أنتريقهلرندن، حقّمده دوربين ايله باقهرق حبّهيى قبّه گوسترديلر. بيڭلر ليرا بزلره ضرر ويرديلر. سزلردن اميديمز بودر كه؛ إقتداريڭزدن، اونلرڭ أوهاملرينڭ قبّهسنى حبّه اولديغنى گوسترمكدر. يعنى دوربينلرينى عكسنه چويروب باقهسڭز.
هم بر رجام وار: مصادره ايديلن كتابلريمڭ، بيڭ ليرادن زياده بنجه قيمتلرى وار. بڭا إعاده ايديڭز. اونلرڭ مهمّ بر قسمنڭ، اون ايكى سنه أوّل آنقره كتبخانهسنه إفتخار و تشكّر ايله قبول ايديلديگنى، كتبخانه ناظرى غزته ايله إعلان ايتمشدر.
شيمديلك حياتمه حكملرى گچن هيئتڭزڭ رأييله، بو إفادهمڭ بر صورتنى مدّعىعمومىيه ويروب بنى بو ضرره صوقانلر عليهنده إقامۀِ دعوا ايتمك و بر صورتنى داخليه وكالتنه و بر صورتنى ده مجلسِ مبعوثانه ويرمك ايستهرم.
* * *
يوقاريدهكى مدافعاتمڭ برنجى تتمّهسى
بنى إستنطاق ايدن ذاتڭ و هيئتِ حاكمهنڭ نظرِ دقّتلرينه!
أوّلكى إفادهمه اوچ مادّهيى علاوه ايدييورم.
برنجى مادّه:
بزى حيرتده بيراقان و غايت شاشيرتان و بر غرضى إحساس ايدن و بِالإلتزام هيچدن بر سببِ إتهام ايجاد ايتمك نوعندن، مصرّانه بر جمعيت و تشكيلات وارمش گبى صورويورلر و «بو تشكيلاتى ياپمق ايچون نرهدن پاره آلييورسڭز؟» دييورلر.