ايدوب باشلاميان بر قارداشمز، بر آيده اون درت كتابى گوزل و دقّتلى يازماسى، شبههسز دردنجى بر كرامتِ أسرارِ قرآنيهدر. خصوصًا اوتوز اوچنجى مكتوب اولان اوتوز اوچ پنجرهلرڭ قيمتى تمامًا تقدير ايديلمش كه، غايت دقّتله و گوزل يازيلمش. أوت او رساله، معرفت اللّٰه و ايمانِ بِاللّٰه ايچون أڭ قوّتلى و أڭ پارلاق بر رسالهدر. يالڭز باشدهكى پنجرهلر غايت إجمال و إختصار ايله گيديلمشدر. فقط گيتدكجه إنكشاف ايدر، داها زياده پارلار. ذاتًا سائر تأليفاته مخالف اولارق أكثر سوزلرڭ باشلرى مجمل باشلار، گيتدكجه گنيشلنير، تنوّر ايدر.
* * *
دردنجى رساله اولان دردنجى مسئله
﴿بِاسْمِهٖ وَاِنْ مِنْ شَىْءٍ اِلَّا يُسَبِّحُ بِحَمْدِهٖ﴾
(إخوانلريمه مدارِ إنتباه بر حادثۀِ جزئيهيه دائر بر سؤاله جوابدر.)
عزيز قارداشلرم!
سؤال ايدييورسڭز كه: جامعِ شريفڭزه، جمعه گيجهسنده سببسز اولارق، مبارك بر مسافرڭ گلمهسيله تجاوز ايديلمش. بو حادثهنڭ ماهيتى نهدر؟ نهدن سڭا ايليشييورلر؟
الجواب:
درت نقطهيى، بِالمجبوريه أسكى سعيد لسانيله بيان ايدهجگم. بلكه إخوانلريمه مدارِ إنتباه اولور، سز ده جوابڭزى آليرسڭز.