مادّى مكانه باقمييور، بلكه معنوى مرتبهيه باقار. رحمانڭ حدسز مرتبۀِ علويتنڭ بر تجلّيسى اولان خزينۀِ رحمتدن گلن نعمت، ألبته أڭ يوكسك مقامدن أڭ آشاغى مرتبهيه گوندريلييور. حق تعبيرى (اَنْزَلْنَا) در. بو تعبيرله نوعِ بشره إخطار ايدر كه، دمير أڭ بيوك بر نعمتِ إلٰهيهدر.
أوت نوعِ بشرڭ بتون صنعتلرينڭ معدنى و ترقّياتنڭ منبعى و قوّتنڭ مدارى دميردر. ايشته بو عظيم نعمتى إخطار ايچون، مقامِ إمتنان و إنعامده، كمالِ حشمتله (وَاَنْزَلْنَا الْحَدٖيدَ فٖيهِ بَاْسٌ شَدٖيدٌ وَمَنَافِعُ لِلنَّاسِ) فرمان ايدييور.
ناصلكه حضرتِ داوده (عس) أڭ مهمّ بر معجزه اولارق (وَاَلَنَّا لَهُ الْحَدٖيدَ) فرمان ايدييور. يعنى، بيوك بر پيغمبره بيوك بر معجزه و پك بيوك بر نعمت اولارق دميرى يوموشاتمسنى گوسترييور.
ثانيًا: يوقارى، آشاغى نسبيدر. كُرۀِ أرضڭ مركزينه گوره يوقارى، آشاغى اولويور. حتّى بزه نسبةً آشاغى اولان، آمريقا قطعهسنه نظرًا يوقارى اولويور. ديمك مركزدن سطحِ أرض طرفنه گلن مادّهلر، سطحِ أرضده اولانلره گوره وضعيتى دگيشير.
قرآنِ معجز البيان إعجاز لسانى ايله إفاده ايدييور كه: دميرڭ او قدر چوق منافعى، او قدر گنيش فوائدى واردر كه؛ إنسانڭ خانهسى اولان كُرۀِ أرضڭ مخزنندن چيقاريلهجق عادى بر مادّه دگلدر. و راست گله حاجتده إستعمال ايديلمش فطرى بر معدن دگلدر. بلكه خالقِ كائناتڭ طرفندن رحمت خزينهسنده و كائناتڭ بيوك تزگاهنده إظهار ايديلمش بر نعمت اولارق، (رَبُّ السَّمٰوَاتِ وَالْاَرْضِ) عنوانِ حشمتيله كُرۀِ أرض سكنهسنڭ حاجاتنه مدار اولمق ايچون دميرى إنزال ايتمش، اينديرمش دييه دميردهكى عمومى منفعتى إفاده ايچون؛ گويا دميرڭ