نقطهسى اولان خردهبينى بر حوينات كه، چوق دفعه بيولتدكدن صوڭره گورونور. دقّت ايت! ناصل معجزنما، حيرتفزا بر مثالِ مصغّرِ كائناتدر. سورۀِ يٰس، صورتِ لفظِ يٰسده يازيلديغى گبى، جزالتلى، موجز بر نقطۀِ جامعهدر. اونى يازان، بتون كائناتى ده او يازمشدر. أگر إنصاف ايله دقّت ايتسهڭ، شو كوچوجك حيوانڭ و حويناتڭ صورتى آلتنده اولان ماكينۀِ دقيقۀِ بديعۀِ إلٰهيهنڭ شعورسز، كور، مجرا و محركلرى تحديد اولونميان و إمكاناتندن أولويت اولميان أسبابِ بسيطۀ جامدۀ طبيعيهدن حصولنى، محال أندر محال گورهجكسڭ.
أگر هر بر ذرّهده حكما شعورى، أطِبّا حكمتى، حُكّامڭ سياستى بولونديغنى و هر بر ذرّه ده سائر ذرّات ايله واسطهسز مخابره ايتديگنى إعتقاد ايدرسهڭ، بلكه نفسڭى قانديروب او محالى ده إعتقاد ايدهبيليرسڭ. حالبوكه، او ذىحيات ماكينهده اويله بر معجزۀِ قدرت، اويله بر خارقۀِ حكمت واردر كه، آنجق بتون كائناتى، بتون شئوناتنى ايجاد ايدن، تنظيم ايدن بر صانعڭ صنعى اولابيلير. يوقسه كور، آز، بسيط إمكان تردّديله آياق آتاماز. أسبابِ طبيعيدن اولاماز. باخصوص او أسبابِ طبيعيهنڭ اُسّ الأساسى حكمنده اولان جزءِ لايتجزّادهكى قوّۀِ جاذبه و قوّۀِ دافعهنڭ إجتماعلرينڭ خرطومى اوزرنده بر محاليت طامغهسى وار. فقط جائزدر كه، هر بر شيئڭ أساسى ظن ايتدكلرى اولان جذب، دفع، حركت، قوا گبى أمرلر، عادات اللّٰهڭ قانونلرينه برر إسم اولسون. لٰكن قانون، قاعدهلكدن طبيعيلگه و ذهنيلكدن خارجيلگه و إعتباريدن حقيقته و آلَتيتدن مؤثّريته گچمهمك شرطيله قبول ايدرز.
س: أزليتِ مادّه و حركاتِ ذرّاتدن تشكّلِ أنواع گبى امورِ باطلهيه نهدن إحتمال ويريلييور؟