوڭره آدم گوندرمش، اونى ده گتيرتمش. أبو طالبه ديمش: «سن دون مكّهيه گيت! يهوديلر حسوددرلر؛ بونڭ أوصافى توراتده مذكوردر؛ خيانت ايدرلر.»
هم نَسطُورُ الحَبَشَه و حبش رئيسى اولان نجاشى، أوصافِ محمّديهيى (عصم) كتابلرنده گوردكلرى ايچون، برابر ايمان ايتمشلر.
هم ضَغَاطِرْ إسمنده مشهور بر نصرانى عالمى؛ أوصافنى گورمش، ايمان ايتمش؛ روملر ايچنده إعلان ايتمش، شهيد ايديلمش.
هم نصرانى رؤساسندن حارث ابن أبى شُمَرِ الغَسَانى و شامڭ بيوك دينى رئيسلرى و مَلِكلرى، يعنى صاحبِ إليا و هرقل و ابن ناطُور و جاروت گبى مشهور ذاتلر، كتابلرنده أوصافنى گورمشلر و ايمان ايتمشلر. يالڭز هرقل، دنيا سلطنتى ايچون ايماننى إظهار ايتمهمش.
هم بونلر گبى سلمان الفارسى، او ده أوّل نصرانى ايدى. رسولِ أكرم عليه الصلاة والسلامڭ أوصافنى گوردكدن صوڭره، اونى آرايوردى.
هم تَمِيم نامنده مهمّ بر عالم، هم مشهور حبش رئيسى نجاشى، هم حبش نصاراسى، هم نجران پاپاسلرى؛ بتون متّفقًا خبر ويرييورلر كه: «بز، أوصافِ نبويهيى كتابلريمزده گوردك، اونڭ ايچون ايمانه گلدك.»
اوچنجى حجّت: ايشته بر نمونه اولارق تورات، إنجيل، زبورڭ پيغمبريمز عليه الصلاة والسلامه عائد آيتلرينڭ بر قاچ نمونهسنى گوسترهجگز:
برنجيسى: زبورده شويله بر آيت وار:
﴿اَللّٰهُمَّ ابْعَثْ لَنَا مُقٖيمَ السُّنَّةِ بَعْدَ الْفَتْرَةِ﴾
«مُقِيمُ السنّه» ايسه، إسمِ أحمديدر.
إنجيلڭ آيتى:
﴿قَالَ الْمَسٖيحُ اِنّٖى ذَاهِبٌ اِلٰى اَبٖى وَاَبٖيكُمْ لِيَبْعَثَ لَكُمُ الْفَارَقْلٖيطَا﴾
يعنى: «بن گيدييورم، تا سزه فارقليط گلسين!» يعنى، أحمد گلسين.
إنجيلڭ ايكنجى بر آيتى:
﴿اِنّٖى اَطْلُبُ مِنْ رَبّٖى فَارَقْلٖيطًا يَكُونُ مَعَكُمْ اِلَى الْاَبَدِ﴾
يعنى: «بن ربّمدن؛ حقّى باطلدن فرق ايدن بر پيغمبرى ايستهيورم كه، أبده قدر برابريڭزده بولونسون.» فارقليط،
﴿اَلْفَارِقُ بَيْنَ الْحَقِّ وَالْبَاطِلِ﴾
معناسنده پيغمبرڭ او كتابلرده إسميدر.
توراتڭ آيتى:
﴿اِنَّ اللّٰهَ قَالَ لِاِبْرَاهٖيمَ اِنَّ هَاجَرَ تَلِدُ وَيَكُونُ مِنْ وَلَدِهَا مَنْ يَدُهُ فَوْقَ الْجَمٖيعِ وَيَدُ الْجَمٖيعِ مَبْسُوطَةٌ اِلَيْهِ بِالْخُشُوعِ﴾
يعنى: «حضرتِ إسماعيلڭ والدهسى اولان هاجر، أولاد صاحبهسى اولاجق و اونڭ أولادندن اويله بريسى چيقهجق كه، او ولدڭ ألى، عمومڭ فوقنده اولاجق و عمومڭ ألى خشوع و إطاعتله اوڭا آچيلاجق.»
توراتڭ ايكنجى بر آيتى:
﴿وَقَالَ يَا مُوسٰى اِنّٖى مُقٖيمٌ لَهُمْ نَبِيًّا مِنْ بَنٖى اِخْوَتِهِمْ مِثْلَكَ وَاُجْرٖى قَوْلٖى فٖى فَمِهٖ وَالرَّجُلُ الَّذٖى لَايَقْبَلُ قَوْلَ النَّبِىِّ الَّذٖى يَتَكَلَّمُ بِاِسْمٖى فَاَنَا اَنْتَقِمُ مِنْهُ﴾
يعنى: «بنى إسرائيلڭ قارداشلرى اولان بنى إسماعيلدن سنڭ گبى برينى گوندرهجگم. بن سوزيمى اونڭ آغزينه قويهجغم، بنم وحيمله قونوشهجق. اونى قبول ايتمهينه عذاب ويرهجگم.»
توراتڭ اوچنجى بر آيتى:
﴿قَالَ مُوسٰى رَبِّ اِنّٖى اَجِدُ فِى التَّوْرٰيةِ اُمَّةً هُمْ خَيْرُ اُمَّةٍ اُخْرِجَتْ لِلنَّاسِ يَاْمُرُونَ بِالْمَعْرُوفِ وَيَنْهَوْنَ عَنِ الْمُنْكَرِ وَيُؤْمِنُونَ بِاللّٰهِ فَاجْعَلْهُمْ اُمَّتٖى قَالَ تِلْكَ اُمَّةُ مُحَمَّدٍ﴾
إخطار: محمّد إسمى، او كتابلرده «مُشَفَّحْ» و «اَلْمُنْحَمَنَّا» و «حِمْياطا» گبى سُريانى إسملر صورتنده، «محمّد» معناسندهكى عِبرانى إسملريله گلمش. يوقسه صريح محمّد إسمى آز واردى. صريح مقدارينى دخى، حسود يهوديلر تحريف ايتمشلر.
