يگرمى دردنجى مكتوبڭ ايكنجى ذيلى
(معراجِ نبوى حقّندهدر)
﴿بِاسْمِهٖ وَاِنْ مِنْ شَىْءٍ اِلَّا يُسَبِّحُ بِحَمْدِهٖ﴾
﴿بِسْمِ اللّٰهِ الرَّحْمٰنِ الرَّحٖيمِ﴾
﴿وَلَقَدْ رَاٰهُ نَزْلَةً اُخْرٰى ۞ عِنْدَ سِدْرَةِ الْمُنْتَهٰى ۞ عِنْدَهَا جَنَّةُ الْمَاْوٰى
۞ اِذْ يَغْشَى السِّدْرَةَ مَا يَغْشٰى ۞ مَا زَاغَ الْبَصَرُ وَمَا طَغٰى ۞
لَقَدْ رَاٰى مِنْ اٰيَاتِ رَبِّهِ الْكُبْرٰى﴾
(مولدِ نبوينڭ معراجيه قسمنده بش نكتهيى بيان ايدهجگز.)
برنجى نكته: جنّتدن گتيريلن براقه دائر، مولد يازان سليمان أفندى حزين بر عشق ماجراسنى بيان ايدييور. او ذات أهلِ ولايت اولديغى و روايته بنا ايتديگى ايچون، ألبته بر حقيقتى او صورتله إفاده ايدييور. حقيقت شو اولمق گركدر كه:
عالمِ بقانڭ مخلوقلرى، رسولِ أكرم عليه الصلاة والسلامڭ نوريله پك علاقهداردرلر. چونكه اونڭ گتيرديگى نور ايلهدر كه؛ جنّت و دارِ آخرت، جنّ و إنس ايله شنلنهجك. أگر او اولماسه ايدى، او سعادتِ أبديه اولمازدى و جنّتڭ هر نوع مخلوقاتندن إستفادهيه مستعد اولان جنّ و إنس، جنّتى شنلنديرميهجكلردى؛ بر جهتده صاحبسز ويرانه قالاجقدى.
يگرمى دردنجى سوزڭ دردنجى دالنده بيان ايديلديگى گبى: ناصلكه بلبلڭ گله قارشى داستانۀِ عشقى؛ طائفۀِ حيواناتڭ، طائفۀِ نباتاته درجۀِ عشقه بالغ اولان إحتياجاتِ شديدۀِ عشقنُمايى، رحمت خزينهسندن گلن و حيواناتڭ أرزاقلرينى طاشييان قافلۀِ نباتاته قارشى إعلان ايتمك ايچون، بر خطيبِ ربّانى اولارق، باشده بلبلِ گُل و هر نوعدن بر نوع بلبل إنتخاب ايديلمش و اونلرڭ نغماتى دخى، نباتاتڭ أڭ گوزللرينڭ باشلرنده خوش آمدى نوعندن تسبيحكارانه بر حسنِ إستقبالدر، بر آلقيشلامهدر.
عينًا بونڭ گبى: سببِ خلقتِ أفلاك و وسيلۀِ سعادتِ داريْن و حبيبِ ربّ العالمين اولان ذاتِ محمّدِ عربى عليه الصلاة والسلامه قارشى، ناصلكه ملائكه نوعندن حضرتِ جبرائيل عليه السلام كمالِ محبّتله خدمتكارلق ايدييور؛ ملائكهلرڭ حضرتِ آدم عليه السلامه إنقياد و إطاعتنى و سرِّ سجودينى گوسترييور؛ اويله ده أهلِ جنّتڭ، حتّى جنّتڭ حيوانات قسمنڭ دخى، او ذاته قارشى علاقهلرى، بينديگى براقڭ حسّياتِ عاشقانهسيله إفاده ايديلمشدر.
