حديث ظن ايديلهرك رسولِ أكرم عليه الصلاة والسلامه إسناد ايديلمش.
﴿رَبَّنَا لَا تُؤَاخِذْنَٓا اِنْ نَسٖينَٓا اَوْ اَخْطَاْنَا﴾
﴿سُبْحَانَكَ لَا عِلْمَ لَنَٓا اِلَّا مَا عَلَّمْتَنَٓا اِنَّكَ اَنْتَ الْعَلٖيمُ الْحَكٖيمُ﴾
ايكنجى سؤال:
آلِ عبا حقّندهدر.
قارداشم؛ آلِ عبا حقّندهكى جوابسز قالان سؤالڭزڭ چوق حكمتلرندن يالڭز بر تك حكمتى سويلهنهجك. شويله كه: رسولِ أكرم عليه الصلاة والسلام، گيديگى مبارك عباسنى، حضرتِ على (رض) و حضرتِ فاطمه (رض) و حضرتِ حسن و حسينڭ (رض) اوستلرينه اورتمهسى و اونلره بو صورتله (لِيُذْهِبَ عَنْكُمُ الرِّجْسَ اَهْلَ الْبَيْتِ وَيُطَهِّرَكُمْ تَطْهٖيرًا) آيتيله دعا ايتمهسنڭ أسرارى و حكمتلرى وار. سرلرندن بحث ايتميهجگز. يالڭز وظيفۀِ رسالته تعلّق ايدن بر حكمتى شودر كه:
رسولِ أكرم عليه الصلاة والسلام، غيبآشنا و إستقبالبين نظرِ نبوّتله اوتوز قرق سنه صوڭره صحابهلر و تابعينلر ايچنده مهمّ فتنهلر اولوب قان دوكولهجگنى گورمش. ايچنده أڭ ممتاز شخصيتلر، عباسى آلتنده اولان او اوچ شخصيت اولديغنى مشاهده ايتمش. حضرتِ علىيى (رض) اُمّت نظرنده تطهير و تبرئه ايتمك و حضرتِ حسينى (رض) تعزيه و تسلّى ايتمك و حضرتِ حسنى (رض) تبريك ايتمك و مصالحه ايله مهمّ بر فتنهيى قالديرمقله شرفنى و أمّته عظيم فائدهسنى إعلان ايتمك و حضرتِ فاطمهنڭ ذرّيتنڭ طاهر و مشرّف اولاجغنى و أهلِ بيت عنوانِ عاليسنه لايق اولاجقلرينى إعلان ايتمك ايچون او درت شخصه كنديله برابر «خمسۀِ آلِ عبا» عنواننى بخش ايدن او عبايى اورتمشدر.