اولاجقلرينى، فضيلتِ شهادتلرى ده سائر فضائللرينه علاوه ايديلهجگنى إشارت و غيبى بر صورتده إفاده ايدييور.
﴿وَالصَّالِحٖينَ﴾
كلمهسيله أصحابِ صفّه، بدر، رضوان گبى ممتاز ذواته إشارت ايدهرك
﴿وَحَسُنَ اُولٰٓئِكَ رَفٖيقًا﴾
جملهسيله معناىِ صريحيله اونلرڭ إتّباعنه تشويق و تابعينلردهكى تبعيتى چوق مشرّف و گوزل گوسترمكله، معناىِ إشاريسيله خلفاءِ أربعهنڭ بشنجيسى اولارق و
﴿اِنَّ الْخِلَافَةَ بَعْدٖى ثَلَاثُونَ سَنَةً﴾
حديثِ شريفڭ حكمنى تصديق ايتديرن مدّتِ خلافتى آزلغيله برابر قيمتنى عظيم گوسترمك ايچون او معناىِ إشاريسيله حضرتِ حسن رضى اللّٰه عنهى گوسترر.
الحاصل: سورۀِ فتحڭ آخركى آيتى، خلفاءِ أربعهيه باقديغى گبى، بو آيت دخى تأييدًا، إخبارِ غيب نوعندن اونلرڭ إستقبالدهكى وضعيتلرينه قسمًا إشارت صورتيله باقار. ايشته قرآنڭ أنواعِ إعجازندن اولان إخبارِ غيب نوعنڭ لمعاتِ إعجازيهسى آياتِ قرآنيهده او قدر چوقدر كه، حصره گلمز. أهلِ ظاهرڭ قرق أللى آيته حصر ايتمهلرى، نظرِ ظاهرى ايلهدر. حقيقتده ايسه بيڭدن گچر. بعضًا بر آيتده درت بش وجهله إخبارِ غيبى بولونور.
﴿رَبَّنَا لَا تُؤَاخِذْنَٓا اِنْ نَسٖينَٓا اَوْ اَخْطَاْنَا﴾
﴿سُبْحَانَكَ لَا عِلْمَ لَنَٓا اِلَّا مَا عَلَّمْتَنَٓا اِنَّكَ اَنْتَ الْعَلٖيمُ الْحَكٖيمُ﴾
* * *