ايكنجى نكته: معراجِ نبويهدهكى ماجرالردن بريسى: جنابِ حقّڭ رسولِ أكرم عليه الصلاة والسلامه قارشى محبّتِ منزّههسى، «سڭا عاشق اولمشم» تعبيريله إفاده ايديلمش. شو تعبيرات، واجب الوجودڭ قدسيتنه و إستغناءِ ذاتيسنه، معناىِ عُرفى ايله مناسب دوشمييور. مادام سليمان أفندينڭ مولدى، رغبتِ عامّهيه مظهريتى دلالتيله؛ او ذات أهلِ ولايتدر و أهلِ حقيقتدر، ألبته إرائه ايتديگى معنا صحيحدر. معنا ده بودر كه:
ذاتِ واجب الوجودڭ حدسز جمال و كمالى واردر. چونكه بتون كائناتڭ أقسامنه إنقسام ايتمش اولان جمال و كمالڭ بتون أنواعى، اونڭ جمال و كمالنڭ أمارهلرى، إشارتلرى، آيتلريدر.
ايشته هر حالده جمال و كمال صاحبى، بِالبداهه جمال و كمالنى سومهسى گبى، ذاتِ ذو الجلال دخى جمالنى پك چوق سَور. هم كندينه لايق بر محبّتله سَور. هم جمالنڭ شعاعاتى اولان أسماسنى دخى سَور. مادام أسماسنى سَور، ألبته أسماسنڭ جمالنى گوسترن صنعتنى سَور. اويله ايسه، جمال و كمالنه آيينه اولان مصنوعاتنى دخى سَور. مادام جمال و كمالنى گوسترنى سَور؛ ألبته جمال و كمالِ أسماسنه إشارت ايدن مخلوقاتنڭ محاسننى سَور. بو بش نوع محبّته، قرآنِ حكيم آياتيله إشارت ايدييور.
ايشته رسولِ أكرم عليه الصلاة والسلام، مادام مصنوعات ايچنده أڭ مكمّل فرددر و مخلوقات ايچنده أڭ ممتاز شخصيتدر.
هم صنعتِ إلٰهيهيى، بر ولولۀِ ذكر و تسبيح ايله تشهير ايدييور و إستحسان ايدييور.
هم أسماءِ إلٰهيهدهكى جمال و كمال خزينهلرينى، لسانِ قرآن ايله آچمشدر.
هم كائناتڭ آياتِ تكوينيهسنڭ، صانعنڭ كمالنه دلالتلرينى، پارلاق و قطعى بر صورتده لسانِ قرآنله بيان ايدييور.
هم كلّى عبوديتيله، ربوبيتِ إلٰهيهيه آيينهدارلق ايدييور.
هم ماهيتنڭ جامعيتيله بتون أسماءِ إلٰهيهيه بر مظهرِ أتمّ اولمشدر.
ألبته بونڭ ايچون دينيلهبيلير كه: جميلِ ذو الجلال، كندى جمالنى سومسيله، او جمالڭ أڭ مكمّل آيينۀِ ذىشعورى اولان محمّدِ عربى عليه الصلاة والسلامى سَور.
هم كندى أسماسنى سومسيله، او أسمانڭ أڭ پارلاق آيينهسى اولان محمّدِ عربى عليه الصلاة والسلامى سَور و محمّدِ عربى عليه الصلاة والسلامه بڭزهينلرى دخى درجهلرينه گوره سَور.
هم صنعتنى سَوْديگى ايچون، ألبته اونڭ صنعتنى أڭ يوكسك بر صدا ايله بتون كائناتده نشر ايدن و سماواتڭ قولاغنى چينلاتان، برّ و بحرى جذبهيه گتيرن بر ولولۀِ ذكر و تسبيح ايله إعلان ايدن محمّدِ عربى عليه الصلاة والسلامى سَور و اوڭا إتّباع ايدنلرى ده سَور.
