جماداته باقديغڭ زمان عظمت و قدرتى، قصديڭه هدف ياپ. باشقه إسملرڭ تجلّياتنى تبعًا دوشون. حيواناته باقاركن مرحمت قصديله باق. سائر تجلّياته تبعى بر نظر ايله باق.
إعلم أيّها العزيز! قرآنِ كريم بتون إنسانلره رحمتدر. چونكه هر بر إنسانڭ شو حقيقى عالمدن كنديسنه مخصوص خيالى بر عالمى اولديغى گبى، هركس كندى مشربنه گوره قرآندن فهم و إقتباس ايتديگى (حافظهسنده) كنديسنه خاص بر قرآن واردر كه، اونڭ روحنى تربيه، قلبنى تداوى ايدر.
و كذا قرآنِ كريمڭ بر مزيتى شودر كه: بتون علما و أهلِ مشرب گبى هركس هدايتى ايچون، شفاسى ايچون متعدّد سورهلردن آيرى آيرى آيتلرى أخذ ايدهبيلير. چونكه بر آيتڭ سائر آياتِ قرآنيه ايله پك اينجه مناسبتلرى، إتّصال جهتلرى واردر. آرالرنده وحشت يوقدر. بو إعتبار ايله متعدّد سورهلردن آلينان آيتلر كوچك بر قرآن حكمنده اولور.
إعلم أيّها العزيز!
﴿لَا حَوْلَ وَلَا قُوَّةَ اِلَّا بِاللّٰهِ﴾
جملۀِ مقدّسهسى، إنسانڭ ذرّه وضعيتندن، إنسانِ مؤمن صورتنه گلنجهيه قدر جامديت، نباتيت، حيوانيت، إنسانيت گبى گچيرديگى أطوار و أحوالنه ناظردر. شو منزللرده إنسانڭ لطائفى پك چوق ألم و أمللره معروضدر. مع هذا حول و قوّتڭ متعلّقلرى ذكر ايديلميهرك مطلق بيراقيلمشدر. بناءً عليه بو جمله، تسلّىبخش اولوب شمولى داخلنده اولان مقاملره گوره تفسير ايديلير. مثلا:
١-
﴿لَا حَوْلَ عَنِ الْعَدَمِ وَلَا قُوَّةَ عَلَى الْوُجُودِ اِلَّا بِاللّٰهِ﴾
عدمدن چيقوب وجوده گلمك.