اون دردنجى إشارت:
رسولِ أكرم عليه الصلاة والسلامڭ أنواعِ معجزاتندن بر نوعِ عظيمى، دعاسيله ظاهر اولان خارقهلردر. أوت شو نوع، قطعى و حقيقى متواتردر. جزئيات و مثاللرى او قدر چوقدر كه، حساب ايديلمز. مثاللرڭ چوقلرى وار كه، اونلر ده متواتر درجهسنه چيقمشلر. بلكه تواتره ياقين مشهور اولمشلر. بر قسمنى اويله إماملر نقل ايتمش كه، مشهور متواتر گبى، قطعيتى إفاده ايدر. بز شو پك چوق مثاللرندن، تواتره ياقين و مشهور درجهسنده منتشر بعض مثاللرى، نمونه اولارق و هر مثالنده بر قاچ جزئياتنى ذكر ايدهجگز:
برنجى مثال: رسولِ أكرم عليه الصلاة والسلامڭ ياغمور دعاسى، تواتر درجهسنده و چوق دفعه تكرار ايله، دائما سرعتله قبول اولماسى، باشده إمامِ بخارى و إمامِ مسلم، أئمّۀِ حديث نقل ايتمشلر. حتّى بعض دفعه منبرِ شريف اوستنده، ياغمور دعاسى ايچون ألنى قالديروب، اينديرمهدن ياغمش. سابقًا ذكر ايتديگمز گبى، بر ايكى دفعه اوردو صوسز قالديغى وقت بلوط گلييوردى، ياغمور ويرييوردى. حتّى نبوّتدن أوّل، جدِّ نبى عبد المطّلب، رسولِ أكرم عليه الصلاة والسلامڭ كوچكلك زماننده مبارك يوزيله ياغمور دعاسنه گيدردى. اونڭ يوزى حرمتنه گليردى كه؛ او حادثه، عبد المطّلبڭ بر شعرى ايله إشتهار بولمش. هم وفاتِ نبويدن صوڭره، حضرتِ عُمَر، حضرتِ عبّاسى وسيله ياپوب ديمش: «يا ربّ! بو سنڭ حبيبڭڭ عموجهسيدر. اونڭ يوزى حرمتنه ياغمور وير.» ياغمور گلمش.
هم إمامِ بخارى و مسلم خبر ويرييورلر كه: ياغمور ايچون دعا طلب ايديلدى. رسولِ أكرم عليه الصلاة والسلام دعا ايتدى. ياغمور اويله گلدى كه، مجبور اولديلر: «امان دعا ايت، كسيلسين.» دعا ايتدى، بردن كسيلدى.
ايكنجى مثال: تواتره ياقين مشهوردر كه: رسولِ أكرم عليه الصلاة والسلام، صحابه و ايمانه گلنلر داها قرقه واصل اولمادن و گيزلى عبادت ايتمكده ايكن دعا ايتدى:
﴿اَللّٰهُمَّ اَعِزَّ الْاِسْلَامَ بِعُمَرَ ابْنِ الْخَطَّابِ اَوْ بِعَمْرِو ابْنِ الْهِشَامِ﴾
بر ايكى گون صوڭره، حضرتِ عُمَر ابن الخطّاب ايمانه گلدى و إسلاميتى إعلان و إعزاز ايتمگه وسيله اولدى. «فاروق» عنوانِ عاليسنى آلدى.
اوچنجى مثال: بعض صحابۀِ گُزينه، آيرى آيرى مقصدلر ايچون دعا ايتمش. دعاسى اويله پارلاق بر صورتده قبول اولمش كه، او كرامتِ دعائيه، معجزه درجهسنه چيقمش. أزجمله، باشده بخارى و مسلم خبر ويرييورلر كه: ابن عبّاسه شويله دعا ايتمش:
﴿اَللّٰهُمَّ فَقِّهْهُ فِى الدّٖينِ وَعَلِّمْهُ التَّاْوٖيلَ﴾
دعاسى اويله مقبول اولمش كه؛ ابن عبّاس، ترجمانُ القرآن عنوانِ ذىشاننى و حبرُ الاُمّه، يعنى علاّمۀِ اُمّت رتبۀِ عاليسنى قزانمش. حتّى چوق گنج ايكن، حضرتِ عُمَر، اونى علما و قدماىِ صحابه مجلسنه آلييوردى.
