قدرت، شو سرِّ تناسلى پك عجيب إستنساخ ايدييور. إنعكاس، يا هويتى ويا هويتله ماهيتى طوتار. كثيفڭ تمثاللرى برر ميّتِ متحرّكدر. بر روحِ نورانينڭ كندى آيينهلرنده اولان تمثاللرى، برر حىِّ مرتبطدر؛ عينى اولماسه ده، غيرى ده دگلدر.
٢٨- شمس حركتِ محوريهسيله سيلكنسه، ميوهلرى دوشمز؛ سيلكنمزسه، يميشلرى اولان سيّارات دوشوب طاغيلاجقدر.
٢٩- نورِ فكر، ضياىِ قلب ايله ايشيقلانوب مزج اولمازسه، ظلمتدر، ظلم فيشقيرر. گوزڭ مظلم نهارِ أبيضى، مضيۀِ (حاشيه) ليلۀِ سُوَيْدَا ايله مزج اولمازسه بصرسز اولديغى گبى، فكرتِ بيضاده سويداءِ قلب بولونمازسه، بصيرتسزدر.
٣٠- علمده إذعانِ قلب اولمازسه، جهلدر. إلتزام باشقه، إعتقاد باشقهدر.
٣١- باطل شيلرى اييجه تصوير، صافى ذهنلرى إضلالدر.
٣٢- عالمِ مرشد، قويون اولمالى؛ قوش اولماملى. قويون، قوزوسنه سوت؛ قوش، ياوروسنه قَىْ ويرر.
٣٣- بر شيئڭ وجودى، بتون أجزاسنڭ وجودينه وابستهدر. عدمى ايسه، بر جزئنڭ عدميله اولديغندن؛ ضعيف آدم، إقتدارينى گوسترمك ايچون تخريب طرفدارى اولويور، مثبت يرينه منفيجه حركت ايدييور.
___
(حاشيه): مئالى: گوزڭ گوندوزه بڭزهين بياضى، گيجهيه بڭزهين سياهلغيله برابر اولمازسه؛ گوز، گوز اولماز.