اوچنجى خستهلق: «غرور»در.
أوت غرور ايله إنسان مادّى و معنوى كمالات و محاسندن محروم قالير. أگر غرور سائقهسيله باشقهلرڭ كمالاتنه تنزّل ايتمهيوب، كندى كمالاتنى كافى و يوكسك گورورسه، او إنسان ناقصدر. بويله إنسانلر، معلومات و كشفياتلرينى داها يوكسك گورمكله، أسلافِ عظامڭ إرشادات و كشفياتلرندن محروم قاليرلر. و أوهامه معروض قالارق بتون بتون چيزگيدن چيقارلر. حالبوكه أسلافِ عظامڭ قرق گونده ياپدقلرى بر كشفياتى، بونلر قرق سنهده بولامازلر.
دردنجى خستهلق: «سوءِ ظن»در.
أوت إنسان حسنِ ظنّه مأموردر. إنسان، هركسى كنديسندن اوستون بيلمهليدر. كنديسنده بولونان سوءِ أخلاقى، سوءِ ظن سائقهسيله باشقهلره تشميل ايتمهسين. و باشقهلرڭ بعض حركاتنى، حكمتنى بيلمديگندن، تقبيح ايتمهسين. بناءً عليه أسلافِ عظامڭ حكمتنى بيلمديگمز بعض حاللرينى بگنمهمك، سوءِ ظندر. سوءِ ظن ايسه، مادّى و معنوى إجتماعياتى زدهلر.
آرقداش! تحت الأرض ياپديغم خيالى بر سياحتده گورديگم بعض حقيقتلرى ذكر ايدهجگم:
برنجى حقيقت:
آرقداش! مالكِ حقيقيدن غفلت، نفسڭ فرعونلغنه سبب اولور. أوت تحتِ تصرّفنده بولونان بتون أشيانڭ مالكِ حقيقيسنى اونوتان، كنديسنى كنديسنه مالك ظن ايدهرك حاكميت توهّمنده بولونور. و باشقهلرى ده، بِالخاصّه أسبابى كنديسنه قياس ايله، حاكم و مالك دفترينه قيد ايدر. و بو وسيله ايله، اللّٰهڭ ملكنى، مالنى كنديلرينه تقسيم ايدهرك أحكامِ إلٰهيهيه قارشى معارضه و مبارزهيه باشلار.