هم باشده إمامِ بخارى، أهلِ كتبِ صحيحه خبر ويرييورلر كه: أنسڭ والدهسى، رسولِ أكرم عليه الصلاة والسلامه نياز ايتمش كه: «سنڭ خادمڭ اولان أنسڭ أولاد و مالى حقّنده بركت ايله دعا ايت.» او ده دعا ايتمش:
﴿اَللّٰهُمَّ اَكْثِرْ مَالَهُ وَوَلَدَهُ وَبَارِكْ لَهُ فٖيمَا اَعْطَيْتَهُ﴾
ديمش. حضرتِ أنس آخر عمرنده قَسَم ايله إعلان ايدييور كه: «بن كندى ألمله يوز أولاديمى دفن ايتمشم. بنم مالم و ثروتم إعتباريله ده، هيچ بريسى بنم گبى مسعود ياشامامش. بنم مالمى گورييورسڭز كه پك چوقدر. بونلر، بتون دعاىِ نبويهنڭ بركتندندر.»
هم باشده إمامِ بيهقى، أهلِ حديث خبر ويرييورلر كه: عشرۀِ مبشّرهدن عبد الرحمن بن عوفه، رسولِ أكرم عليه الصلاة والسلام كثرتِ مال و بركتله دعا ايتمش. او دعانڭ بركتيله او قدر ثروت قزانمش كه، بر دفعه يدى يوز دوهيى يوكلريله برابر «فى سبيل اللّٰه» تصدّق ايتمش. ايشته دعاىِ نبويهنڭ بركتنه باقڭز، «بارك اللّٰه» دييڭز.
هم إمامِ بخارى باشده اولارق راويلر نقل ايدييورلر كه: رسولِ أكرم عليه الصلاة والسلام، عروه ابن أبى جعدهيه تجارتده كار و قزانج ايچون بركتله دعا ايتمش. عروه دييور كه: بن بعض كوفه چارشوسنده طورويوردم، بر گونده قرق بيڭ قزانييوردم، صوڭره أويمه دونويوردم. إمامِ بخارى دير كه: «طوپراغى ده ألنه آلسه، اونده بر قزانج بولوردى.»
هم عبد اللّٰه ابن جعفره، كثرتِ مال و بركت ايچون دعا ايتمش. حضرتِ عبد اللّٰه ابن جعفر، او درجه ثروت قزانمش كه، او عصرده شُهرتگير اولمش. او بركتِ دعاىِ نبوى ايله حاصل اولان ثروتى قدر، سخاوتله ده إشتهار ايتمش. بو نوعدن چوق مثاللر وار. نمونه ايچون بو درت مثالله إكتفا ايدييورز.
هم باشده إمامِ ترميذى، خبر ويرييور كه: سعد ابن أبى وقّاص ايچون رسولِ أكرم عليه الصلاة والسلام دعا ايتمش:
﴿اَللّٰهُمَّ اَجِبْ دَعْوَتَهُ﴾
ديمش. سعدڭ دعاسنڭ قبولى ايچون دعا ايتمش. او عصرده، سعدڭ بددعاسندن هركس قورقويوردى. دعاسنڭ قبولى ده شهرت بولدى.
هم مشهور أبو قتادهيه فرمان ايتمش:
﴿اَفْلَحَ اللّٰهُ وَجْهَكَ اَللّٰهُمَّ بَارِكْ لَهُ فٖى شَعْرِهٖ وَبَشَرِهٖ﴾
دييه، گنج قالماسنه دعا ايتمش. أبو قتاده يتمش ياشنده وفات ايتديگى وقت اون بش ياشنده بر گنج گبى اولديغى، نقلِ صحيح ايله شهرت بولمش.
