بر شى وار ميدر؟ أوت معرفت اللّٰه اولدقدن صوڭره، دنيا لذّتلرينه إشتها اولماديغى گبى جنّته بيله إشتياق گرى قالير.
إعلم أيّها العزيز! دنياده جريان ايدن و حصوله گلن هر بر شيئڭ ايكى وجهى واردر. برى آخرته باقار كه، نفس الأمرده أڭ ثابت، أڭ آغير بو وجهدر. ايكنجيسى دنيايه، نفسنه، هوايه باقار. بو وجه، حقارت، خفّت و زوالدن اويله بر موقعدهدر كه، قلبڭ تأثّرينه، تألّمنه، إضطرابنه، دوشونجهلرينه باعث اولاجق بر قيمتده دگلدر.
إعلم أيّها العزيز! إنسانلرڭ اويله أبلهلرى واردر كه، شفّاف بر ذرّهده شمسڭ تمثالنى ويا بر چيچگڭ رنگنده شمسڭ تجلّيسنى گورسه؛ شمسڭ او تمثال و تجلّيسندن، حقيقى شمسڭ بتون لوازماتنى، حتّى عالمه مركز اولماسنى و سيّاراته اولان جذبنى طلب ايدوب ايسترلر. مع هذا، او ذرّهده ويا او چيچكده گورديگى تمثال و تجلّينڭ بر عارضهدن طولايى غائب اولدقلرى زمان، بصر و بصيرتنڭ كورلگى طولاييسيله حقيقى شمسڭ إنكارينه ذهاب ايدرلر. و كذا او أبلهلر تجلّى ايله حصوله گلن وجودِ ظلّىيى، وجودِ حقيقى و أصليدن فرق ايدهمزلر، بربريله إلتباس ايدرلر. بونڭ ايچون، بر شيده شمسڭ تمثالنى، گولگهسنى گوردكلرى زمان شمسڭ حرارتنى، ضياسنى و سائر خصوصياتنى ده ايستهمگه باشلارلر.
و كذا او أبلهلر سينك، بوجك و سائر كوچك و خسيس شيلره باقاركن، اونلرده پك يوكسك بر أثرِ صنعت و حكمت گورمكله، ديرلر: «صانع بونلره پك فضله أهمّيت ويرمشدر. بر سينگڭ نه قيمتى اولابيلير كه بو قدر مصرفلره، كلفتلره محل اولسون؟»