﴿بِاسْمِهٖ سُبْحَانَهُ ۞ وَ اِنْ مِنْ شَىْءٍ اِلَّا يُسَبِّحُ بِحَمْدِهٖ﴾
معلوم اولسون كه: «زبدة الرسائل عمدة الوسائل» نامنده قطب العارفين ضياء الدّين مولانا شيخ خالد (قُدِّسَ سِرُّهُ)نڭ مكتوبات و رسائلِ شريفهلرندن مقتبس نصايحِ قدسيهنڭ ترجمهسنه دائر بر رسالهيى اون اوچ سنه مقدَّم، بروسهده خواجه حسن أفنديدن آلمشدم. ناصلسه مطالعهسنه موفّق اولامامشدم. تا بوگونلرده كتابلريمڭ ايچريسنده بر شى آراركن أليمه گچدى. ديدم: «بو حضرتِ مولانا خالد، استاديمڭ همشهريسيدر. هم إمامِ ربّانيدن صوڭره، طريقِ نقشينڭ أڭ مهمّ قهرمانيدر. هم طريقِ خالديۀِ نقشيهنڭ پيريدر.» رسالهيى مطالعه ايدركن حضرتِ مولانانڭ ترجمۀِ حالنده شو فقرهيى گوردم:
أصحابِ كتبِ ستّهدن إمامِ حاكم مُسْتَدْرَكنده و أبو داود كتابِ سُنَنِنْده، بيهقى شعبِ ايمانده تخريج بيوردقلرى:
﴿اِنَّ اللهَ يَبْعَثُ لِهٰذِهِ الْاُمَّةِ عَلٰى رَاْسِ كُلِّ مِاَةِ سَنَةٍ مَنْ يُجَدِّدُ لَهَا دٖينَهَا﴾
يعنى «هر يوز سنهده جنابِ حق بر مجدّدِ دين گوندرييور.» حديثِ شريفنه مظهر و ماصدق و مُظْهرِ تام اولان مولانا الشّهير قطب العارفين، غوث الواصلين، وارثِ محمّدى، كامل الطريقة العلية و المجدّدية خالد ذو الجناحيْن قُدِّسَ سِرُّهُ.. إلخ...