نوعِ إنسانڭ درتدن برينى تشكيل ايدن چوجقلر، آخرت ايمانيله إنسانجه ياشايهبيليرلر و إنسانيتڭ إستعدادلرينى طاشييهبيليرلر. يوقسه أليم أنديشهلر ايچنده، كندينى اويوتديرمق و اونوتديرمق ايچون چوجقجه اويونجقلريله، هايلاز بر حياتله ياشايهجق. چونكه هر وقت أطرافنده اونڭ گبى چوجقلرڭ ئولمهسيله اونڭ نازك دماغنده و ايلريده اوزون آرزولرى طاشييان ضعيف قلبنده و مقاومتسز روحنده اويله بر تأثير ياپار كه؛ حياتى و عقلى او بيچاره يه آلَتِ عذاب و إشكنجه ايدهجگى زمانده، آخرت ايماننڭ درسيله، گورمهمك ايچون اويونجقلر آلتنده اونلردن صاقلانديغى او أنديشهلر يرنده، بر سَوينج و گنيشلك حسّ ايدهرك دير: «بو قارداشم ويا آرقداشم ئولدى، جنّتڭ بر قوشى اولدى. بزدن داها ايى كيف ايدر، گزر. و والدهم ئولدى، فقط رحمتِ إلٰهيهيه گيتدى، ينه بنى جنّتده قوجاغنه آلوب سَوهجك و بن ده او شفقتلى آننهجگمى گورهجگم.» دييه إنسانيته لايق بر طرزده ياشايهبيلير.