رسولِ أكرم عليه الصلاة والسلام، أبو بكرِ الصدّيق ايله برابر غاردن چيقوب گيدركن گورديلر كه، سُراقه گلييور. أبو بكرِ الصدّيق تلاش ايتدى. رسولِ أكرم عليه الصلاة والسلام مغارهده ديديگى گبى (لَا تَحْزَنْ اِنَّ اللّٰهَ مَعَنَا) ديدى. سراقهيه بر باقدى، سُراقهنڭ آتنڭ آياقلرى يره صاپلاندى قالدى. تكرار قورتولدى، ينه تعقيب ايتدى. تكرار آتنڭ آياقلرينڭ صاپلانديغى يردن دومان گبى بر شى چيقييوردى. او وقت آڭلادى كه: نه اونڭ ألندن و نه ده كيمسهنڭ ألندن گلمز كه، اوڭا ايليشسين. «الأمان!» ديدى. رسولِ أكرم عليه الصلاة والسلام امان ويردى. فقط ديدى: «گيت اويله ياپ كه، باشقهسى گلمهسين!»
شو حادثه مناسبتيله بونى ده بيان ايدرز كه: صحيح بر صورتده خبر ويرييورلر: بر چوبان، اونلرى گوردكدن صوڭره قُريشه خبر ويرمك ايچون مكّهيه گيتمش. مكّهيه داخل اولديغى وقت، نه ايچون گلديگنى اونوتمش. نه قدر چاليشمش ايسه، خاطرينه گتيرهمهمش. مجبور اولمش دونمش. صوڭره آڭلامش كه، اوڭا اونوتديرلمش.
اوچنجى حادثه:
غزوۀِ غَطَفان و أنمارده متعدّد طريقلرله أئمّۀِ حديث خبر ويرييورلر كه: غَوْرَثْ إسمنده جسور بر قبيله رئيسى، كيمسه گورمهدن تام رسولِ أكرم عليه الصلاة والسلامڭ باشى اوزرينه گلهرك، يالين قلنج ألنده اولديغى حالده، رسولِ أكرم عليه الصلاة والسلامه ديدى: «كيم سنى بندن قورتارهجق؟» ديمش: «اللّٰه!» صوڭره بويله دعا ايتدى: (اَللّٰهُمَّ اكْفِنٖيهِ بِمَا شِئْتَ)
بردن او غَوْرَثْ، ايكى اوموزى اورتهسنه غائبدن بر ضربه ير؛ او قلنج ألندن دوشر، يره يووارلانير. رسولِ أكرم عليه الصلاة والسلام قلنجى ألنه آلير، «شيمدى سنى كيم قورتارهجق؟» دير، صوڭره عفو ايدر. او آدم گيدر طائفهسنه. او پك جرئتكار، جسور آدمه هركس حيرتده قالير. «نه اولدى سڭا، نه ايچون بر شى ياپامدڭ؟»