زبورڭ آيتى:
﴿يَا دَاوُدُ يَاْتٖى بَعْدَكَ نَبِىٌّ يُسَمّٰى اَحْمَدَ وَمُحَمَّدًا صَادِقًا سَيِّدًا اُمَّتُهُ مَرْحُومَةٌ﴾
هم عَباَدِلَۀِ سبعهدن و كتبِ سابقهده چوق تدقيقات ياپان عبد اللّٰه ابن عَمْرو ابن العاص و مشهور علماءِ يهوددن أڭ أوّل إسلامه گلن عبد اللّٰه ابن سلام و مشهور كعب الأحبار دينيلن بنى إسرائيلڭ علاّمهلرندن؛ او زمانده داها چوق تحريفاته اوغراميان توراتده عينًا شو گلهجك آيتى إعلان ايدهرك گوسترمشلر. آيتڭ بر پارچهسى شودر كه: حضرتِ موسى ايله خطابدن صوڭره، گلهجك پيغمبره خطابًا شويله دييور:
﴿يَا اَيُّهَا النَّبِىُّ اِنَّا اَرْسَلْنَاكَ شَاهِدًا وَمُبَشِّرًا وَنَذٖيرًا وَحِرْزًا لِلْاُمِّيّٖينَ اَنْتَ عَبْدٖى سَمَّيْتُكَ الْمُتَوَكِّلَ لَيْسَ بِفَظٍّ وَلَا غَلٖيظٍ وَلَا صَخَّابٍ فِى الْاَسْوَاقِ وَلَا يَدْفَعُ بِالسَّيِّئَةِ السَّيِّئَةَ بَلْ يَعْفُو وَيَغْفِرُ وَلَنْ يَقْبِضَهُ اللّٰهُ حَتّٰى يُقٖيمَ بِهِ الْمِلَّةَ الْعَوْجَاءَ بِاَنْ يَقُولُوا لَا اِلٰهَ اِلَّا اللّٰهُ﴾
توراتڭ بر آيتى داها:
﴿مُحَمَّدٌ رَسُولُ اللّٰهِ مَوْلِدُهُ بِمَكَّةَ وَهِجْرَتُهُ بِطَيْبَةَ وَمُلْكُهُ بِالشَّامِ وَاُمَّتُهُ الْحَمَّادُونَ﴾
ايشته شو آيتده «محمّد» لفظى، محمّد معناسنده سُريانى بر إسمده گلمشدر.
توراتڭ ديگر بر آيتى داها:
﴿اَنْتَ عَبْدٖى وَرَسُولٖى سَمَّيْتُكَ الْمُتَوَكِّلَ﴾
ايشته شو آيتده، بنى إسحٰقڭ قارداشلرى اولان بنى إسماعيلدن و حضرتِ موسىدن صوڭره گلن پيغمبره خطاب ايدييور.
توراتڭ ديگر بر آيتى داها:
﴿عَبْدِىَ الْمُخْتَارُ لَيْسَ بِفَظٍّ وَلَا غَلٖيظٍ﴾
ايشته «مختار»ڭ معناسى؛ «مصطفى»در، هم إسمِ نبويدر.
إنجيلده، عيسىدن صوڭره گلن و إنجيلڭ بر قاچ آيتنده «عالم رئيسى» عنوانيله مژده ويرديگى نبىنڭ تعريفنه دائر:
﴿مَعَهُ قَضٖيبٌ مِنْ حَدٖيدٍ يُقَاتِلُ بِهٖ وَاُمَّتُهُ كَذٰلِكَ﴾
ايشته شو آيت گوسترييور كه: «صاحب السيف و جهاده مأمور بر پيغمبر گلهجكدر.» قضيبِ حديد، قلنج ديمكدر. هم اُمّتى ده اونڭ گبى صاحب السيف، يعنى جهاده مأمور اولاجغنى، سورۀ فتحڭ آخرنده
﴿وَمَثَلُهُمْ فِى الْاِنْجٖيلِ كَزَرْعٍ اَخْرَجَ شَطْاَهُ فَاٰزَرَهُ فَاسْتَغْلَظَ فَاسْتَوٰى عَلٰى سُوقِهٖ يُعْجِبُ الزُّرَّاعَ لِيَغٖيظَ بِهِمُ الْكُفَّارَ﴾
آيتى، إنجيلڭ شو آيتى گبى، باشقه آيتلرينه إشارت ايدوب، محمّد عليه الصلاة والسلام صاحب السيف و جهاده مأمور اولديغنى إنجيل ايله برابر إعلان ايدييور.
توراتڭ بشنجى كتابنڭ اوتوز اوچنجى بابنده شو آيت وار:
«حق تعالى، طُورِ سينادن إقبال ايدوب بزه ساعيردن طلوع ايتدى و فاران طاغلرنده ظاهر اولدى.»
ايشته شو آيت ناصلكه «طُورِ سيناده إقبالِ حق» فقرهسيله نبوّتِ موسويهيى و شام طاغلرندن عبارت اولان «ساعيردن طلوعِ حق» فقرهسيله، نبوّتِ عيسويهيى إخبار ايدر. اويله ده بِالإتّفاق حجاز طاغلرندن عبارت اولان «فاران طاغلرندن ظهورِ حق» فقرهسيله، بِالضروره رسالتِ أحمديهيى (عصم) خبر ويرييور. هم سورۀ فتحڭ آخرنده (ذٰلِكَ مَثَلُهُمْ فِى التَّوْرٰيةِ) حكمنى تصديقًا، توراتده فاران طاغلرندن ظهور ايدن پيغمبرڭ صحابهلرى حقّنده شو آيت وار: «قدسيلرڭ بايراقلرى برابرندهدر و اونڭ صاغندهدر.» «قدسيلر» ناميله توصيف ايدر. يعنى: «اونڭ صحابهلرى قدسى، صالح أوليالردر.»
أشعيا پيغمبرڭ كتابنده، قرق ايكنجى بابنده شو آيت واردر:
«حق سبحانَهُ آخر زمانده، كندينڭ إصطفاگرده و بَرْگُزيدهسى قولنى بعث ايدهجك و اوڭا روح الأمين حضرتِ جبريلى يوللايوب، دينِ إلٰهيسنى اوڭا تعليم ايتديرهجك. و او دخى، روح الأمينڭ تعليمى وجهله ناسه تعليم ايلهيهجك و بيْن الناس حق ايله حكم ايدهجكدر. او بر نوردر، خلقى ظلماتدن چيقارهجقدر. ربّڭ بڭا قبل الوقوع بيلديرديگى شيئى، بن ده سزه بيلديرييورم.»
