واحدِ أحد إسملرى حقيقى طوتولوب اوتهكى إسملر اونلرڭ ايچنه گولگه اولمق حيثيتيله آلينسه، او أسمايه قارشى بر حقسزلق حكمنه گچر.
ايشته شو سردندر كه: جادّۀِ كبرا، ألبته ولايتِ كبرا صاحبلرى اولان صحابه و أصفيا و تابعين و أئمّۀِ أهلِ بيت و أئمّۀِ مجتهدينڭ جادّهسيدر كه، طوغريدن طوغرىيه قرآنڭ برنجى طبقه شاكردلريدر.
﴿سُبْحَانَكَ لَا عِلْمَ لَنَٓا اِلَّا مَا عَلَّمْتَنَٓا اِنَّكَ اَنْتَ الْعَلٖيمُ الْحَكٖيمُ﴾
﴿رَبَّنَا لَا تُزِغْ قُلُوبَنَا بَعْدَ اِذْ هَدَيْتَنَا وَهَبْ لَنَا مِنْ لَدُنْكَ رَحْمَةً اِنَّكَ اَنْتَ الْوَهَّابُ﴾
(اَللّٰهُمَّ صَلِّ وَسَلِّمْ عَلٰى مَنْ اَرْسَلْتَهُ رَحْمَةً لِلْعَالَمٖينَ وَعَلٰى اٰلِهٖ وَصَحْبِهٖ اَجْمَعٖينَ)
اوچنجى مسئله:
حكمت و عقل ايله حلّ ايديلمهين بر مسئلۀِ مهمّه.
﴿كُلَّ يَوْمٍ هُوَ فٖى شَاْنٍ ۞ فَعَّالٌ لِمَا يُرٖيدُ﴾
سؤال:
كائناتدهكى متماديًا شو حيرتأنگيز فعاليتڭ سرّى و حكمتى نهدر؟ نهدن شو طورميانلر طورمييورلر، دائما دونوب تازهلهنييورلر؟
الجواب:
شو حكمتڭ ايضاحى بيڭ صحيفه ايستر. اويله ايسه ايضاحنى بيراقوب غايت مختصر بر إجمالنى ايكى صحيفهيه صيغيشديرهجغز.
ايشته ناصلكه بر شخص، بر وظيفۀِ فطريهيى وياخود بر وظيفۀِ إجتماعيهيى ياپسه و او وظيفه ايچون حرارتلى بر صورتده چاليشسه؛ ألبته اوڭا دقّت ايدن آڭلار كه، او وظيفهيى اوڭا گورديرن ايكى شيدر: