اوچ درت گون ظرفنده، هر گونده ايكى اوچ ساعت چاليشمق شرطيله مجموعى اون ايكى ساعتده تأليف ايديلمسى خارقه بر واقعهدر كه، بو رسالهدهكى معجزاتِ أحمديهنڭ (عصم) بر شعلۀِ كرامتى اولمشدر.
ايكنجيسى:
شو رساله، اوزونلغيله برابر نه يازماسى اوصانج ويرر و نه ده اوقوماسى حلاوتنى غائب ايدر. تنبل أهلِ قلمى اويله بر شوق و غيرته گتيردى كه؛ بو صيقنتيلى و اوصانجلى زمانده، بر سنه ظرفنده جواريمزده يتمش عدده ياقين نسخهلرى يازيلدى. او معجزۀِ رسالتڭ بر كرامتى اولديغنى، مطّلع اولانلره قناعت ويردى.
اوچنجيسى:
عجمى و توافقدن خبرى يوق و بزه ده داها توافق تظاهر ايتمهدن أوّل يازدقلرى نسخهلرده، لفظِ «رسولِ أكرم عليه الصلاة والسلام» كلمهسى بتون رسالهلرده و لفظِ «قرآن»، بشنجى پارچهسنده اويله بر طرزده توافق (حاشيه) ايتمهلرى گوروندى كه؛ ذرّه مقدار إنصافى اولان تصادفه ويرهمز. كيم گورمش ايسه، قطعى حكم ايدييور كه: «بو بر سرِّ غيبيدر، معجزاتِ أحمديهنڭ (عصم) بر كرامتيدر.»
شو رسالهنڭ باشندهكى أساسلر چوق مهمدرلر.
هم شو رسالهدهكى أحاديث همان عمومًا أئمّۀِ حديثجه مقبول و صحيح اولمقله برابر، أڭ قطعى حادثاتِ رسالتى بيان ايدييورلر.
او رسالهنڭ بتون مزاياسنى سويلهمك لازم گلسه، او رساله قدر بر أثر يازمق لازم گلديگندن، مشتاق اولانلرى اونى بر كرّه اوقوماسنه حواله ايدييورز.
___
(حاشيه): أصل نسخهسنه گورهدر.