ايشته شو آيت غايت صريح بر صورتده، آخر زمان پيغمبرى اولان محمّد عليه الصلاة والسلامڭ أوصافنى بيان ايدييور.
ميشائل ناميله مسمّا ميخائيل پيغمبرڭ كتابنڭ دردنجى بابنده شو آيت وار:
«آخر زمانده بر اُمّتِ مرحومه قائم اولوب، اوراده حقّه عبادت ايتمك اوزره، مبارك طاغى إختيار ايدرلر. و هر إقليمدن اوراده بر چوق خلق طوپلانوب، ربِّ واحده عبادت ايدرلر. اوڭا شرك ايتمزلر.»
ايشته شو آيت، ظاهر بر صورتده دنيانڭ أڭ مبارك طاغى اولان جبلِ عرفات و اوراده هر إقليمدن گلن حاجيلرڭ تكبير و عبادتلرينى و اُمّتِ مرحومه ناميله شهرتشعار اولان اُمّتِ محمّديهيى تعريف ايدييور.
زبورده يتمش ايكنجى بابنده شو آيت وار:
«بحردن بحره مالك و نهرلردن، أرضڭ مقطع و منتهاسنه قدر مالك اوله.. و كنديسنه يمن و جزائر ملوكى هديهلر گتورهلر.. و پادشاهلر اوڭا سجده و إنقياد ايدهلر.. و هر وقت اوڭا صلات و هر گون كنديسنه بركتله دعا اولونه.. و أنوارى مدينهدن متنوّر اوله.. و ذكرى أبد الآباد دوام ايده.. اونڭ إسمى، شمسڭ وجودندن أوّل موجوددر. اونڭ آدى، گونش طوردقجه منتشر اوله...»
ايشته شو آيت، پك آشكار بر طرزده فخرِ عالم عليه الصلاة والسلامى توصيف ايدر. عجبا حضرتِ داود عليه السلامدن صوڭره محمّدِ عربى عليه الصلاة والسلامدن باشقه هانگى نبى گلمش كه؛ شرقدن غربه قدر ديننى نشر ايتمش و ملوكى جزيهيه باغلامش و پادشاهلرى كندينه سجده ايدر گبى بر إنقياد آلتنه آلمش و هر گون نوعِ بشرڭ خُمسنڭ صلوات و دعالرينى كندينه قزانمش و أنوارى مدينهدن پارلامش كيم وار؟ كيم گوستريلهبيلير؟
هم توركجه يوحنّا إنجيلنڭ اون دردنجى باب و اوتوزنجى آيتى شودر:
«آرتيق سزڭله چوق سويلشمهم، زيرا بو عالمڭ رئيسى گلييور. و بنده، اونڭ نسنهسى أصلا يوقدر!» ايشته «عالمڭ رئيسى» تعبيرى، «فخرِ عالم» ديمكدر. فخرِ عالم عنوانى ايسه، محمّدِ عربى عليه الصلاة والسلامڭ أڭ مشهور عنوانيدر.
ينه إنجيلِ يوحنّا، اون آلتنجى باب و يدنجى آيتى شودر:
«امّا بن، سزه حقّى سويلهيورم. بنم گيتديگم، سزه فائدهليدر. زيرا بن گيتمهينجه، تسلّيجى سزه گلمز.» ايشته باقڭز! رئيسِ عالم و إنسانلره حقيقى تسلّى ويرن، محمّدِ عربى عليه الصلاة والسلامدن باشقه كيمدر؟ أوت فخرِ عالم اودر و فانى إنسانلرى إعدامِ أبديدن قورتاروب تسلّى ويرن اودر.
هم إنجيلِ يوحنّا، اون آلتنجى باب، سكزنجى آيتى:
«او دخى گلدكده؛ دنيايى گناهه دائر، صلاحه دائر و حكمه دائر إلزام ايدهجكدر.» ايشته دنيانڭ فسادينى صلاحه چويرن و گناهلردن و شركدن قورتاران و سياست و حاكميتِ دنيايى تبديل ايدن محمّدِ عربى عليه الصلاة والسلامدن باشقه كيم گلمش؟
هم إنجيلِ يوحنّا، اون آلتنجى باب، اون برنجى آيت:
«زيرا بو عالمڭ رئيسنڭ گلمهسنڭ حكمى گلمشدر.» ايشته «عالمڭ رئيسى» (حاشيه) ألبته سيّد البشر اولان أحمدِ محمّد عليه الصلاة والسلامدر.
___
(حاشيه): أوت، او ذات، اويله بر رئيس و سلطاندر كه؛ بيڭ اوچيوز أللى سنهده و أكثر عصرلردن هر بر عصرده، لا أقل اوچ يوز أللى ميليون تبعهسى و رعيتى وار. كمالِ تسليم و إنقيادله، أوامرينه إطاعت ايدرلر، هر گون اوڭا سلام ايتمكله تجديدِ بيعت ايدرلر.
___
هم إنجيلِ يوحنّا، اون آلتنجى باب و اون اوچنجى آيت:
«امّا او حق روحى گلديگى زمان، سزى بِالجمله حقيقته إرشاد ايدهجكدر. زيرا كنديسندن سويلهمييور. بِالجمله ايشيتديگنى سويلهيهرك، گلهجك نسنهلردن سزه خبر ويرهجك.» ايشته بو آيت صريحدر. عجبا عموم إنسانلرى بردن حقيقته دعوت ايدن و هر خبرينى وحيدن ويرن و جبرائيلدن ايشيتديگنى سويلهين و قيامت و آخرتدن تفصيلاً خبر ويرن، محمّدِ عربى عليه الصلاة والسلامدن باشقه كيمدر و كيم اولابيلير؟
هم كتبِ أنبياده، رسولِ أكرم عليه الصلاة والسلامڭ محمّد، أحمد، مختار معناسنده سُريانى و عِبرانى إسملرى وار. ايشته:
حضرتِ شعيبڭ صحفنده إسمى، محمّد معناسنده (مُشَفَّحْ) در. هم توراتده ينه محمّد معناسنده (مُنحَمَنَّا)، هم نَبِىُّ الحرم معناسنده (حِمْياطا) . زبورده (اَلْمُخْتَارْ) إسميله مسمّادر. ينه توراتده (الخَاتَمُ الخاتم) . هم توراتده و زبورده (مُقٖيمُ السنّه) . هم صحفِ إبراهيم و توراتده (مازماز) در. هم توراتده (اَحْيَدْ) در.