هم مصنوعاتنى سَوْديگى ايچون، او مصنوعاتڭ أڭ مكمّلى اولان ذىحياتى و ذىحياتڭ أڭ مكمّلى اولان ذىشعورى و ذىشعورڭ أڭ أفضلى اولان إنسانلرى و إنسانلرڭ بِالإتّفاق أڭ مكمّلى اولان محمّدِ عربى عليه الصلاة والسلامى ألبته داها زياده سَور.
هم كندى مخلوقاتنڭ محاسنِ أخلاقيهلرينى سَوْديگى ايچون، محاسنِ أخلاقيهده بِالإتّفاق أڭ يوكسك مرتبهده بولونان محمّدِ عربى عليه الصلاة والسلامى سَور و درجاته گوره، اوڭا بڭزهينلرى دخى سَور. ديمك جنابِ حقّڭ رحمتى گبى، محبّتى دخى كائناتى إحاطه ايتمش.
ايشته او حدسز محبوبلر ايچندهكى مذكور بش وجهنڭ هر بر وجهنده أڭ يوكسك مقام، محمّدِ عربى عليه الصلاة والسلامه مخصوصدر كه، «حبيب اللّٰه» لقبى اوڭا ويريلمش.
ايشته بو أڭ يوكسك مقامِ محبوبيتى، سليمان أفندى «بن سڭا عاشق اولمشم» تعبيريله بيان ايتمشدر. شو تعبير، بر مرصادِ تفكّردر، غايت اوزاقدن اوزاغه بو حقيقته بر إشارتدر. بونڭله برابر مادام بو تعبير، شأنِ ربوبيته مناسب اولميان معنايى خياله گتيرييور؛ أڭ اييسى، شو تعبير يرينه: «بن سندن راضى اولمشم» دينيلملى.
اوچنجى نكته: معراجيهدهكى ماجرالر، معلوممز اولان معنالرله، او قدسى و نزيه حقيقتلرى إفاده ايدهمييور. بلكه او محاورهلر؛ برر عنوانِ ملاحظهدر، برر مرصادِ تفكّردر و علوى و درين حقائقه برر إشارتدر و ايمانڭ بر قسم حقائقنه برر إخطاردر و قابلِ تعبير اولميان بعض معنالره برر كنايهدر. يوقسه، معلوممز اولان معنالر ايله بر ماجرا دگل. بز، خيالمز ايله او محاورهلردن او حقيقتلرى آلامايز؛ بلكه قلبمزله هيجانلى بر ذوقِ ايمانى و نورانى بر نشئۀِ روحانى آلابيليرز. چونكه ناصل جناب حقّڭ ذات و صفاتنده نظير و شبيه و مِثلى يوقدر؛ اويله ده شئوناتِ ربوبيتنده مِثلى يوقدر. صفاتى ناصل مخلوقات صفاتنه بڭزهمييور، محبّتى دخى بڭزهمز. اويله ايسه شو تعبيراتى، متشابهات نوعندن طوتوب ديرز كه: ذاتِ واجب الوجودڭ وجوبِ وجودينه و قدسيتنه مناسب بر طرزده و إستغناءِ ذاتيسنه و كمالِ مطلقنه موافق بر صورتده، محبّتى گبى بعض شئوناتى وار كه، معراجيه ماجراسيله اونى إخطار ايدييور. معراجِ نبويهيه دائر اوتوز برنجى سوز، حقائقِ معراجيهيى اصولِ ايمانيه دائرهسنده ايضاح ايتمشدر. اوڭا إكتفاءً بوراده إختصار ايدييورز.
