اوچنجى أماره:
علماء بحثنڭ أوّلكى سطرنده دييور:
﴿فَمَنْ اَرَادَ اللهُ اَنْ يُعٖينَهُ﴾ (حاشيه-١) ﴿اَتْحَفَهُ بِهٰذِهِ السَّكٖينَةِ﴾ (حاشيه-٢)
إسمِ أعظم بحثنده
___
(حاشيه-١): بو سطرده غوثڭ (تَعٖيشُ سَعٖيدًا) فقرهسندهكى سعيد لفظى (يُعٖينَهُ) دخى عينًا (سكينه) ينه عينًا گوسترييورلر. هر بريسى (سَعٖيدًا) اولويور. ديمك غوث گبى، بو فقره سعيد ايله قونوشويور. (هـ) حرفى بشدر. دردى (د) در، برى (د) اوستندهكى تنويندن گلن وقف ايچون ألفه مقابلدر.
(حاشيه-٢): جاىِ دقّتدر كه؛ بو ايكى سطر معنا إعتباريله طوغريدن طوغرىيه رسالۀِ نور ناشرينه باقديغى گبى، جفر و أبجد حسابيله ينه باقييور. چونكه (اَتْحَفَهُ بِهٰذِهِ السَّكٖينَةِ) جفر و أبجد حسابيله بيڭ اوچيوز قرق طوقوز (١٣٤٩) تاريخنى گوسترييور كه؛ رسالۀِ نورڭ غالبانه إنتشار و تكمّل تاريخيدر. ايكنجى سطر (فَكُلُّ مَنْ لَاحَتْ لَهُ السَّعَادَةُ ۞ كَانَ لَهُ فِى الْجٖيدِ كَالْقِلَادَةِ) ينه جفر و أبجد حسابيله بيڭ اوچيوز يگرمى طوقوز (١٣٢٩) ايدييور كه؛ رسالۀِ نور ناشرينڭ حقيقى مبدأِ مجاهدهسى تاريخيدر. يالڭز بو (السَّعَادَةُ) و (الْقِلَادَةِ) دهكى ايكى «ت» وقفه راست گلدكلرى ايچون قاعدةً «هـ» صاييليرلر.
الحاصل: بو ايكى سطر اوچ جهتله رسالۀِ نور ناشرينه باقييور. برنجيسى: إسمِ أعظمى تضمّن ايدن آلتى إسمڭ اوڭا هديه ايديلديگنى و اونڭله محافظه ايديلمسى عينًا واقع اولمش و اولمقدهدر. ايكنجيسى: (يُعٖينَهُ) جفرجه سعيد، (السَّكٖينَةِ) جفرجه ينه سعيد، (السَّعَادَةُ) معنًا و لفظجه ينه سعيد اولويور. اوچنجيسى: أوّلكى سطر رسالۀِ نورله مجاهدهنڭ بوگوننى، ايكنجى سطر مجاهدهنڭ مبدئنى تام تامنه تاريخيله گوسترييور. ايشته بو ايكى سطر رسالۀِ نور ناشرينڭ يگرمى سنهلك مجاهداتنڭ برى مبدأ، ديگرى منتهاسنى گوسترمسى ألبته تصادف اولاماز. بلكه مجاهدهنڭ مقبوليتنه بر إشارتِ غيبيهدر و حضرتِ علىنڭ (رض) بر سكّۀِ تصديقيدر.
سليمان رشدى، خسرو