رسولِ أكرم عليه الصلاة والسلام ديمش:
﴿اِسْمٖى فِى الْقُرْاٰنِ مُحَمَّدٌ وَفِى الْاِنْجٖيلِ اَحْمَدُ وَفِى التَّوْرٰيةِ اَحْيَدُ﴾
بيورمشدر. هم إنجيلده، أسماءِ نبويدن «صَاحِبُ الْقَضٖيبِ وَالْهَرَاوَةِ» يعنى «سيف و عصا صاحبى.» أوت صاحب السيف أنبيالر ايچنده أڭ بيوگى؛ امّتيله جهاده مأمور، رسولِ أكرم عليه الصلاة والسلامدر. ينه إنجيلده «صاحب التاج»در. أوت «صاحب التاج» عنوانى، رسولِ أكرم عليه الصلاة والسلامه مخصوصدر. تاج، عمامه يعنى صاريق ديمكدر. أسكى زمانده ملّتلر ايچنده، ملّتجه عموميت إعتباريله صاريق و عَگلْ صاران قَوم عربدر. إنجيلده «صاحب التاج»، قطعى اولارق «رسولِ أكرم» (عليه الصلاة والسلام) ديمكدر.
هم إنجيلده «البارقليط» وياخود «الفارقليط» كه إنجيل تفسيرلرنده، «حق و باطلى بربرندن تفريق ايدن حقپرست» معناسى ويريلمش كه؛ صوڭره گلهجك إنسانلرى، حقّه سَوق ايدهجك ذاتڭ إسميدر.
إنجيلڭ بر يرنده، عيسى عليه السلام ديمش:
«بن گيدهجگم؛ تا دنيانڭ رئيسى گلسين.» عجبا حضرتِ عيسى عليه السلامدن صوڭره دنيانڭ رئيسى اولاجق و حق و باطلى فرق و تمييز ايدوب حضرتِ عيسى عليه السلامڭ يرنده إنسانلرى إرشاد ايدهجك، رسولِ أكرم عليه الصلاة والسلامدن باشقه كيم گلمشدر؟ ديمك حضرتِ عيسى عليه السلام امّتنه دائما مژده ايدييور و خبر ويرييور كه: «بريسى گلهجك، بڭا إحتياج قالميهجق. بن، اونڭ بر مقدّمهسىيم و مژدهجيسىيم.» ناصلكه شو آيتِ كريمه:
﴿وَاِذْ قَالَ عٖيسَى ابْنُ مَرْيَمَ يَا بَنٖٓى اِسْرَٓائٖيلَ اِنّٖى رَسُولُ اللّٰهِ اِلَيْكُمْ مُصَدِّقًا لِمَا بَيْنَ يَدَىَّ مِنَ التَّوْرٰيةِ وَمُبَشِّرًا بِرَسُولٍ يَاْتٖى مِنْ بَعْدِى اسْمُهُٓ اَحْمَدُ﴾
(حاشيه)
___
(حاشيه): (اُمَّتُهُ الْحَمَّادُونَ)نڭ تتمهسيدر: سيّاحِ مشهور أوليا چلبى؛ حضرتِ شمعونِ صفانڭ تربهسنده، جيلان دريسنده يازيلى إنجيلِ شريفده، بو گلن آيتى اوقومشدر. رسولِ أكرم عليه الصلاة والسلام حقّنده نازل اولان آيت: (ايتون) بر اوغلان، (ازربيون) يعنى: إبراهيم نسلندن اوله، (پروفتون) پيغمبر اوله، (لوغسلين) يالانجى اولميه، (بنت) اونڭ (افزولات) مولدى مكّه اوله، (كه كالوشير) صالحلكله گلمش اوله، (تونومنين) اونڭ مبارك آدى (مواميت) (❊) أحمد محمّد اوله. (اسفدوس) اوڭا اويانلر، (تاكرديس) بو جهان إسّى اولالر. (بيست بيث) دخى، اول جهان إسّى اوله.
(❊) بو «مواميت» كلمهسى «مَمَدْ»دن و «مَمَدْ» دخى «محمّد»دن تحريف ايديلمش..
___
أوت إنجيلده حضرتِ عيسى عليه السلام، چوق دفعهلر امّتنه مژده ويرييور. إنسانلرڭ أڭ مهمّ بر رئيسى گلهجگنى و او ذاتى ده بعض إسملر ايله ياد ايدييور. او إسملر، ألبته سُريانى و عبرانيدرلر. أهلِ تحقيق گورمشلر. او إسملر، «أحمد، محمّد، فارق بَيْن الحقِّ و الباطل» معناسندهدرلر. ديمك عيسى عليه السلام، چوق دفعه أحمد عليه الصلاة والسلامدن بشارت ويرييور.
سؤال: أگر ديسهڭ: «نهدن حضرتِ عيسى عليه السلام، هر نبىدن زياده مژده ويرييور؛ باشقهلر يالڭز خبر ويرييورلر، مژده صورتى آزدر.»
الجواب: چونكه أحمد عليه الصلاة والسلام، عيسى عليه السلامى يهوديلرڭ مدهش تكذيبندن و مدهش إفترالرندن و ديننى مدهش تحريفاتدن قورتارمقله برابر.. عيسى عليه السلامى طانيميان بنى إسرائيلڭ صعوبتلى شريعتنه مقابل، سهولتلى و جامع و أحكامجه شريعتِ عيسويهنڭ نقصاننى إكمال ايدهجك بر شريعتِ عاليهيه صاحبدر. ايشته اونڭ ايچون چوق دفعه، «عالمڭ رئيسى گلييور!» دييه مژده ويرييور.