دردنجى نكته: «يتمش بيڭ پرده آرقهسنده جنابِ حقّى گورمش» تعبيرى، بعديتِ مكانى إفاده ايدييور. حالبوكه واجب الوجود مكاندن منزّهدر، هر شيئه هر شيدن داها ياقيندر. بو نه ديمكدر؟
الجواب: اوتوز برنجى سوزده مفصّلًا، برهانلريله او حقيقت بيان ايديلمشدر. بوراده يالڭز شو قدر ديرز كه:
جنابِ حق بزه غايت قريبدر، بز اوندن غايت درجهده اوزاغز. ناصلكه گونش، ألمزدهكى آيينه واسطهسيله بزه غايت ياقيندر و يرده هر بر شفّاف شى، كندينه بر نوع عرش و بر چشيد منزل اولور. أگر گونشڭ شعورى اولسه ايدى، بزمله آيينهمز واسطهسيله مخابره ايدردى. فقط بز اوندن درت بيڭ سنه اوزاغز. بِلا تشبيه ولا تمثيل؛ شمسِ أزلى، هر شيئه هر شيدن داها ياقيندر. چونكه واجب الوجوددر، مكاندن منزّهدر. هيچ بر شى اوڭا پرده اولاماز. فقط هر شى نهايت درجهده اوندن اوزاقدر.
ايشته معراجڭ اوزون مسافهسيله،
﴿وَنَحْنُ اَقْرَبُ اِلَيْهِ مِنْ حَبْلِ الْوَرٖيدِ﴾
ڭ إفاده ايتديگى مسافهسزلگڭ سرّيله؛ هم رسولِ أكرم عليه الصلاة والسلامڭ گيتمهسنده، چوق مسافهيى طىّ ايدهرك گيتمهسى و آنِ واحدده يرينه گلمهسى سرّى، بوندن ايلرى گلييور. رسولِ أكرم عليه الصلاة والسلامڭ معراجى، اونڭ سير و سلوكيدر، اونڭ عنوانِ ولايتيدر. أهلِ ولايت ناصلكه سير و سلوكِ روحانى ايله، قرق گوندن تا قرق سنهيه قدر بر ترقّى ايله، درجاتِ ايمانيهنڭ حقّ اليقين درجهسنه چيقييور.
اويله ده: بتون أوليانڭ سلطانى اولان رسولِ أكرم عليه الصلاة والسلام؛ دگل يالڭز قلبى و روحى ايله، بلكه هم جسميله، هم حواسّيله، هم لطائفيله، قرق سنهيه مقابل قرق دقيقهده، ولايتنڭ كرامتِ كبراسى اولان معراجى ايله بر جادّۀِ كبرا آچارق، حقائقِ ايمانيهنڭ أڭ يوكسك مرتبهلرينه گيتمش، معراج نردبانيله عرشه چيقمش، «قاب قوسَيْن» مقامنده، حقائقِ ايمانيهنڭ أڭ بيوگى اولان ايمانِ بِاللّٰه و ايمانِ بِالآخرتى عين اليقين گوزيله مشاهده ايتمش، جنّته گيرمش، سعادتِ أبديهيى گورمش، او معراجڭ قپوسيله آچديغى جادّۀِ كبرايى آچيق بيراقمش، بتون أولياءِ اُمّتى سير و سلوك ايله، درجهلرينه گوره، روحانى و قلبى بر طرزده او معراجڭ گولگهسى ايچنده گيدييورلر.
بشنجى نكته: مولدِ نبوى ايله معراجيهنڭ اوقونماسى، غايت نافع و گوزل عادتدر و مستحسن بر عادتِ إسلاميهدر. بلكه حياتِ إجتماعيۀِ إسلاميهنڭ، غايت لطيف و پارلاق و طاتلى بر مدارِ صحبتيدر. بلكه حقائقِ ايمانيهنڭ إخطارى ايچون، أڭ خوش و شيرين بر درسدر. بلكه ايمانڭ أنوارينى و محبّت اللّٰه و عشقِ نبوىيى گوسترمگه و تحريكه أڭ مهيّج و مؤثّر بر واسطهدر.
جنابِ حق بو عادتى أبده قدر دوام ايتديرسين و سليمان أفندى گبى مولد يازانلره جنابِ حق رحمت ايتسين، يرلرينى جنّت الفردوس ياپسين، آمين...