هم مشهور شاعر نابغهنڭ قصّۀ مشهورهسيدر كه، رسولِ أكرم عليه الصلاة والسلامڭ ياننده بر شعرينى اوقومش. شو فقره:
﴿بَلَغْنَا السَّمَاءَ مَجْدُنَا وَسَنَائُنَا § وَاِنَّا نُرٖيدُ فَوْقَ ذٰلِكَ مَظْهَرًا﴾
يعنى: «شرفمز گوگه چيقدى، بز داها اوستنه چيقمق ايستهيورز!» رسولِ أكرم عليه الصلاة والسلام، ملاطفه صورتنده فرمان ايتدى:
﴿اِلٰى اَيْنَ يَا اَبَا لَيْلَا؟﴾
ديدى:
﴿اِلَى الْجَنَّةِ يَا رَسُولَ اللّٰهِ﴾
يعنى: رسولِ أكرم عليه الصلاة والسلام لطيفه اولارق ديدى: «گوكدن اوبر طرفه نرهيى ايستهيورسڭ كه، شعرڭده اورايى نيّت ايدييورسڭ؟» نابغه ديدى: «گوكلرڭ فوقنده جنّته گيتمك ايستهيورز.» صوڭره بر معنيدار شعرينى داها اوقودى. رسولِ أكرم عليه الصلاة والسلام دعا ايتدى:
﴿لاَ يَفْضُضِ اللّٰهُ فَاكَ﴾
يعنى، «سنڭ آغزڭ بوزولماسين.» ايشته او دعاىِ نبوينڭ بركتيله، او نابغه يوز يگرمى ياشنده بر ديشى نقصان اولمادى. حتّى بعض بر ديشى دوشديگى وقت، يرينه بر داها گلييوردى.
هم نقلِ صحيح ايله إمامِ على ايچون دعا ايتمش كه:
﴿اَللّٰهُمَّ اكْفِهِ الْحَرَّ وَالْقَرَّ﴾
يعنى: «يا ربّ! صوغوق و صيجاغڭ زحمتنى اوڭا گوسترمه.» ايشته شو دعا بركتيله، إمامِ على قيشده ياز لباسنى گيهردى، يازده قيش لباسنى گيهردى. دير ايدى كه: او دعانڭ بركتيله هيچ بر صوغوق و صيجاغڭ زحمتنى چكمييورم.
هم حضرتِ فاطمه ايچون دعا ايتمش:
﴿اَللّٰهُمَّ لَا تُجِعْهَا﴾
يعنى: «آجلق ألمنى اوڭا ويرمه.» حضرتِ فاطمه دير كه: «او دعادن صوڭره آجلق ألمنى گورمدم.»
هم طُفَيل ابن عَمرو، رسولِ أكرم عليه الصلاة والسلامدن بر معجزه ايستدى كه، گوتوروب قَومنه گوسترسين. رسولِ أكرم عليه الصلاة والسلام،
﴿اَللّٰهُمَّ نَوِّرْ لَهُ﴾
ديمش. ايكى گوزى اورتهسنده بر نور ظهور ايتمش. صوڭره دگنگى اوجنه نقل اولمش. بونڭ ايله «ذى النور» دييه إشتهار بولمش. ايشته بو واقعهلر، أحاديثِ مشهورهدندر كه، قطعيت پيدا ايتمشلر.
هم أبو هريره، رسولِ أكرم عليه الصلاة والسلامه شكوا ايتمش كه، «نسيان بڭا عارض اولويور.» رسولِ أكرم عليه الصلاة والسلام فرمان ايتمش، بر منديل شكلنده بر شى آچمش. صوڭره مبارك آووجى ايله غائبدن بر شى آلير گبى، اويله آووجنى اورايه بوشالتمش. ايكى اوچ دفعه اويله ياپارق أبو هريرهيه ديمش: «شيمدى منديلى طوپلا.» طوپلامش. بو سرِّ معنوئِ دعاىِ نبوى ايله أبو هريره قَسَم ايدر كه: «اوندن صوڭره هيچ بر شى اونوتمادم.» ايشته بو واقعهلر، أحاديثِ مشهورهدندرلر.