ايشته تورات، إنجيل، زبورده و سائر صحفِ أنبياده چوق أهمّيتله، آخرده گلهجك بر پيغمبردن بحثلر وار، چوق آيتلر وار. ناصل بر قسم نمونهلرينى گوستردك. هم چوق ناملر ايله او كتابلرده مذكوردر. عجبا بتون بو كتبِ أنبياده بو قدر أهمّيتله، مكرّر آيتلرده بحث ايتدكلرى، آخر زمان پيغمبرى حضرتِ محمّد عليه الصلاة والسلامدن باشقه كيم اولابيلير؟
ايكنجى قسم إرهاصاتدن و دلائلِ نبوّتدن مقصد شودر كه:
بعثتِ أحمديهدن أوّل، زمانِ فترتده كاهنلر، هم او زمانڭ بر درجه أوليا و عارفِ بِاللّٰهِ اولان بر قسم إنسانلرى؛ رسولِ أكرم عليه الصلاة والسلامڭ گلهجگنى خبر ويرمشلر و إخبارلرينى ده نشر ايتمشلر، شعرلريله گلهجك عصرلره بيراقمشلر. اونلر چوقدر؛ بز، أهلِ سِيَر و تاريخڭ نقل و قبول ايتدكلرى مشهور و منتشر اولان بر قسمنى ذكر ايدهجگز.
أزجمله: يمن پادشاهلرندن تُبَّعْ إسمنده بر مَلِك، رسولِ أكرم عليه الصلاة والسلامڭ أوصافنى أسكى كتابلرده گورمش، ايمان ايتمش. شويله بر شعرينى إعلان ايتمش:
﴿شَهِدْتُ عَلٰى اَحْمَدَ اَنَّهُ ۞ رَسُولٌ مِنَ اللّٰهِ بَارِى النَّسَمِ
فَلَوْ مُدَّ عُمْرٖى اِلٰى عُمْرِهٖ ۞ لَكُنْتُ وَزٖيرًا لَهُ وَابْنَ عَمٍّ﴾
يعنى: «بن أحمدڭ (عصم) رسالتنى تصديق ايدييورم. بن اونڭ زماننه يتيشسه ايدم، اوڭا وزير و عمِّ زاده اولوردم.» (يعنى، على گبى اوڭا فدائى بر خادم اولوردم.)
ايكنجيسى: مشهور قس ابن ساعده كه، قَومِ عربڭ أڭ مشهور و مهمّ خطيبى و مُوَحِّدْ بر ذاتِ روشنضميردر. ايشته شو ذات ده، بعثتِ نبويدن أوّل رسالتِ أحمديهيى شو شعرله إعلان ايدييور:
﴿اَرْسَلَ فٖينَا اَحْمَدَ خَيْرَ نَبِىٍّ قَدْ بُعِثَ § صَلّٰى عَلَيْهِ اللّٰهُ مَا عَجَّ لَهُ رَكْبٌ وَحُثَّ﴾
اوچنجيسى: رسولِ أكرم عليه الصلاة والسلامڭ أجدادندن اولان كعب ابن لُؤى، نبوّتِ أحمديهيى (عصم) إلهام أثرى اولارق شويله إعلان ايتمش:
﴿عَلٰى غَفْلَةٍ يَاْتِى النَّبِىُّ مُحَمَّدٌ فَيُخْبِرُ اَخْبَارًا صَدُوقًا خَبٖيرُهَا﴾
يعنى: «فجئةً، محمد النبى گلهجك، طوغرى خبرلرى ويرهجك.»
دردنجيسى: يمن پادشاهلرندن سيف ابن ذىيزن، كتبِ سابقهده رسولِ أكرم عليه الصلاة والسلامڭ أوصافنى گورمش؛ ايمان ايتمش، مشتاق اولمش ايدى. رسولِ أكرم عليه الصلاة والسلامڭ جدّى عبد المطّلب يمنه قافلۀِ قُريش ايله گيتديگى زمان، سيف ابن ذىيزن اونلرى چاغيرمش. اونلره ديمش كه:
﴿اِذَا وُلِدَ بِتِهَامَةَ وَلَدٌ بَيْنَ كَتْفَيْهِ شَامَةٌ كَانَتْ لَهُ الْاِمَامَةُ وَاِنَّكَ يَا عَبْدَ الْمُطَّلِبِ لَجَدُّهُ﴾
يعنى: «حجازده بر چوجق دنيايه گلير. اونڭ ايكى اوموزى آراسنده خاتم گبى بر نشان وار. ايشته او چوجق عموم إنسانلره إمام اولاجق!» صوڭره گيزلى عبد المطّلبى چاغيرمش، «او چوجغڭ جدّى ده سنسڭ» دييه كرامتكارانه، بعثتدن أوّل خبر ويرمش.
بشنجيسى: ورقه ابن نَوْفلْ (خديجۀِ كبرانڭ عَمِّ زادهلرندن) بدايتِ وحيده رسولِ أكرم عليه الصلاة والسلام تلاش ايتمش. خديجۀِ كبرا او حادثهيى، مشهور ورقه ابن نوفله حكايه ايتمش. ورقه ديمش: «اونى بڭا گوندر.» رسولِ أكرم عليه الصلاة والسلام ورقهنڭ ياننه گيتمش، مبدأِ وحيدهكى وضعيتى حكايه ايتمش. ورقه ديمش:
﴿بَشِّرْ يَا مُحَمَّدُ اِنّٖى اَشْهَدُ اَنَّكَ اَنْتَ النَّبِىُّ الْمُنْتَظَرُ وَبَشَّرَ بِكَ عٖيسٰى﴾
يعنى: «تلاش ايتمه، او حالت وحيدر. سڭا مژده! إنتظار ايديلن نبى سنسڭ! عيسى، سنڭله مژده ويرمش.»
آلتنجيسى: عسقلان الحِمْيَرى نام عارفِ بِاللّٰه، بعثتدن أوّل قُريشيلرى گورديگى وقت، «ايچڭزده دعواىِ نبوّت ايدن وار مى؟» «يوق» ديرلردى. صوڭره بعثت وقتنده ينه صورمش؛ «أوت» ديمشلر، «برى دعواىِ نبوّت ايدييور.» ديمش: «ايشته عالم اونى بكلهيور.»
يدنجيسى: نصارا علماىِ بنامندن ابن العلا، بعثتدن و پيغمبرى گورمهدن أوّل خبر ويرمش. صوڭره گلمش. حضرتِ پيغمبر عليه الصلاة والسلامى گورمش، ديمش:
﴿وَالَّذٖى بَعَثَكَ بِالْحَقِّ لَقَدْ وَجَدْتُ صِفَتَكَ فِى الْاِنْجٖيلِ وَبَشَّرَ بِكَ ابْنُ الْبَتُولِ﴾
يعنى: «بن سنڭ صفاتڭى إنجيلده گوردم، ايمان ايتدم. ابن مريم إنجيلده سنڭ گلهجگڭى مژده ايتمش.»