خاتمه
مادام شو كائناتڭ خالقى، هر نوعده بر فردِ ممتاز و مكمّل و جامع خلق ايدوب، او نوعڭ مدارِ فخرى و كمالى ياپار. ألبته أسماسندهكى إسمِ أعظم تجلّيسيله، بتون كائناته نسبةً ممتاز و مكمّل بر فردى خلق ايدهجك. أسماسنده بر إسمِ أعظم اولديغى گبى، مصنوعاتنده ده بر فردِ أكمل بولونهجق و كائناته منتشر كمالاتى او فردده جمع ايدوب، كندينه مدارِ نظر ايدهجك. او فرد هر حالده ذىحياتدن اولاجقدر. چونكه أنواعِ كائناتڭ أڭ مكمّلى ذىحياتدر. و هر حالده ذىحيات ايچنده او فرد، ذىشعوردن اولاجقدر. چونكه ذىحياتڭ أنواعى ايچنده أڭ مكمّلى ذىشعوردر. و هر حالده او فردِ فريد، إنساندن اولاجقدر. چونكه ذىشعور ايچنده حدسز ترقّياته مستعد، إنساندر. و إنسانلر ايچنده هر حالده او فرد محمّد عليه الصلاة والسلام اولاجقدر. چونكه زمانِ آدمدن شيمدىيه قدر هيچ بر تاريخ، اونڭ گبى بر فردى گوسترهمييور و گوسترهمز. زيرا او ذات كُرۀِ أرضڭ ياريسنى و نوعِ بشرڭ بشدن بريسنى، سلطنتِ معنويهسى آلتنه آلارق، بيڭ اوچ يوز أللى سنه كمالِ حشمتله سلطنتِ معنويهسنى دوام ايتديروب، بتون أهلِ كماله، بتون أنواعِ حقائقده بر «استادِ كلّ» حكمنه گچمش. دوست و دشمنڭ إتّفاقيله، أخلاقِ حسنهنڭ أڭ يوكسك درجهسنه صاحب اولمش. بدايتِ أمرنده، تك باشيله بتون دنيايه ميدان اوقومش. هر دقيقهده يوز ميليوندن زياده إنسانلرڭ وردِ زبانى اولان قرآنِ معجز البيانى گوسترمش بر ذات، ألبته او فردِ ممتازدر، اوندن باشقهسى اولاماز. بو عالمڭ هم چكردگى، هم ميوهسى اودر.
(عَلَيْهِ وَعَلٰى اٰلِهٖ وَصَحْبِهِ الصَّلَاةُ وَالسَّلَامُ بِعَدَدِ اَنْوَاعِ الْكَائِنَاتِ وَمَوْجُودَاتِهَا)
ايشته بويله بر ذاتڭ مولد و معراجنى ديڭلهمك، يعنى ترقّياتنڭ مبدأ و منتهاسنى ايشيتمك، يعنى تاريخچۀِ حياتِ معنويهسنى بيلمك، او ذاتى كندينه رئيس و سيّد و إمام و شفيع تلقّى ايدن مؤمنلره؛ نه قدر ذوقلى، فخرلى، نورلى، نشئهلى، خيرلى بر مُسامرۀِ علويۀِ دينيه اولديغنى آڭلا...
يا ربّ! حبيبِ أكرم (عليه الصلاة والسلام) حرمتنه و إسمِ أعظم حقّنه، شو رسالهيى نشر ايدنلرڭ و رفقاسنڭ قلبلرينى، أنوارِ ايمانيهيه مظهر و قلملرينى أسرارِ قرآنيهيه ناشر أيله و اونلره صراطِ مستقيمده إستقامت وير. آمين.
﴿سُبْحَانَكَ لَا عِلْمَ لَنَٓا اِلَّا مَا عَلَّمْتَنَٓا اِنَّكَ اَنْتَ الْعَلٖيمُ الْحَكٖيمُ﴾
اَلْبَاقٖى هُوَ الْبَاقٖى
سعيد النورسى
* * *