أديانڭ تصديقيله و بتون معجزاتنڭ تأييديله مصدّق اولان بتون أقواليله، وجود و وحدتِ صانعى بشره گوسترييور. ديمك شو دعواده إتّحاد ايتمش بتون أفاضلِ بشر نامنه او نورى گوسترييور. عجبا بو قدر تصديقلره مظهر، بيوك، درين، دوربين، صافى، كسكين، حقائقآشنا بر گوزڭ گورديگى حقيقت، حقيقت اولمامق هيچ إحتمالى وار مى؟
ايكنجى برهان:
كائنات كتابيدر. أوت شو كتابڭ بتون حروفى و بتون نقطهلرى، افرادًا و تركبًا ذاتِ ذو الجلالڭ وجود و وحدتنى، ألسنۀ مخصوصهلرى قرائت ايله (وَاِنْ مِنْ شَىْءٍ اِلَّا يُسَبِّحُ بِحَمْدِهٖ) يى تلاوت ايدييورلر. جميع ذرّاتِ كائنات برر برر ذات و صفات و سائره وجوه ايله حدسز إمكانات مابيْننده متردّد ايكن؛ بردن بره بر جهتى تعقيب، معيّن بر صفتله إتّصاف، مخصوص بر كيفيتله تكيّف ايدهرك حَيْرَتبَخْشَا حِكَمِى إنتاج ايتديگندن، صانعڭ وجوبِ وجودينه شهادتله عوالمِ غيبيهنڭ أنموذجى اولان لطيفۀِ ربّانيه ايچنده إعلانِ صانع ايدن مصباحِ ايمانى ايشيقلانديرييورلر. أوت بر نفر، نفسنده و طاقمنده و بولوكده، طابورده و اوردوده گبى؛ هر بر ذرّه ده، كندى باشيله ذات، صفات، كيفيتندهكى إمكانات جهتيله صانعى إعلان ايتديگى گبى، تصاويرِ متداخلهيه بڭزهين مركّباتِ متشابكۀِ متصاعدۀِ كائناتڭ هر بر مقامنده و هر بر نسبتنده و هر بر دائرهسنده، هر بر ذرّه، موازنۀِ جريانِ عمومىيى محافظه؛ و هر نسبتنده و هر طاقمنده آيرى آيرى وظيفهيى ايفا و حكمتى إنتاج ايتدكلرندن صانعڭ قصد و حكمتنى إظهار و وجود و وحدتنڭ آياتنى قرائت ايتدكلرى ايچون صانعِ ذو الجلالڭ براهينى، ذرّاتدن قات قات زياده اولور. ديمك (اَلطُّرُقُ اِلَى اللّٰهِ بِعَدَدِ اَنْفَاسِ الْخَلَائِقِ) حقيقتدر، مبالغه دگل؛ بلكه ناقصدر.