شمس و قمرڭ صورى حركتلرنده شيرين تماشا لوحهلرينى گوسترمك گبى او عالى وضعيتلرى و غالى نتيجهلرى إستحصال ايدر. چونكه عموم موجودات اوردوسى اونڭدر. ايستهسه، أرض گبى بر نفرى، عموم ييلديزلره قوماندان تعيين ايدر؛ قوجه گونشى، أهاليسنه ايصيديجى و ايشيق ويريجى بر لامبا و ألواحِ نقوشِ قدرت اولان فصولِ أربعهيى ده بر مكيك و صحائفِ كتابتِ حكمت اولان گيجه گوندوزى ده بر ياى ياپار. هر بر گوننه، آيرى بر شكلده بر قمرى گوسترهرك، أوقاتڭ حسابى ايچون تقويمجيلك ياپديرر.. و ييلديزلرڭ كنديلرينه، رقصه گلن و جذب ايدن رقص ايدن ملائكهنڭ أللرنده سوسلى و شيرين، پارلاق نازنين مصباحلر صورتنى ويرمك گبى، أرضه عائد چوق حكمتلرينى گوسترر. أگر بو وضعيتلر، عموم موجوداته حكمى و نظامى و قانونى و تدبيرى متوجّه اولان بر ذاتدن إيستهنيلمزسه، او وقت عموم گونشلر، ييلديزلر، حقيقى حركت ايله و حدسز بر سرعتله حدسز بر مسافهيى هر گون قطع ايتمهلرى لازم گلير.
ايشته وحدتده نهايتسز سهولت و كثرتده نهايتسز صعوبت بولونديغندندر كه؛ أهلِ صنعت و تجارت، كثرته بر وحدت ويرر، تا سهولت و قولايلق اولسون، يعنى شركتلر تشكيل ايدرلر.
الحاصل: ضلالت يولنده نهايتسز مشكلات وار، هدايت و وحدت يولنده نهايتسز سهولت وار.
اَلْبَاقٖى هُوَ الْبَاقٖى
سعيد النورسى
* * *