ايكنجى وجه:
إنسان، جزئى إرادهسيله و آزيجق علميله و كوچوجك قدرتيله و ظاهرى مالكيتيله و خانهسنى بنا ايتمهسيله، بو كائنات اوستهسنڭ مالكيتنى و صنعتنى و إرادهسنى و قدرتنى و علمنى، كائناتڭ بيوكلگى نسبتنده آڭلار، آيينهدارلق ايدر.
اوچنجى وجهدهكى آيينهدارلغڭ ايكى يوزى وار:
بريسى، أسماءِ إلٰهيهنڭ آيرى آيرى نقشلرينى كندنده گوسترمكدر. عادتا إنسان، جامعيتيله كائناتڭ كوچك بر فهرستهسى و بر مثالِ مصغّرهسى حكمنده اولوب، عموم أسمانڭ نقشلرينى گوسترييور.
ايكنجى يوزى، شئوناتِ إلٰهيهيه آيينهدارلق ايدر. يعنى كندى حياتيله ذاتِ حىّ قيّومڭ حياتنه إشارت ايتديگى گبى، كندى حياتنده إنكشاف ايدن سمع و بصر گبى طويغولرڭ واسطهسيله، ذاتِ حىّ قيّومڭ سمع و بصر گبى صفتلرينه آيينهدارلق ايدر، بيلديرر. هم إنسان حياتنده بولونان و إنكشاف ايتمهين و حسّ و حسّاسيت صورتنده غليان ايدن و كثرتلى بر صورتده اولان چوق اينجه حياتى طويغولر، معنالر و حسلر واسطهسيله، ذاتِ حىّ قيّومڭ شئوناتِ قدسيهسنه آيينهدارلق ايدر. مثلا: او حسّاسيت ايچنده؛ سَوْمك، إفتخار ايتمك، ممنون اولمق، مسرور اولمق، مفرّح اولمق گبى معنالر ايله ذاتِ أقدسڭ قدسيتنه و غناىِ مطلقنه مناسب و لايق اولمق شرطيله، او نوعدن اولان شئوناتنه آيينهدارلق ايدر.
هم إنسان، ناصلكه حياتِ جامعهسيله ذاتِ ذو الجلالڭ صفات و شئوناتنه بر مقياسِ معرفتدر و جلوۀِ أسماسنه بر فهرستهدر و شعورلى بر آيينهدر.. و هكذا چوق جهتلرله ذاتِ حىّ قيّومه آيينهدارلق ايدر. اويله ده: إنسان، شو كائناتڭ حقائقلرينه بر واحدِ قياسيدر، بر فهرستهدر، بر مقياسدر و بر ميزاندر. مثلا: كائناتده لوحِ محفوظڭ غايت قطعى بر دليلِ وجودى و بر نمونهسى، إنساندهكى قوّۀِ حافظهدر و