دردنجى مثال: رسولِ أكرم عليه الصلاة والسلامڭ بددعاسنه مظهر اولمش بر قاچ واقعهيى بيان ايدرز:
برنجيسى: پرويز دينيلن فارس پادشاهى، نامۀ نبويهيى ييرتمش. رسولِ أكرم عليه الصلاة والسلامه خبر گلدى. شويله بددعا ايتدى:
﴿اَللّٰهُمَّ مَزِّقْهُ﴾
«يا ربّ! ناصل مكتوبمى پارهلادى، سن ده اونى و اونڭ ملكنى پارچه پارچه ايت.» ايشته شو بددعانڭ تأثيريلهدر كه؛ او كسرى پرويزڭ اوغلى شيرويه، خنچر ايله اونى پارهلادى. سعد ابن أبى وقّاص ده، سلطنتنى پارچه پارچه ايتدى. ساسانيه دولتنڭ هيچ بر يرده شوكتى قالمادى. فقط قيصر و سائر مَلِكلر، نامۀ نبويهيه حرمت ايتدكلرى ايچون، محو اولماديلر.
ايكنجيسى: تواتره ياقين مشهوردر و آياتِ قرآنيه إشارت ايدييور كه: بدايتِ إسلامده رسولِ أكرم عليه الصلاة والسلام مسجد الحرامده نماز قيلاركن؛ رؤساىِ قُريش طوپلانديلر، اوڭا قارشى غايت بد بر معامله ايتديلر. او ده، او وقت اونلره بددعا ايتدى. ابن مسعود دير كه: قَسَم ايدرم، او بد معاملهيى ياپان و اونڭ بددعاسنه مظهر اولانلرڭ، غزوۀ بدرده برر برر لاشهلرينى گوردم.
اوچنجيسى: مُضَرِيّه دينيلن عربڭ بيوك بر قبيلهسى، پيغمبر عليه الصلاة والسلامى تكذيب ايتدكلرى ايچون، اونلره قحط ايله بددعا ايتدى. ياغمور كسيلدى، قحط و غلا باش گوستردى. صوڭره مُضَرِيّه قَومندن اولان قبيلۀِ قُريش، رسولِ أكرم عليه الصلاة والسلامه إلتماس ايتديلر. دعا ايتدى؛ ياغمور گلدى، قحطلق قالقدى. بو واقعه تواتر درجهسنده مشهوردر.
بشنجى مثال: خصوصى آدملره بددعاسنڭ دهشتلى قبوليدر. بونڭ چوق مثاللرى وار. قطعى اوچ مثالى نمونه اولارق بيان ايدرز:
برنجيسى: عُتبه ابن أبى لهب حقّنده شويله بددعا ايتدى:
﴿اَللّٰهُمَّ سَلِّطْ عَلَيْهِ كَلْبًا مِنْ كِلَابِكَ﴾
يعنى: «يا ربّ! اوڭا بر ايتڭى مسلّط ايت.» صوڭره عُتبه سفره گيدركن، بر آرسلان گلوب، قافله ايچنده اونى آرايوب بولمش، پارچهلامش. شو واقعه مشهوردر. أئمّۀ حديث، نقل و تصحيح ايتمشلر.
ايكنجيسى: مُحَلّمْ ابن جثّامهدر كه، عامر ابن اضبطى غدر ايله قتل ايتمشدى. حالبوكه عامرى رسولِ أكرم عليه الصلاة والسلام اونى جهاد و حرب ايچون قوماندان ايدوب، بر بولوك ايله گوندرمشدى. مُحَلّمْ ده برابردى. بو غدرڭ خبرى، رسولِ أكرم عليه الصلاة والسلامه يتيشديگى وقت حدّت ايتمش.
