گنجلك سنى بكله يورلر. اونلرى قزانمغه چاليش.» آغلاماسنى گولمگه چويرر. بونلره قياسًا جزئى و كلّى هر بر طائفهده حسنِ تأثيرينى گوسترر، ايشيقلانديرر. نوعِ بشرڭ حياتِ إجتماعيهسيله علاقهدار اولان إجتماعيون و أخلاقيونلرڭ قولاقلرى چينلاسين! ايشته ايمانِ آخرتڭ بيڭلر فائدهلرندن إشارت ايتديگمز بش آلتى نمونهلرينه سائرلرى قياس ايديلسه قطعى آڭلاشيلير كه؛ ايكى جهانڭ و ايكى حياتڭ مدارِ سعادتى يالڭز ايماندر.
رسالۀِ النورده يگرمى سكزنجى سوزده و باشقه رسالهلرنده، حشرڭ جسمانيتى جهتنده گلن ضعيف شبههلره قوّتلى جوابلرينه إكتفاءً بوراده يالڭز بر قيصه إشارتله ديرز كه: أسماءِ إلٰهيهنڭ أڭ جمعيتلى آيينهسى جسمانيتدهدر. و خلقتِ كائناتدهكى مقاصدِ إلٰهيهنڭ أڭ زنگينى و فعّال مركزى جسمانيتدهدر. و إحساناتِ ربّانيهنڭ أڭ چوق چشيدلرى و رنگارنكلرى جسمانيتدهدر. و بشرڭ إحتياجات ديللريله خالقنه