سكزنجيسى: بحثى گچن حبش پادشاهى نجاشى ديمش:
﴿لَيْتَ لٖى خِدْمَتَهُ بَدَلًا عَنْ هٰذِهِ السَّلْطَنَةِ﴾
يعنى: «كاشكه شو سلطنته بدل محمّدِ عربى عليه الصلاة والسلامڭ خدمتكارى اولسه ايدم. او خدمتكارلق، سلطنتڭ پك فوقندهدر.»
شيمدى إلهامِ ربّانى ايله غائبدن خبر ويرن بو عارفلردن صوڭره؛ غائبدن روح و جنّ واسطهسيله خبر ويرن كاهنلر، پك صريح بر صورتده رسولِ أكرم عليه الصلاة والسلامڭ گلهجگنى و نبوّتنى خبر ويرمشلر. اونلر چوقدر؛ بز، اونلردن مشهورلرى و معنوى تواتر حكمنه گچمش و أكثر تاريخ و سِيَرده نقل ايديلمش بر قاچنى ذكر ايدهجگز. اونلرڭ اوزون قصّهلرينى و سوزلرينى سِيَر كتابلرينه حواله ايدوب، يالڭز إجمالاً بحث ايدهجگز.
برنجيسى: شق إسمنده مشهور بر كاهندر كه؛ بر گوزى، بر ألى، بر آياغى وارمش. عادتا ياريم إنسان... ايشته او كاهن، معنوى تواتر درجهسنده قطعى بر صورتده تاريخلره گچمش كه؛ رسالتِ أحمديه عليه الصلاة والسلامى خبر ويروب، مكرّرًا سويلهمشدر.
ايكنجيسى: مشهور شام كاهنى سطيحدر كه؛ كميكسز، عادتا أعضاسز بر وجود، يوزى گوگسى ايچنده بر أعجوبۀِ خلقت و چوق ده ياشامش بر كاهندر. غائبدن ويرديگى طوغرى خبرلر، او زمان إنسانلرده شهرت بولمش. حتّى كسرى (يعنى فارس پادشاهى) گورديگى عجيب رؤيايى و ولادتِ أحمديه (عصم) زماننده سرايڭ اون درت شرفهسنڭ دوشمهسنڭ سرّينى سطيحدن صورمق ايچون، مُويزان دينيلن عالم بر ألچيسنى گوندرمش. سطيح ديمش: «اون درت ذات سزلرده حاكميت ايدهجك، صوڭره سلطنتڭز محو اولاجق. هم بريسى گلهجك، بر دين إظهار ايدهجك. ايشته او سزڭ دين و دولتڭزى قالديرهجق!» مئالنده كسرايه خبر گوندرمش. ايشته او سطيح، صريح بر صورتده، آخر زمان پيغمبرينڭ گلمهسنى خبر ويرمش.
هم كاهنلردن سواد ابن قارب الدوسى و خنافر و افعاسيه نجران و جزل ابن جزل الكندى و ابن خلصة الدوسى و فاطمه بِنتِ نعمانِ نجاريه گبى مشهور كاهنلر، سِيَر و تاريخ كتابلرنده تفصيلاً بيان ايتدكلرى وجه اوزره؛ آخر زمان پيغمبرينڭ گلهجگنى، او پيغمبر ده، محمّد عليه الصلاة والسلام اولديغنى خبر ويرمشلر.
هم حضرتِ عثمانڭ أقرباسندن سعد ابن بِنتِ كُرَيز كاهنلك واسطهسيله، رسولِ أكرم عليه الصلاة والسلامڭ نبوّتنى غائبدن خبر آلمش. بدايتِ إسلاميتده حضرتِ عثمان ذى النّوريْنه ديمش كه: «سن گيت ايمان ايت.» عثمان بدايتده گلمش، ايمان ايتمش. ايشته او سعد، او واقعهيى بويله بر شعر ايله سويلهيور:
﴿هَدَى اللّٰهُ عُثْمَانًا بِقَوْلٖى اِلَى الَّتٖى ۞ بِهَا رُشْدُهُ وَاللّٰهُ يَهْدٖى اِلَى الْحَقِّ﴾
هم كاهنلر گبى؛ «هاتف» دينيلن، شخصى گورونمهين و سسى ايشيديلن جنّيلر، رسولِ أكرم عليه الصلاة والسلامڭ گلهجگنى مكرّرًا خبر ويرمشلر. أزجمله:
ذياب ابن الحارثه هاتفِ جنّى بويله باغيرمش، اونڭ و باشقهسنڭ سببِ إسلامى اولمش:
﴿يَا ذَيَابُ يَا ذَيَابُ ۞ اِسْمَعِ الْعَجَبَ الْعُجَابَ
بُعِثَ مُحَمَّدٌ بِالْكِتَابِ ۞ يَدْعُو بِمَكَّةَ فَلَا يُجَابُ﴾
ينه بر هاتفِ جنّى، سامعه ابن قرَّة الغطفانىيه بويله باغيرمش، بعضلرينى ايمانه گتيرمشدر:
﴿جَاءَ الْحَقُّ فَسَطَعَ وَدُمِّرَ بَاطِلٌ فَانْقَمَعَ﴾
بو هاتفلرڭ بشارتلرى و خبر ويرمهلرى پك مشهوردر و چوقدر.
هم ناصل كاهنلر، هاتفلر خبر ويرمشلر؛ اويله ده صنملر دخى و صنملره كسيلن قربانلر دخى، رسولِ أكرم عليه الصلاة والسلامڭ رسالتنى خبر ويرمشلر. أزجمله:
قصّۀ مشهورهدندر كه: مازَنْ قبيلهسنڭ صنمى باغيروب ديمش:
﴿ٰذَا النَّبِىُّ الْمُرْسَلُ ۞ جَاءَ بِالْحَقِّ الْمُنْزَلِ﴾
دييهرك، رسالتِ أحمديهيى (عصم) خبر ويرمش.
