أزلينڭ عظمتِ خطابنه، حدسز قلبلردن و ديللردن چيقان سسلر، دعالر، ذكرلر ايله مقابله ايدييور. او سسلر، دعالر، ذكرلر بربرينه تساند ايدهرك و بربرينه يارديم ايدوب إتّفاق ايدهرك اويله گنيش بر صورتده معبودِ أزلينڭ الوهيتنه قارشى بر عبوديت گوسترييور كه؛ گويا كُرۀِ أرض كنديسى او ذكرى سويلهيور، او دعايى ايدييور و أقطاريله نماز قيلييور و أطرافيله سماواتڭ فوقنده عزّت و عظمتله نازل اولان (اَقٖيمُوا الصَّلٰوةَ) أمرينى، كُرۀِ أرض إمتثال ايدييور. بو سرِّ إتّحاد ايله، كائنات ايچنده بر ذرّه گبى ضعيف، كوچك بر مخلوق اولان شو إنسان، عبوديتڭ عظمتى جهتيله خالقِ أرض و سماواتڭ محبوب بر عبدى و أرضڭ خليفهسى، سلطانى و حيواناتڭ رئيسى و خلقتِ كائناتڭ نتيجهسى و غايهسى اولويور.
أوت أگر نمازلرڭ آرقهسنده خصوصًا بايرام نمازلرنده بر آنده اللّٰه أكبر ديين يوزر ميليون إنسانلرڭ سسلرى، عالمِ غيبده إتّحاد ايتدكلرى گبى، عالمِ شهادتده دخى بربريله إتّحاد ايدوب إجتماع ايتسه؛ كُرۀِ أرض تماميله بيوك بر إنسان اولوب، عظمتنه نسبةً بيوك بر صدا ايله سويلهديگى اللّٰه أكبره مساوى گلديگندن، او موحّدينڭ إتّحادى ايله بر آنده اللّٰه أكبر ديمهلرى، كُرۀِ أرضڭ بيوك بر اللّٰه أكبرى حكمنه گچييور. عادتا بايرام نمازلرنده عالمِ إسلامڭ ذكر و تسبيحيله زمين زلزلۀِ كبرايه مظهر اولوب، أقطار و أطرافيله اللّٰه أكبر دييوب، قبلهسى اولان كعبۀِ مكرّمهنڭ صميمى قلبيله نيّت ايدوب، مكّه آغزيله، جبلِ عرفه ديليله اللّٰه أكبر دييهرك، او تك كلمه أطرافِ أرضدهكى عموم مؤمنلرڭ مغارهمثال آغزلرندهكى هواده تمثّل ايدييور. بر تك اللّٰه أكبر كلمهسنڭ عكسِ صداسيله حدسز اللّٰه أكبر وقوع بولديغى گبى، او مقبول ذكر و تكبير، سماواتى دخى چينلاتوب برزخ عالملرينه ده تموّج ايدهرك صدا ويرييور.