ايكنجيسى: هر شيده قابليتنڭ لياقتنه گوره بر كمالِ إتقان واردر. أڭ عادى، كوچك نباتى و حيوانى بر شيده كور گوزلر بيله گوردكلرى اويله بر آنتيقه أثرِ صنعت واردر كه، إنسانلرى حيرتده بيراقير.
اوچنجيسى: هر شيئڭ ايجاد و إنشاسندهكى سهولتدر. گوزله گورونن صنعتدهكى سهولت إثباته، دليله محتاج دگلدر.
إعلم أيّها العزيز! كُرۀِ أرض مغازهسندن مأكولات و مشروبات و لباس و سائر إحتياجلريڭزى تأمين ايدييورسڭز. پارهسز آلديغڭز بو ماللرى إلٰهى خزينهدن آلمايوب برر برر أسبابه ياپديراجق اولورسهڭز، عجبا بر نار دانهسنى نه قدر زمانلرده ألده ايدوب، نه قدر بهالى آلاجقسڭز؟ چونكه او نار، بتون أشيا ايله علاقهداردر. آز بر زمانده، آز بر قيمتله حصوله گلمهسى إمكان خارجيدر. و عين زمانده اوندهكى زينت، إنتظام، صنعت، رايحه، طات و قوقو گبى لطيف شيلردن آڭلاشيلييور كه، او نار دانهسى اويله بر صانعڭ مصنوعيدر كه، ايجادنده كلفت و مباشرت يوقدر.
مسئله بويله اولديغى حالده، حشراتڭ ذوق و هوسلرينى تطمين ايچون هر بر نقطهسنده بيڭ درلو إعجاز نكتهلرى بولونان او كُرۀِ أرض مغازهسندهكى أشيانڭ صانعى يا شعورسز، حسسز، إرادهسز، علمسز، إختيارسز، كمالسزدر كه، بو قدر بول ذىقيمت آنتيقه أشيايى پارهسز طاغيتييور. بو باطل إحتمال، إثباته محتاج اولميان بديهى بر حقيقتدر. ويا او خزينه صاحبى او خزينهيى آخرته گيتمك اوزره گلوب موقّةً قالان إنسانلره إلٰهى و رحمانى بر سفره اولارق ياراتمشدر. او خزينۀِ غيبده أشيانڭ ايجادى «كُنْ» أمرى ايله باغليدر. و بتون أشيانڭ ملكوتيتلرى سانترال گبى حكيم، قدير، مريد، عليم بر واجب الوجودڭ يدِ قدرتندهدر.