﴿اَللّٰهُمَّ لَا تَغْفِرْ لِمُحَلِّمِ﴾
دييه بددعا بيورمش. يدى گون صوڭره او مُحَلّمْ ئولدى. قبره قويديلر، قبر طيشارىيه آتدى. قاچ دفعه قويديلرسه ير قبول ايتمدى. صوڭره مجبور اولديلر؛ ايكى طاش اورتهسنده محكمجه بر ديوار ياپيلمش، او صورتده ير آلتنده ستر ايديلمش.
اوچنجيسى: رسولِ أكرم عليه الصلاة والسلام گورييوردى بر آدم صول أليله يمك ير. فرمان ايتمش:
﴿كُلْ بِيَمٖينِكَ﴾
«صاغ ألڭله يه.» ديمش. او آدم ديمش:
﴿لَا اَسْتَطٖيعُ﴾
«صاغ ألمله ياپامييورم.» رسولِ أكرم عليه الصلاة والسلام ديمش:
﴿لَا اسْتَطَعْتَ﴾
دييه بددعا ايتمش. «قالديرهميهجقسڭ.» ايشته اوندن صوڭره او آدم صاغ ألنى هيچ قالديرهمامش.
آلتنجى مثال: رسولِ أكرم عليه الصلاة والسلامڭ هم دعاسى، هم تماسندن ظهور ايدن پك چوق خارقهلرندن، قطعيت كسب ايتمش بر قاچ حادثهيى ذكر ايدهجگز:
برنجيسى: حضرتِ خالد ابن وليده (سيف اللّهه) بر قاچ صاچنى ويروب، نصرتنه دعا ايتمش. حضرتِ خالد، او صاچلرى كلاهنده حفظ ايتمش. ايشته او صاچ و دعانڭ بركتى حرمتنه، هيچ بر حربه گيرمهمش إلاّ مظفّر چيقمش.
ايكنجيسى: سلمانِ فارسى، أوّلجه يهوديلرڭ عبدى ايمش. اونڭ سيّدلرى، اونى آزاد ايتمك ايچون چوق شيلر ايستديلر. «اوچ يوز خرما فداننى ديكوب ميوه ويردكدن صوڭره، قرق اُوقيّه آلتون ويرمكله آزاد ايديليرسڭ» ديديلر. رسولِ أكرم عليه الصلاة والسلامه گلدى، بيانِ حال ايتدى. رسولِ أكرم عليه الصلاة والسلام كندى أليله، مدينه جوارنده اوچ يوز فدانى ديكدى. يالڭز بر دانهسنى باشقهسى ديكدى. او سنه ظرفنده، رسولِ أكرم عليه الصلاة والسلامڭ ديكديگى بتون فدانلر ميوه ويردى. يالڭز بر تك باشقهسى ديكمشدى، او تك ميوه ويرمدى. رسولِ أكرم عليه الصلاة والسلام اونى چيقاردى، يڭيدن ديكدى. او ده ميوه ويردى. هم طاووق يمورطهسى قدر بر آلتونى، آغزينڭ توكروگنى اوڭا سوردى، دعا ايتدى، سلمانه ويردى. ديدى: «گيت يهوديلره وير.» سلمانِ فارسى گيدوب او آلتوندن قرق اوقيّهيى اونلره ويردى؛ او طاووق يمورطهسى قدر اولان آلتون، أسكيسى گبى باقى قالدى. ايشته شو واقعه، حضرتِ سلمانِ پاكڭ سرگذشتۀ حياتنڭ أڭ مهمّ بر حادثۀ معجزهكارانهسيدر. معتبر و موثوق إماملر خبر ويرمشلر.
اوچنجيسى: اُمُّ مالك إسمنده بر صحابيه، «عُكّه» دينيلن كوچك بر ياغ طولومندن، رسولِ أكرم عليه الصلاة والسلامه ياغ هديه ايدردى. بر دفعه رسولِ أكرم عليه الصلاة والسلام اوڭا دعا ايدوب عكّهيى ويرمش؛ فرمان ايتمش كه: «اونى بوشالتوب صيقمايڭز.» اُمُّ مالك عكّهيى آلمش. نه وقت أولادلرى ياغ ايسترلرسه، بركتِ دعاىِ نبوى ايله عكّهده ياغ بولورلردى. خيلى زمان دوام ايتدى. صوڭره صيقديلر، بركت كسيلدى.
