كندينه چكمك؛ اونڭ او حسّنى اوقشامقله كندينه باغلار، هم اونڭ ايله اونى مغلوب ايدر. قارداشلرم حقّنده أڭ زياده قورقديغم، بونلرڭ بو ضعيف طمارندن أهلِ إلحادڭ إستفاده ايتمك إحتماليدر. بو حال بنى چوق دوشونديرييور. حقيقى اولميان بعض بيچاره دوستلريمى او صورتله چكديلر، معنًا اونلرى تهلكهيه آتديلر. (حاشيه)
أى قارداشلرم و أى خدمتِ قرآنده آرقداشلرم! بو حبِّ جاه جهتندن گلن دسّاس أهلِ دنيانڭ خفيهلرينه ويا أهلِ ضلالتڭ پروپاغندهجيلرينه ويا شيطانڭ شاكردلرينه دييڭز كه: «أوّلا رضاىِ إلٰهى و إلتفاتِ رحمانى و قبولِ ربّانى اويله بر مقامدر كه؛ إنسانلرڭ توجّهى و إستحسانى، اوڭا نسبةً بر ذرّه حكمندهدر. أگر توجّهِ رحمت وارسه، يتر. إنسانلرڭ توجّهى؛ او توجّهِ رحمتڭ إنعكاسى و گولگهسى اولمق جهتيله مقبولدر، يوقسه آرزو ايديلهجك بر شى دگلدر.. چونكه قبر قپوسنده سونر، بش پاره ايتمز!»
حبِّ جاه حسّى أگر صوصديريلمازسه و إزاله ايديلمزسه، يوزينى باشقه جهته چويرمك لازمدر. شويله كه:
ثوابِ اُخروى ايچون، دعالرينى قزانمق نيّتيله و خدمتڭ حسنِ تأثيرى نقطهسنده گلهجك تمثيلدهكى سرّه بناءً، بلكه او حسّڭ مشروع بر جهتى بولونور.
___
(حاشيه): او بيچارهلر، «قلبمز استاد ايله برابردر» فكريله كنديلرينى تهلكهسز ظن ايدرلر. حالبوكه أهلِ إلحادڭ جرياننه قوّت ويرن و پروپاغندهلرينه قاپيلان، بلكه بيلميهرك خفيهلكده إستعمال ايديلمك تهلكهسى بولونان بر آدمڭ، «قلبم صافيدر. استاديمڭ مسلگنه صادقدر.» ديمسى، بو مثاله بڭزر كه: بريسى نماز قيلاركن قارنندهكى يلى طوتهمييور، چيقييور؛ حدث وقوع بولويور. اوڭا «نمازڭ بوزولدى» دينيلديگى وقت، او دييور: «نهدن نمازم بوزولسون، قلبم صافيدر.»