تك صحيفهده، برر سطرده، بر صيرهده خطِّ مستقيم ايله توافقلرى، توافقِ قرآنيهدهكى لمعۀِ إعجازيهنڭ بر شعاعى شو رسالهده بو خارقه لطافتى گوسترديگنى، گورنلره قناعت گلدى.
بو اوچنجى قسمڭ متباقى مسئلهلرى ايله دردنجى قسم توافقاته دائر اولديغى ايچون، توافقاته دائر اولان فهرسته ايله إكتفا ايديلمشدر.
دردنجى قسم اولان دردنجى رساله
«اوچ نكته»در.
برنجى نكته:
قرآنده، «قرآن» كلمهسنڭ چوق سرلرندن بر سرّينى، آلتمش طوقوز آياتِ عظيمهده لطيف و معنيدار صحيفهلر آرقهسنده بربرينه توافقله باقدقلرينى و او آياتِ عظيمهنڭ معنًا بربرينڭ حقيقتنى تأييد ايتدكلرينى گوسترمك و تلاوتِ قرآن ثوابنى و ذكر فضيلتنى و تفكّر عبوديتنى بردن قزانمق ايستهينلره، أوراد نوعندن غايت گوزل بر حزبِ قرآنى اولارق يازيلمشدر.
ايكنجى نكته:
قرآنِ حكيمده «رسول» كلمهسنڭ تكرارندهكى أسرارڭ توافق جهتيله بريسنه إشارت ايچون، يوز آلتمش آياتدهكى «رسول» كلمهسى بربرينه توافقله معنيدار باقماسى گبى؛ (حاشيه) او يوز آلتمش معظّم آيتلر ده بربرينه باقييور. بربرينى تأييد و إثبات ايتديگنه إشارةً و قرآندن هم قرائت، هم ذكر، هم فكر اولمق اوزره بر حزبِ مخصوصدر. كندينه عالى و طاتلى و چوق قيمتلى و چوق فضيلتلى بر ورد آرزو ايدنلره مهمّ بر ورددر.
___
(حاشيه): بو رسالهنڭ، او مقدّس ايكى كلمهنڭ إعجازى توافقلرندن بحثى عينِ حقيقت اولديغنه دليل، او دردنجى رسالهده بتون او ايكى كلمهنڭ توافق ايتمهسيدر. هر بر آيت آيرى و سطر باشنده يازيلماسندن، عموم او ايكى مقدّس كلمهلر توافق ايتمشلردر.