يدنجى مثال: رسولِ أكرم عليه الصلاة والسلامڭ دعاسيله و تماسيله، صولرڭ طاتليلاشماسى و گوزل قوقو ويرمهسنڭ چوق حادثهلرى وار. ايكى اوچ دانهيى، نمونه اولارق بيان ايدرز:
برنجيسى: إمامِ بيهقى باشده، أهلِ حديث خبر ويرييورلر كه: بئرِ قُبَا دينيلن قويونڭ صويى بعض كسيلييوردى. يعنى بيتييوردى. رسولِ أكرم عليه الصلاة والسلام آبدست صوينى ايچنه قويوب دعا ايتدكدن صوڭره، كثرتله دوام ايتدى، داها هيچ كسيلمهدى.
ايكنجيسى: باشده أبو نُعيم دلائلِ نبوّتده، أهلِ حديث خبر ويرييورلر كه: أنسڭ أوندهكى قويويه، رسولِ أكرم عليه الصلاة والسلام توكروگنى ايچنه آتوب دعا ايتمش، مدينۀ منوّرهده أڭ طاتلى صو او اولمش.
اوچنجيسى: ابن ماجه خبر ويرييور كه: ماءِ زمزمدن بر قوغه صو، رسولِ أكرم عليه الصلاة والسلامه گتيرديلر. بر پارچه آغزينه آلدى، قوغهيه بوشالتدى. قوغه مسك گبى رايحه ويردى.
دردنجيسى: إمامِ أحمد ابن حنبل خبر ويرييور كه: بر قويودن، بر قوغه صو چيقارديلر. رسولِ أكرم عليه الصلاة والسلام ايچنه آغزينڭ صوينى آقيتوب قويويه بوشالتدقدن صوڭره، مسك گبى رايحه ويرمگه باشلادى.
بشنجيسى: رجال اللّهدن و إمامِ مسلم و علماءِ مغربڭ معتمدى و مقبولى اولان حمّاد ابن سلمه خبر ويرييور كه: رسولِ أكرم عليه الصلاة والسلام دريدن بر طولوغه صو طولديروب آغزينه اوفلهمش، دعا ايتمش. باغلادى، بر قسم صحابهيه ويردى. «آغزينى آچمايڭز! يالڭز آبدست آلديغڭز وقت آچيڭز.» ديمش. گيتمشلر، آبدست آلمق وقتنده آغزينى آچمشلر. گورويورلر كه، خالص بر سوت، آغزنده ده قايماق ياغ. ايشته بو بش جزئى؛ بعضلرى مشهور، بعض ده مهمّ إماملر نقل ايدييورلر. بونلر و بوراده نقل ايديلمهينلرله مجموعى؛ معنوى تواتر گبى بر معجزۀ مطلقهنڭ تحقّقنى گوسترييورلر.
سكزنجى مثال: رسولِ أكرم عليه الصلاة والسلامڭ مسح و دعاسيله، سوتسز و قيصير كچيلرڭ مبارك ألينڭ تماسيله و دعاسيله سوتلى، هم چوق سوتلى اولمالرى مثاللرى و جزئياتلرى چوقدر. بز يالڭز مشهور و قطعى ايكى اوچ مثالى، نمونه اولارق ذكر ايدييورز:
برنجيسى: أهلِ سِيَرڭ بتون معتبر كتابلرى خبر ويرييورلر كه: رسولِ أكرم عليه الصلاة والسلام، أبو بكر الصدّيق ايله برابر هجرت ايدركن، عَاتِكة بِنت الخُزَاعيه دينيلن اُمُّ معبد خانهسنه گلمشلر. غايت ضعيف، سوتسز، قيصير بر كچى اوراده واردى. رسولِ أكرم عليه الصلاة والسلام، اُمُّ معبده فرمان ايتدى: «بونده سوت يوق ميدر؟» اُمُّ معبد ديمش كه: «بونڭ وجودنده قان يوقدر، نرهدن سوت ويرهجك؟» رسولِ أكرم عليه الصلاة والسلام گيدوب او كچىنڭ بلنه ألنى سورمش، ممهسنى ده مسح ايتمش، دعا ايتمش. صوڭره ديمش: «قاب گتيريڭز، صاغڭز!» صاغديلر. رسولِ أكرم عليه الصلاة والسلام، أبو بكر الصدّيق ايله ايچدكدن صوڭره، او خانه خلقى ده طويونجيه قدر ايچمشلر. او كچى قوّتلنمش، اويله ده مبارك قالمش.
