ايچون إشارت نوعندن بعض كلماتى او أنواره دلالت ايتمك ايچون دگل، بلكه وجودلرينه إشارت و تفكّرى تسهيل و إنتظامى محافظه ايچون وضع ايتدم. غايت مختلف عربى عبارهلرله كندى كنديمه او تفكّرده گيتديگم زمان، او كلماتى لسانًا ذكر ايدييوردم.
بو اوزون زمانده و بيڭلر دفعه تكرارنده نه بڭا اوصانج گلييوردى و نه ده ويرديگى ذوق نقصانلاشييوردى و نه ده اونلره إحتياجِ روحى زائل اولويوردى. چونكه بتون او تفكّرات، آياتِ قرآنيهنڭ لمعاتى اولديغندن؛ آياتڭ بر خاصّهسى اولان اوصانديرمامق و حلاوتنى محافظه ايتمك خاصّهسنڭ بر جلوهسى، او تفكّر آيينهسنده تمثّل ايتمشدر.
بو آخرده گوردم كه: رسالۀِ نورڭ أجزالرندهكى قوّتلى عقدۀِ حياتيه و پارلاق نورلر، او سلسلۀِ تفكّراتڭ لمعهلريدر. بڭا ايتدكلرى تأثيرى باشقه ذاتلره ده ايدهجگنى دوشونمكله، آخر عمرمده مجموعنى قلمه آلمق نيّت ايتمشدم. گرچه چوق مهمّ پارچهلرى رسالهلرده درج ايديلمشدر؛ فقط هيئتِ مجموعهسنده باشقه بر قيمت و قوّت بولونهجقدر.
آخرِ عمر معيّن اولماديغى ايچون، بو أسكيشهر حپسندهكى محكوميتم و وضعيتم ئولومدن داها بتر بر شكل آلديغندن، آخرِ حياتى بكلهميهرك، نور قارداشلريمڭ إستفاده آرزولريله، تغيير ايتميهرك، او سلسلۀِ تفكّرات «يدى باب» اوستنده يازيلدى.
بو نوع قدسى حقيقتلرڭ أكثريتِ مطلقهسى نماز تسبيحاتنده خاطره گلدكلرندن
﴿سُبْحَانَ اللهِ ۞ اَلْحَمْدُ لِلّٰهِ ۞ اَللهُ اَكْبَرُ ۞ لَٓا اِلٰهَ اِلَّا اللهُ﴾
قدسى كلمهلرينڭ هر بريسى بر منبع حكمنه گچديگندن؛ عينًا نماز تسبيحاتندهكى