سماويسنڭ كوكلرى حكمندهدرلر. هم قرآنِ حكيم، وحيه إستناد ايدييور و وحيدر. چونكه قرآنى نازل ايدن ذاتِ ذو الجلال، معجزاتِ أحمديه (عصم) ايله، قرآن وحى اولديغنى گوسترر، إثبات ايدر. و نازل اولان قرآن دخى، اوستندهكى إعجاز ايله گوسترر كه، عرشدن گلييور. و مُنزَلِ عليه اولان رسولِ أكرم عليه الصلاة والسلامڭ بدايتِ وحيدهكى تلاشى و نزولِ وحى وقتندهكى وضعيتِ بيهوشى و هركسدن زياده قرآنه قارشى إخلاص و حرمتى گوسترييور كه: وحى اولوب أزلدن گلييور، اوڭا مسافر اولويور.
هم او قرآن بِالبداهه محضِ هدايتدر. چونكه اونڭ مخالفى، بِالمشاهده كفرڭ ضلالتيدر. هم بِالضروره قرآن أنوارِ ايمانيهنڭ معدنيدر. ألبته أنوارِ ايمانيهنڭ عكسى، ظلماتدر. چوق سوزلرده بونى قطعى اولارق إثبات ايتمشز.
هم قرآن بِاليقين حقائقڭ مجمعيدر. خيالات و خرافات، ايچنه گيرهمز. تشكيل ايتديگى حقيقتلى عالمِ إسلاميت، إظهار ايتديگى أساسلى شريعت و گوسترديگى عالى كمالاتڭ شهادتيله، عالمِ غيبه عائد اولان بحثلرنده دخى، عالمِ شهادتدهكى بحثلرى گبى، عينِ حقائق اولديغنى و ايچنده خلاف بولونماديغنى إثبات ايدر.
هم قرآن بِالعيان و شبههسز، سعادتِ داريْنه ايصال ايدر، بشرى اوڭا سَوق ايدر. كيمڭ شبههسى وارسه، بر دفعه قرآنى اوقوسون و ديڭلهسين نه دييور؟ هم قرآنڭ ويرديگى ميوهلر؛ هم مكمّلدر، هم حياتداردر. اويله ايسه، قرآن آغاجنڭ كوكى حقيقتدهدر، حياتداردر. چونكه ميوهنڭ حياتى، آغاجڭ حياتنه دلالت ايدر. ايشته باق؛ هر عصرده نه قدر أصفيا و أوليا گبى مكمّل و كامل ذىحيات و ذىنور ميوهلر ويرمش.