ايكنجيسى: شاةِ ابن مسعودڭ مشهور قصّهسيدر كه: ابن مسعود إسلام اولمادن أوّل، بعضلرڭ چوبانى ايدى. رسولِ أكرم عليه الصلاة والسلام أبو بكر الصدّيق ايله برابر، ابن مسعودڭ كچيلرى ايله بولونديغى يره گيتمشلر. رسولِ أكرم عليه الصلاة والسلام، ابن مسعوددن سوت ايستهمش. او ده ديمش: «كچيلر بنم دگل، باشقهسنڭ ماليدرلر.» رسولِ أكرم عليه الصلاة والسلام ديمش: «قيصير، سوتسز بر كچى بڭا گتير.» او ده ايكى سنهدر تكه گورمهمش بر كچى گتيردى. رسولِ أكرم عليه الصلاة والسلام أليله اونڭ ممهسنه مسح ايدوب دعا ايتمش. صوڭره صاغمشلر، خالص بر سوت آلمشلر، ايچمشلر. ابن مسعود بو معجزهيى گوردكدن صوڭره ايمان ايتمش.
اوچنجيسى: رسولِ أكرم عليه الصلاة والسلامڭ مرضعهسى يعنى سوت آننهسى اولان حليمۀِ سعديهنڭ كچيلرينڭ قصّۀِ مشهورهسيدر كه؛ او قبيلهده بر درجه قحطلق واردى. حيوانات ضعيف و سوتسز اولويورديلر و طوق اولونجهيه قدر يمييورلردى. رسولِ أكرم عليه الصلاة والسلام اورايه، سوت آننهسنڭ ياننه گوندرلديگى زمان، اونڭ بركتيله، حليمۀِ سعديهنڭ كچيلرى، آقشام وقتى باشقهلرينڭ خلافنه اولارق، هم طوق و ممهلرى طولو اولارق گلييورلردى. ايشته بونڭ گبى سِيَر كتابلرنده داها باشقه جزئياتلرى وار؛ فقط بو نمونهلر، أصل مقصده كافيدر.
طوقوزنجى مثال: رسولِ أكرم عليه الصلاة والسلام، بعض ذاتلرڭ باشنى و يوزينى مبارك أليله مسح ايدوب دعا ايتدكدن صوڭره، ظاهر اولان خارقهلرڭ چوق جزئياتندن إشتهار بولمش بر قاچنى نمونه اولارق بيان ايدييورز:
برنجيسى: عُمَير ابن سعدڭ باشنه ألنى سورمش، دعا ايتمش. سكسان ياشنده او آدم، او دعانڭ بركتيله، ئولديگى وقت باشنده بياض يوقدى.
ايكنجيسى: قيس ابن زيدڭ باشنه ألنى قويوب، مسح ايدوب دعا ايتمش. او دعانڭ بركتيله، يوز ياشنه گيرديگى وقت، مسحڭ تأثيريله، بتون باشى بياض، يالڭز رسولِ أكرم عليه الصلاة والسلامڭ ألنى قويديغى ير سيمسياه اولارق قالمش.
اوچنجيسى: عبد الرحمن ابن زيد ابن الخطّاب هم كوچك، هم چركين ايدى. رسولِ أكرم عليه الصلاة والسلام ألى ايله باشنى مسح ايدوب دعا ايتمش. او دعانڭ بركتيله؛ قامتجه أڭ بالا قامت و صورتجه أڭ گوزل بر صورته گيرمش.
