قريبدر كه، همان همان، ديريلن أوّلكينڭ نه عينى و نه غيريدر، دينيلهبيلير. هر نه ايسه مِثليت، عينيت موضوعِ بحث دگلدر. هر ناصل اولورسه اولسون، او حشر نشرلر بشرڭ سهولتِ حشرينه دلالت ايتدكلرى گبى، بشرڭ حشرينه برر مثال و برر ئورنك اولابيليرلر.
ايشته بربرينه مخالف نهايت درجهده قاريشق اولان او أنواعِ كثيرهيى كمالِ إمتياز ايله إحيا ايتمك و خطاسز، خلطسز، غلطسز اولارق ممتازانه إعاده ايتمك نهايتسز بر قدرته و محيط بر علمه صاحب اولان ذاتِ ذو الجلالڭ خاتمِ خاص و سكّۀِ مخصوصهسيدر.
و كذا سطحِ أرض صحيفهسنده قصورسز، نقصانسز، سهوسز كمالِ إنتظامله اوچ يوز بيڭدن فضله رسالهلرى يازمق، اويله بر ذاتڭ سكّۀِ مخصوصهسيدر كه، هر شيئڭ ايچ يوزى، هر شيئڭ كليدى اونڭ ألندهدر. و هيچ بر شى اونڭ توجّهنى باشقهسندن چويروب كنديسنه حصر ايدهمز.
خلاصه: سطحِ أرضده آلتى آى ظرفنده، بشرڭ حشرينى تمثيل ايدن او صاييسز حشر و نشرلرده گورونن ربوبيتڭ او تصرّفِ عظيمنده پك يوكسك، بيوك و اينجه نقشلى بر خاتمى واردر. مخلوقاتڭ ايجادنده گورونن شو إنتظاملر، سهولتلر، سرعتلر، إمتيازلر هپ او خاتمڭ پاريلتيسندن ميدانه گلييورلر. أوت هر بهار موسمنده پك حكيمانه، بصيرانه، كريمانه فعاليتلر باشلار و خارق العاده صنعتلر ياپيلير. و بتون بو عمليات، كمالِ سرعتله، سهولتله منتظمًا جريان ايتمكده اولديغى گورونور.
ايشته، بو خارق العاده فعاليتلر اويله بر ذاتڭ خاتميدر كه، هيچ بر مكانده اولماديغى حالده، هر مكانده علم و قدرتيله حاضر و ناظردر.