هركسه، هر عسكره بر نوع پادشاهلق و بر گونا حاكميت ويرر. اويله ده: اللّٰهى إنكار ايدن او جريان أفرادلرى، برر كوچك نمرود حكمنده نفسلرينه برر ربوبيت ويرر. و اونلرڭ باشنه گچن أڭ بيوكلرى، إسپرتيزمه و مانيهتيزمهنڭ حادثاتى نوعندن مدهش خارقهلره مظهر اولان دجّال ايسه؛ داها ايلرى گيدوب، جبّارانه صورى حكومتنى بر نوع ربوبيت تصوّر ايدوب الوهيتنى إعلان ايدر. بر سينگه مغلوب اولان و بر سينگڭ قنادينى بيله ايجاد ايدهمهين عاجز بر إنسانڭ الوهيت دعوا ايتمهسى، نه درجه أحمقجهسنه بر مسخرهلق اولديغى معلومدر.
ايشته بويله بر صيرهده، او جريان پك قوّتلى گورونديگى بر زمانده، حضرتِ عيسى عليه السلامڭ شخصيتِ معنويهسندن عبارت اولان حقيقى عيسويلك دينى ظهور ايدهجك، يعنى رحمتِ إلٰهيهنڭ سماسندن نزول ايدهجك؛ حالِ حاضر خرستيانلق دينى او حقيقته قارشى تصفّى ايدهجك، خرافاتدن و تحريفاتدن صييريلاجق، حقائقِ إسلاميه ايله برلشهجك؛ معنًا خرستيانلق بر نوع إسلاميته إنقلاب ايدهجكدر. و قرآنه إقتدا ايدهرك، او عيسويلك شخصِ معنويسى تابع و إسلاميت متبوع مقامنده قالاجق؛ دينِ حق بو إلتحاق نتيجهسنده عظيم بر قوّت بولاجقدر. دينسزلك جرياننه قارشى آيرى آيرى ايكن مغلوب اولان عيسويلك و إسلاميت إتّحاد نتيجهسنده، دينسزلك جرياننه غلبه ايدوب طاغيدهجق إستعدادنده ايكن؛ عالمِ سماواتده جسمِ بشريسيله بولونان شخصِ عيسى عليه السلام، او دينِ حق جرياننڭ باشنه گچهجگنى، بر مخبرِ صادق، بر قديرِ كلّ شيئڭ وعدينه إستناد ايدهرك خبر ويرمشدر. مادام خبر ويرمش، حقدر؛ مادام قادرِ كلّ شئ وعد ايتمش، ألبته ياپهجقدر.