دردنجيسى: عائذ ابن عَمرڭ غزوۀِ حنينده يوزى يارهلانمش. رسولِ أكرم عليه الصلاة والسلام، أليله يوزندهكى قانى سيلمش. رسولِ أكرم عليه الصلاة والسلامڭ ألينڭ تماس ايتديگى ير، پارلاق بر نورانيت ويرمش كه، محدّثلر (كَغُرَّةِ الْفَرَسِ) تعبير ايتمشلر. يعنى، طورو آتڭ آلنندهكى بياض گبى، تماس يرى اويله پارلايوردى.
بشنجيسى: قتاده ابن ملحانڭ يوزينه ألنى سورمش، دعا ايتمش. قتادهنڭ يوزى آيينه گبى پارلامغه باشلامش.
آلتنجيسى: اُمُّ المؤمنين اُمُّ سلمهنڭ قيزى و رسولِ أكرم عليه الصلاة والسلامڭ اووگى قيزى زينبه، كوچك ايكن رسولِ أكرم عليه الصلاة والسلام اونڭ يوزينه آبدست صويى آتوب تلطيف ايتمش. او صويڭ تماسندن صوڭره، زينبڭ حسن و جمالى عجيب صورت آلمش، بديع الجمال اولمش.
ايشته شو جزئياتلر گبى داها چوق مثاللر وار. اونلرڭ چوغنى أئمّۀِ حديث نقل ايتمشلر. بو جزئياتڭ هر برينى، خبرِ واحد و ضعيف فرض ايتسهك دخى، ينه مجموعى معنوى بر تواتر حكمنده، مطلق بر معجزۀِ أحمديه عليه الصلاة والسلامى گوسترر. چونكه بر حادثه، آيرى آيرى و چوق صورتلرله نقل ايديلسه، أصل حادثهنڭ وقوعى قطعى اولور. صورتلرڭ هر برى ضعيف دخى اولسه، ينه أصل حادثهيى إثبات ايدييور.
مثلا: بر گورولتى ايشيدلدى. بعضلر ديديلر كه، فلان أو خراب اولدى؛ ديگرى، باشقه أو خراب اولدى ديدى؛ داها باشقهسى، باشقه بر أوى سويلهدى و هكذا... هر بر روايت، خبرِ واحد ده، ضعيف ده، خلافِ واقع ده اولابيلير. فقط أصل واقعه كه: بر أو خراب اولمش، او قطعيدر؛ اونده بتون متّفقدرلر. حالبوكه بحث ايتديگمز شو آلتى جزئيات؛ هم صحيحدرلر، هم بعضلرى شهرت درجهسنه چيقمشلر. فرضا بونلرڭ هر برينى ضعيف عدّ ايتسهك، تمثيلده مطلق بر خانه خراب اولماسى گبى، ينه جزئياتڭ مجموعنده، مطلق بر معجزۀِ أحمديه عليه الصلاة والسلامڭ وجودينى قطعيًا گوسترر.
ايشته رسولِ أكرم عليه الصلاة والسلامڭ معجزاتِ باهرهسى، هر بر نوعده قطعى اولارق موجوددر. جزئياتى دخى، او كلّى و مطلق معجزهنڭ صورتلرى وياخود نمونهلريدر. رسولِ أكرم عليه الصلاة والسلامڭ ناصلكه ألى، پارمقلرى، توكروگى، نَفَسى، سوزى يعنى دعاسى چوق معجزاتڭ مبدئى اولويور. عينًا اويله ده، رسولِ أكرم عليه الصلاة والسلامڭ سائر لطائفى و طويغولرى و جهازاتى، چوق خارقهلره مداردر. كتبِ سِيَر و تاريخ، او خارقهلرى بيان ايتمشلر؛ سيرت و صورت و طويغولرنده، چوق دلائلِ نبوّت بولونديغنى گوسترمشلر.