هم عبّاس ابن مِرْداسڭ سببِ إسلاميتى اولان مشهور واقعه شودر كه: ضمار نامنده بر صنمى وارمش؛ او صنم، بر گون بويله بر سس ويرمش:
﴿اَوْدٰى ضِمَارُ وَكَانَ يُعْبَدُ مُدَّةً ۞ قَبْلَ الْبَيَانِ مِنَ النَّبِىِّ مُحَمَّدٍ﴾
يعنى: «محمّد گلمهدن أوّل بڭا عبادت ايديلييوردى، شيمدى محمّدڭ بيانى گلمش؛ داها او ضلالت اولاماز.»
حضرتِ عُمَر، إسلاميتدن أوّل صنمه كسيلن بر قرباندن بويله ايشيتمش:
﴿يَا اٰلَ الذَّبٖيحِ اَمْرٌ نَجٖيحٌ رَجُلٌ فَصٖيحٌ يَقُولُ لَا اِلٰهَ اِلَّا اللّٰهُ﴾
ايشته بو نمونهلر گبى چوق واقعهلر وار، موثوق كتابلر قبول ايدوب نقل ايتمشلر.
ناصلكه كاهنلر، عارفِ بِاللّٰهلر، هاتفلر، حتّى صنملر و قربانلر، رسالتِ أحمديهيى (عصم) خبر ويرمشلر؛ هر بر حادثه دخى، بر قسم إنسانلرڭ ايماننه سبب اولمش. اويله ده، بعض طاشلر اوستنده و قبرلرده و قبرلرڭ مزار طاشلرنده خطِّ قديم ايله (مُحَمَّدٌ مُصْلِحٌ اَمٖينٌ) گبى عبارهلر بولونمش؛ اونڭله بر قسم إنسانلر ايمانه گلمشلر. أوت خطِّ قديم ايله بعض طاشلرده بولونان (مُحَمَّدٌ مُصْلِحٌ اَمٖينٌ) ، رسولِ أكرم عليه الصلاة والسلامدن عبارتدر. چونكه اوندن أوّل، زماننه پك ياقين، يالڭز يدى محمّد إسمى وار، باشقه يوقدر. او يدى آدمڭ هيچ بر جهتله «مُصلح أمين» تعبيرينه لياقتلرى يوقدر.
اوچنجى قسم
إرهاصاتدن رسولِ أكرم عليه الصلاة والسلامڭ ولادتى هنگامنده وجوده گلن خارقهلردر و حادثهلردر. او حادثهلر، اونڭ ولادتيله علاقهدار بر صورتده وجوده گلمش.
هم بعثتدن أوّل بعض حادثهلر وار كه، طوغريدن طوغرىيه برر معجزهسيدر. بونلر چوقدر. نمونه اولارق، مشهور اولمش و أئمّۀِ حديث قبول ايتمش و صحّتلرى تحقّق ايتمش بر قاچ نمونهيى ذكر ايدهجگز:
برنجيسى: ولادتِ نبوى گيجهسنده هم آننهسى، هم آننهسنڭ ياننده بولونان عثمان ابن العاصڭ آننهسى، هم عبد الرحمن ابن عَوْفڭ آننهسنڭ گوردكلرى عظيم بر نوردر كه؛ اوچى ده ديمشلر: «ولادتى آننده بز اويله بر نور گوردك كه؛ او نور، مشرق و مغربى بزه آيدينلاتديردى.»
ايكنجيسى: او گيجه كعبهدهكى صنملرڭ چوغى باشى آشاغى دوشمش.
اوچنجيسى: مشهور كسرىنڭ أيوانى (يعنى سراىِ مشهورهسى) او گيجه صاللانوب إنشقاق ايتمهسى و اون درت شرفهسنڭ دوشمهسيدر.
دردنجيسى: صاوهنڭ تقديس ايديلن كوچك دڭزينڭ او گيجهده يره باتماسى و إصطخر آبادده بيڭ سنهدر دائما إشعال ايديلن، يانان و سونمهين، مجوسيلرڭ معبود إتّخاذ ايتدكلرى آتشڭ، ولادت گيجهسنده سونمهسى. ايشته شو اوچ درت حادثه إشارتدر كه: او يڭى دنيايه گلن ذات؛ آتشپرستلگى قالديرهجق، فارس سلطنتنڭ سراينى پارچهلايهجق، إذنِ إلٰهى ايله اولميان شيلرڭ تقديسنى منع ايدهجكدر.
بشنجيسى: چندان ولادت گيجهسنده دگل، فقط ولادته پك ياقين اولديغى جهتله، او حادثهلر ده إرهاصاتِ أحمديهدر كه (عصم)، سورۀ (اَلَمْ تَرَ كَيْفَ) ده نصِّ قطعى ايله بيان ايديلن «وقعۀِ فيل»در كه؛ كعبهيى تخريب ايتمك ايچون، أبرهه نامنده حبش مَلِكى گلوب، فيلِ محمودى نامنده جسيم بر فيلى اوڭه سوروپ گلمش. مكّهيه ياقين اولديغى وقت فيل يورومهمش. چاره بولامامش، دونمشلر. أبابيل قوشلرى اونلرى مغلوب ايتمش و پريشان ايتمش، قاچمشلر. بو قصّۀِ عجيبه، تاريخ كتابلرنده تفصيلاً مشهوردر. ايشته شو حادثه، رسولِ أكرم عليه الصلاة والسلامڭ دلائلِ نبوّتندندر. چونكه ولادته پك ياقين بر زمانده، قبلهسى و مولدى و سَوْگيلى وطنى اولان كعبۀِ مكرّمه، غيبى و خارقه بر صورتده أبرههنڭ تخريبندن قورتولمشدر.
آلتنجيسى: رسولِ أكرم عليه الصلاة والسلام كوچكلگنده حليمۀِ سعديهنڭ ياننده ايكن، حاليمه و حليمهنڭ زوجنڭ شهادتلريله؛ گونشدن راحتسز اولمامق ايچون، چوق دفعه اوستنده بر بلوط پارچهسنڭ اوڭا گولگه ايتديگنى گورمشلر و خلقه سويلهمشلر و او واقعه صحّتله شهرت بولمش.
