اون يدنجى لمعه
(زهرهدن گلمش «اونبش نوطه»دن عبارتدر.)
﴿بِسْمِ اللّٰهِ الرَّحْمٰنِ الرَّحٖيمِ﴾
مقدّمه
بو لمعهنڭ تأليفندن اون ايكى سنه أوّل (*) عنايتِ ربّانيه ايله، معرفتِ إلٰهيهده بر حركتِ فكريه و بر سياحتِ قلبيه و بر إنكشافاتِ روحيهده تظاهر ايدن بعض لمعاتِ توحيديهيى عربى اولارق نوطهلر صورتنده زهره، شعله، حبّه، شَمَّه، ذرّه، قطره گبى رسالهلرده قيد ايتمشدم. اوزون بر حقيقتڭ يالڭز بر اوجنى گوسترمك و پارلاق بر نورڭ يالڭز بر شعاعنى إرائه ايتمك طرزنده يازيلديغندن، يالڭز كندى كنديمه برر خاطره و برر إخطار شكلنده اولديغندن، باشقهلرينڭ إستفادهسى محدود قالمشدى. خصوصًا أڭ ممتاز و أڭ خاص قارداشلريمڭ قسمِ أعظمى عربى اوقومهمشلر. بونلرڭ إصرارى و إلحاحيله او نوطهلرڭ، او لمعهلرڭ قسمًا ايضاحلى و قسمًا قيصه بر مئالنى توركجه اولارق يازمغه مجبور اولدم. شو نوطهلر و عربى رسالهلر، يڭى سعيدڭ أڭ أوّل
___
(❊):اون ايكى سنه أوّل دينيلن تاريخ؛ هجرى ١٣٤٠، ميلادى ١٩٢١ سنهلريدر.