گبى جامع دعالرله دعا ايتمك؛ هم خلوص و خشوع و حضورِ قلب ايله دعا ايتمك؛ هم نمازڭ صوڭنده، بِالخاصّه صباح نمازندن صوڭره؛ هم مواقعِ مباركهده، خصوصًا مسجدلرده؛ هم جمعهده، خصوصًا ساعتِ إجابهده؛ هم شهورِ ثلاثهده، خصوصًا ليالئِ مشهورهده؛ هم رمضانده، خصوصًا ليلۀِ قدرده دعا ايتمك قبوله قرين اولماسى رحمتِ إلٰهيهدن قويًا مأمولدر. او مقبول دعانڭ يا عينًا دنياده أثرى گورونور وياخود دعا اولونانڭ آخرتنه و حياتِ أبديهسى جهتنده مقبول اولور. ديمك عين مقصد يرينه گلمزسه، دعا قبول اولمادى دينيلمز؛ بلكه داها ايى بر صورتده قبول ايديلمش دينيلير.
ايكنجى سؤالڭز:
صحابۀِ كرام حضراتنه رضى اللّٰه عنه دينيلديگنه بناءً، باشقهلره ده بو معناده سويلهمك موافق ميدر؟
الجواب:
أوت دينيلير. چونكه رسولِ أكرمڭ بر شعارى اولان عليه الصلاة والسلام كلامى گبى رضى اللّٰه عنه تركيبى، صحابهيه مخصوص بر شعار دگل، بلكه صحابه گبى وراثتِ نبوّت دينيلن ولايتِ كبراده بولونان و مقامِ رضايه يتيشن أئمّۀِ أربعه، شاهِ گيلانى، إمامِ غزالى، إمامِ ربّانى گبى ذاتلره دينيلملى. فقط عُرفِ علماده صحابهيه، رضى اللّٰه عنه؛ تابعين و تبعِ تابعينه، رحمه اللّٰه؛ اونلردن صوڭرهكيلره، غَفَرَهُ اللّٰه؛ و أوليايه، قُدِّسَ سِرُّهُ دينيلير.
اوچنجى سؤالڭز:
باشده مجتهدينِ عظام إماملرى مى أفضل، يوقسه حق طريقتلرڭ شاهلرى، أقطابلرى مى أفضلدر؟
الجواب:
عموم مجتهدين دگل؛ بلكه أبو حنيفه، مالك، شافعى، أحمد ابن حنبل؛ شاهلرڭ، أقطابلرڭ فوقندهدرلر. فقط خصوصى فضيلتلرده شاهِ گيلانى گبى