ايتسهڭ، پك شدّتلى بر تأديبه و دهشتلى بر تعذيبه مستحق اولاجغنى دوشونمييور ميسڭ؟ دنياده حپسڭ قورقوسندن أڭ آغير ايشلرده فتورسز خدمت ايتديگڭ حالده؛ جهنّم گبى بر حپسِ أبدينڭ خوفى، أڭ خفيف و لطيف بر خدمت ايچون سڭا غيرت ويرمييور مى؟
بشنجى ايقاظ: أى دنياپرست نفسم! عجبا عبادتدهكى فتورڭ و نمازدهكى قصورڭ مشاغلِ دنيويهنڭ كثرتندن ميدر وياخود دردِ معيشتڭ مشغلهسيله وقت بولاماديغڭدن ميدر؟ عجبا صِرف دنيا ايچون مى ياراتيلمشسڭ كه، بتون وقتڭى اوڭا صرف ايدييورسڭ!
سن إستعداد جهتيله بتون حيواناتڭ فوقنده اولديغنى و حياتِ دنيويهنڭ لوازماتنى تداركده إقتدار جهتيله، بر سرچه قوشنه يتيشهمديگڭى بيلييورسڭ. بوندن نهدن آڭلاميورسڭ كه، وظيفۀِ أصليهڭ حيوان گبى چابالامق دگل؛ بلكه حقيقى بر إنسان گبى، حقيقى بر حياتِ دائمه ايچون سعى ايتمكدر.