يوزينه هجوم ايدر، اوزون عصاسيله وورور، آبِ حيات فشقيرتير، ايچر. هجومدن قاچمقده، أركانِ حرب گبى مهارت گوسترر. عجبا بو كوچك، تجربهسز، يڭى دنيايه گلن مخلوقه بو صنعتى و بو فنِّ حربى و صو چيقارمق صنعتنى كيم اوگرتمش و نرهدن اوگرنمش؟ بن، يعنى بو بيچاره سعيد إعتراف ايدييورم كه: أگر بن او خرطوملى سينگڭ يرنده اولسيدم؛ بو صنعتى و بو كرّ و فرّ حربنى و صو چيقارمق خدمتنى چوق اوزون درسلر و چوق متعدّد تجربهلرله آنجق اوگرنهبيليردم.
ايشته إلهامه مظهر اولان آرى، ئورومجك و يوواسنى چوراب گبى ياپان بلبل گبى حيواناتى بو سينگه قياس ايت. حتّى نباتاتى ده عينًا حيواناته قياس ايدهبيليرسڭ. أوت جوّادِ مطلق (جلّ جلاله)، هر فردِ ذىحياتڭ ألنه لذّت مداديله و إحتياج مركّبيله يازيلمش بر تذكرهيى ويرمش. اونڭله أوامرِ تكوينيهنڭ پروغرامنى و خدمتلرينڭ فهرستهسنى توديع ايتمشدر. باق او حكيمِ ذو الجلاله؛ ناصل كتابِ مبينڭ دستورلرندن آرى وظيفهسنه عائد مقدارينى بر تذكرهده يازمش، آرينڭ باشندهكى صندوقچهيه قويمشدر. او صندوقچهنڭ آناختارى ده، وظيفهپرور آرىيه خاص بر لذّتدر. اونڭله صندوقچهيى آچار، پروغرامنى اوقور، أمرى آڭلار، حركت ايدر.
﴿وَاَوْحٰى رَبُّكَ اِلَى النَّحْلِ﴾
آيتنڭ سرّينى إظهار ايدر. ايشته أگر بو سكزنجى نوطهيى تمامًا ايشيتدڭ و تام آڭلادڭسه، بر حدسِ ايمانى ايله
﴿وَ رَحمتٖى وَسِعَتْ كُلَّ شَيْءٍ﴾
ڭ بر سرّينى،
﴿وَاِنْ مِنْ شَىْءٍ اِلَّا يُسَبِّحُ بِحَمْدِهٖ﴾
نڭ بر حقيقتنى،
﴿اِنَّمَٓا اَمْرُهُٓ اِذَٓا اَرَادَ شَيْئًا اَنْ يَقُولَ لَهُ كُنْ فَيَكُونُ﴾
نڭ بر دستورينى،
﴿فَسُبْحَانَ الَّذٖى بِيَدِهٖ مَلَكُوتُ كُلِّ شَىْءٍ وَاِلَيْهِ تُرْجَعُونَ﴾
نڭ بر نكتهسنى آڭلارسڭ.