هم شام طرفنه اون ايكى ياشنده ايكن گيتديگى وقت، بحيراىِ راهبڭ شهادتيله، بر پارچه بلوط، رسولِ أكرم عليه الصلاة والسلامڭ باشنه گولگه ايتديگنى گورمش و گوسترمش.
هم ينه بعثتدن أوّل رسولِ أكرم عليه الصلاة والسلام، بر دفعه خديجۀِ كبرانڭ ميسره إسمندهكى خدمتكاريله تجارتدن گلديگى زمان، خديجۀِ كبرا، رسولِ أكرم عليه الصلاة والسلامڭ باشنده ايكى مَلگڭ بلوط طرزنده گولگه ايتدكلرينى گورمش. كندى خدمتكارى اولان ميسرهيه ديمش. ميسره دخى خديجۀ كبرايه ديمش: «بتون سفريمزده بن اويله گورويوردم.»
يدنجيسى: نقلِ صحيح ايله ثابتدر كه: رسولِ أكرم عليه الصلاة والسلام، بعثتدن أوّل بر آغاجڭ آلتنده اوطوردى؛ او ير قورو ايدى، بردن يشيللندى. آغاجڭ داللرى، اونڭ باشى اوزرينه أگيلوب قيوريلارق گولگه ياپمشدر.
سكزنجيسى: رسولِ أكرم عليه الصلاة والسلام اوفاق ايكن، أبو طالبڭ أونده قالييوردى. أبو طالب، چولوق و چوجغى ايله اونڭله برابر يرلرسه، قارينلرى طوياردى. نه وقت او ذات يمكده بولونمازسه، طوق اولمايورلردى. شو حادثه هم مشهوردر، هم قطعيدر.
هم رسولِ أكرم عليه الصلاة والسلامڭ كوچكلگنده اوڭا باقان و خدمت ايدن اُمُّ أيمن ديمش: «هيچ بر وقت رسولِ أكرم عليه الصلاة والسلام آجلق و صوسزلقدن شكايت ايتمدى، نه كوچكلگنده و نه ده بيوكلگنده.»
طوقوزنجيسى: مرضعهسى اولان حليمۀ سعديهنڭ مالنده و كچيلرينڭ سوتنده، قبيلهسنڭ خلافنه اولارق چوق بركتى و زياده اولماسيدر. بو واقعه هم مشهوردر، هم قطعيدر.
هم سينك اونى تعجيز ايتمزدى، اونڭ جسدِ مباركنه و لباسنه قونمازدى. ناصلكه أولادندن اولان سيّد عبد القادرِ گيلانى (قس) دخى، جدّندن او حالى إرثيت آلمشدى؛ سينك اوڭا ده قونمازدى.
اوننجيسى: رسولِ أكرم عليه الصلاة والسلام دنيايه گلدكدن صوڭره، باخصوص ولادت گيجهسنده، ييلديزلرڭ دوشمهسنڭ چوغالماسيدر كه؛ شو حادثه اون بشنجى سوزده قطعيًا برهانلريله إثبات ايتديگمز اوزره؛ شو ييلديزلرڭ سقوطى، شياطين و جنلرڭ غيبى خبرلردن كسيلمهسنه علامت و إشارتدر. ايشته مادام رسولِ أكرم عليه الصلاة والسلام وحى ايله دنيايه چيقدى؛ ألبته ياريم يامالاق و يالانلر ايله قاريشق، كاهنلرڭ و غائبدن خبر ويرنلرڭ و جنلرڭ إخباراتنه سد چكمك لازمدر كه، وحيه بر شبهه ايراث ايتمهسينلر و وحيه بڭزهمسين. أوت بعثتدن أوّل كاهنلك چوقدى. قرآن نازل اولدقدن صوڭره اونلره خاتمه چكدى. حتّى چوق كاهنلر ايمانه گلديلر. چونكه داها جنلر طائفهسندن اولان مخبرلرينى بولامديلر. ديمك قرآن خاتمه چكمشدى. ايشته أسكى زمان كاهنلرى گبى، شيمدى ده مديوملر صورتنده ينه بر نوع كاهنلك آوروپاده إسپرتيزمهجيلرڭ ايچلرنده باش گوسترمش. هر نه ايسه...
الحاصل: رسولِ أكرم عليه الصلاة والسلامڭ نبوّتندن أوّل نبوّتنى تصديق ايتديرن و تصديق ايدن پك چوق واقعهلر، پك چوق ذاتلر ظاهر اولمشلر.
أوت دنيايه معنًا رئيس اولاجق (حاشيه) و دنيانڭ معنوى شكلنى دگيشديرهجك و دنيايى آخرته مزرعه ياپاجق و دنيانڭ مخلوقاتنڭ قيمتلرينى إعلان ايدهجك و جنّ و إنسه سعادتِ أبديهيه يول گوسترهجك و فانى جنّ و إنسى إعدامِ أبديدن قورتارهجق و دنيانڭ حكمتِ خلقتنى و طلسمِ مغلقنى و معمّاسنى آچاجق و خالقِ كائناتڭ مقاصدينى بيلهجك و بيلديرهجك و او خالقى طانييوب عمومه طانيتديرهجق بر ذات؛ ألبته او داها گلمهدن هر شى، هر نوع، هر طائفه اونڭ گلهجگنى سَوهجك و بكلهيهجك و حسنِ إستقبال ايدهجك و آلقيشلايهجق و خالقى طرفندن بيلديريليرسه، او ده بيلديرهجك. ناصلكه سابق إشارتلرده و مثاللرده گوردك كه؛ هر بر نوعِ مخلوقات، اونى حسنِ إستقبال ايدييور گبى معجزاتنى گوسترييورلر، معجزه لسانيله نبوّتنى تصديق ايدييورلر.
___
(حاشيه): أوت سلطانِ لَوْلاَكَ لَوْلاَكَ، اويله بر رئيسدر كه: بيڭ اوچ يوز أللى سنهدر سلطنتى دوام ايدييور. برنجى عصردن صوڭره هر بر عصرده لا أقل اوچ يوز أللى ميليون تبعهسى و رعيتى واردر. كُرۀِ أرضڭ ياريسنى بايراغى آلتنه آلمش و تبعهسى، كمالِ تسليميتله اوڭا هر گون صلات و سلام ايله تجديدِ بيعت ايدهرك أمرلرينه إطاعت ايدرلر.
___