نقّاشِ حكيم عبث و إسراف ياپمديغى ايچون، او كثرتلى مبارك كلمهلرى ديڭلهيهجك قدر حدسز قولاقلرى خلق ايتمش. أگر إخلاص ايله، نيّتِ صادقه ايله او هوادهكى كلمهلر حياتلانسهلر، لذّتلى برر ميوه گبى روحانيلرڭ قولاقلرينه گيرر. أگر رضاىِ إلٰهى و إخلاص او هوادهكى كلمهلره حيات ويرمزسه، ديڭلهنيلمز؛ ثواب ده يالڭز آغزدهكى كلمهيه منحصر قالير. سسلرينڭ زياده گوزل اولماديغندن، ديڭلهينلرڭ آزلغندن صيقيلان حافظلرڭ قولاقلرى چينلاسين!..
دردنجى سبب:
أهلِ هدايتڭ رقابتكارانه إختلافى، عاقبتى دوشونمهمكدن و قصرِ نظردن اولماديغى گبى؛ أهلِ ضلالتڭ صميمانه إتّفاقلرى، عاقبتأنديشلكدن و يوكسك نظردن دگلدر. بلكه أهلِ هدايت؛ حق و حقيقتڭ تأثيريله، نفسڭ كور حسّياتنه قاپيلميهرق؛ قلبڭ و عقلڭ دورأنديشانه تمايلاتنه تابع اولمقله برابر، إستقامتى و إخلاصى محافظه ايدهمدكلرندن، او يوكسك مقامى محافظه ايدهميوب إختلافه دوشويورلر. أهلِ ضلالت ايسه: نفسڭ و هوانڭ تأثيريله، كور و عاقبتى گورمهين و بر درهم حاضر لذّتى بر بطمان ايلريدهكى لذّته ترجيح ايدن حسّياتڭ مقتضياتيله، بربرينه صميمى اولارق، معجّل بر منفعت و حاضر بر لذّت ايچون شدّتلى إتّفاق ايدييورلر. أوت دنيوى و حاضر لذّت و منفعت أطرافنده آشاغى، قلبسز نفسپرستلر صميمى إتّفاق و إتّحاد ايدييورلر. أهلِ هدايت، آخرته عائد و ايلرىيه متعلّق ثمراتِ اُخرويهيه و كمالاته، قلب و عقلڭ يوكسك دستورلريله متوجّه اولدقلرى ايچون، أساسلى بر إستقامت و تام بر إخلاص و غايت فداكارانه بر إتّحاد و إتّفاق اولابيليركن؛ أنانيتدن تجرّد ايدهمدكلرى ايچون، إفراط و تفريط يوزندن، علوى بر منبعِ قوّت اولان إتّفاقى غائب ايدوب، إخلاص ده قيريلير و وظيفۀِ اُخرويه ده زدهلنير. قولايجه رضاىِ إلٰهى ده ألده ايديلمز.