و كذا ضياسز گونشڭ وجودى ممكن اولماديغى گبى، الوهيت ده تظاهرسز اولاماز. تظاهرى ايسه، إرسالِ رسل ايله اولور. و كذا حدِّ كماله بالغ اولان أڭ يوكسك بر جمالڭ بيلينمسى، گورونمسى، گوستريلمسى ايچون رسوللرڭ تعريفى لازمدر.
و كذا كمالِ جماله بالغ اولان كمالِ حسنِ صنعت، رسوللرڭ دلالتيله اولور.
و كذا ربوبيتِ عامّه، عبوديتِ كلّيه ايستر. بو ده ذو الجناحيْن رسوللرڭ وحدتِ إلٰهيهيى خلقه إعلان ايتمهلرى ايله ممكن اولور.
و كذا بر حسن صاحبنڭ ايستگى اولماسه و بر آيينه بولونماسه و تعريف ايديجى بر شخص توسّط ايتمزسه، اونڭ حُسننڭ گورونمسى، گوستريلمسى ممكن دگلدر. بو ده آنجق رسوللر واسطهسيله اولور. چونكه رسول، عبوديتيله خالقڭ حُسننه آيينهدر؛ رسالتى جهتيله ده خلقه إظهار و إعلان ايدر.
و كذا بر ذاتڭ جواهرله، ذىقيمت أشيا ايله طولو خزينهلرينى آچوب خلقه گوسترمك و عرض ايتمكله او ذاتڭ قدرتنى، زنگينلگنى، سلطنتنى إعلان ايتمك ايچون آنجق او ذاتڭ مساعدهسيله و إرادهسيله أمر و تعيين ايديلمش بر مأمور لازمدر. ايشته او مأمور رسولدر.
آرقداش! بو صفتلرى حائز، بو وظيفهلرى أڭ مكمّل گورهبيلهجك حضرتِ محمّد عليه الصلاة والسلامدن باشقه عالمده بر شخص يوقدر. أڭ جامع، أڭ كامل، أڭ فاضل او ذاتدر. تام تامنه تشهير، تبليغ، تعريف، توصيف، إظهار، إعلان ايدن او ذاتدر.
عزيز قارداش! «ايمانِ بِاللّٰه» ايله «آخرت ايمانى» آراسندهكى تلازمه گلدك. حاضر اول، ديڭله!