قدر زمان بولامديغڭزدن، بيليڭز كه؛ اونى إداره ايدن اويله عجيب بر دهادر كه، مغلوب ايديلمز و مقابله ايديلمز. چارۀِ يگانه، اونڭله مصالحهدر. يوقسه، بو قدر معصوملره ضرر ويرمك و أزمك يتر! بلكه غيرت اللّٰهه طوقونور، غلا و وبا گبى بلالره وسيله اولور. حالبوكه بنم گبى عصبى و أڭ گيزلى اولان سرّينى يبانى آدملره چكينميهرك سويلهين و ديوانِ حربِ عُرفيده مشهور و پك مردانه و فداكارانه مدافعاتى ياپان و إختيارلق زماننده أڭ زياده عاقبتى تهلكهلى و مجهول سرگذشتلردن صاقينمغه مسلكجه مجبور اولان بر آدمڭ واسطهسيله، بويله هيچ كشف ايديلمهين و كشف ايديلميهجك قوميتهجيلگى إسناد ايتمك، نهايت درجهده بر صافدللكدر وياخود بر أنتريقهدر ويا بر آنارشيلكدر ويا ديوانهلكدر.
هيئتِ حاكمهدن هم بر رجام وار هم بر حقّمى ايسترم.
بندن مصادره ايديلن كتابلريمڭ بنجه بيڭ ليرادن زياده قيمتلرى وار. و اونلرڭ مهمّ بر قسمى، اون ايكى سنه أوّل آنقره كتبخانهسنه إفتخار و تشكّر ايله قبول ايديلمش. خصوصًا صِرف اُخروى و ايمانى اولان اون طوقوزنجى مكتوب ايله يگرمى طوقوزنجى سوزڭ بنم ايچون چوق أهمّيتلرى وار؛ بنم معنوى ثروتم و نتيجۀِ حياتمدرلر؛ و إعجازِ قرآنينڭ اون قسمندن بر قسمنڭ جلوهسنى گوزه گوستردكلرى ايچون فوق العاده بنجه قيمتلرى وار. هم اونلرى، كنديمه مخصوص اولارق يازديروب يالديزلاتمشم. هم إختيارلغمڭ غايت حزين خاطراتنه دائر اولان إختيارلر رسالهسنڭ اوچ درت نسخهلرندن بر دانهسنى كنديمه مخصوص يازديرمشدم. مادام مؤاخذه ايديلهجك هيچ بر دنيوى مادّه ايچلرنده يوقدر؛ اونلرى و عربى رسالهلريمى بالخاصّه قرآنڭ جزلرينى بڭا إعاده ايتمهڭزى بتون روحمله ايستهيورم. حپسده و قبرده دخى اولسهم، او كتابلرم، بو غريب دنيانڭ بڭا يوكلهديگى بش أليم و حزين غربتلرده أنيسلرم و آرقداشلرمدرلر. اونلرى بندن آييرمقله، تحمّلسز بر آلتنجى غربته دوشهجگم و بو چوق آغير غربتڭ تضييقندن چيقان آهلردن صاقينماليسڭز.