سعيد النورسى، بعضًا بر طلبهسنه رسالۀِ نوردن اوقويوويرمك نعمتنى لطف ايتديگى زمان دير كه: «بو بنم درسمدر. بن كندم ايچون اوقويورم. بو رسالهيى، شيمدىيه قدر بلكه يوز دفعه اوقومشم. فقط، شيمدى يڭى گورويورم گبى تكرار اوقومغه إحتياج و إشتياقم وار.»
هم ينه دير كه: «بن باشقهلرى ايچون كتاب يازمامشم. كندم ايچون يازمشم. قرآندن بولديغم بو دوالريمى آرزو ايدنلر اوقويهبيلير.» أوت، بديع الزمان إعتقاد ايدييور و دييور كه: «بن درسه، تربيهيه و نفسمى إصلاحه محتاجم.»
بديع الزمان سعيد النورسى بتون حياتنده، شان و شهرتدن، حرمتدن قاچمش و إنسانلردن إستغنا ايتمشدر. عربى بر أثرنده، شهرت حقّنده دييور كه: «شهرت، عينِ ريادر و قلبى ئولديرن زهرلى بر بالدر. إنسانى، إنسانلره عبد و كوله ياپار. يعنى، نام و شهرت ايستهين آدم؛ خلقلره كندينى بگنديرمك، سَوْديرمك ايچون إنسانلره رياكارلق، دالقاووقلق ياپار. تصنّعكار طورلر طاقينير. او بلا و مصيبته دوشرسهڭ (اِنَّا لِلّٰهِ وَاِنَّٓا اِلَيْهِ رَاجِعُونَ) ده.»
استاد، شهرتدن فعلًا و حالًا بو قدر قاچماسنه رغمًا، هر نه حكمتسه، إنسانلر عادتا بر سَوقِ إلٰهى وارمش گبى إستمدادكارانه اوڭا قوشمشلردر و اوڭا آقين ايتمكدهدرلر. و اونڭ محضِ حق اولان بو قدسى سجيهسى، رسالۀِ نور گبى جهانشمول بر أثره خادم اولمشدر.
بديع الزمان كوچك ياشندن بَرى، خلقلرڭ مقابلسز هديهلرندن إستغنا ايتمشدر. هديه قبول ايتمهمگى مسلك ايدينمشدر. زنداندن زندانه، مملكتدن مملكته سورگون ايديلديگى زمانلرده، إختيارلغڭ تحميل ايتديگى ضرورتلر ايچنده دخى بو سكسان سنهلك إستغنا دستورينى بوزمامشدر. أڭ خاص بر طلبهسى، بر لقمه بر شى هديه ايتسه مقابلنى ويرر؛ ويرمسه طوقونور.
نهدن هديه قبول ايتمديگنڭ سببلرندن بريسى اولارق دير كه: «بو زمان، أسكى زمان گبى دگلدر. أسكى زمانده ايمانى قورتاران اون أل وارسه شيمدى بره اينمش. ايمانسزلغه سَوق ايدن سببلردن أسكيدن اون ايسه شيمدى يوزه چيقمش. ايشته بويله بر زمانده ايمانه خدمت ايچون دنيايه أل آتمادم، دنيايى ترك ايتدم. خدمتِ ايمانيهمى هيچ بر شيئه آلَت ايتميهجگم.» دير. حضرتِ استاد، كندى شخصى ايچون بريسى زحمت چكسه، بر خدمتنى گورسه مقابلنده بر اجرت، بر تبرّك ويرر. عكسى حالده روحنه آغير گلير، خوشنه گيتمز.
بديع الزمان سعيد النورسى؛ قرآن، ايمان و دينه ياپديغى خدمتنده، يگرمى بش سنهدن بَرى متمادى بر ترصّد و تجسّس، تعقيبات و تدقيقات آلتنده بولونديريلمشدر. يالڭز و يالڭز رضاىِ إلٰهى ايچون يالڭز و يالڭز حقيقت ايچون إسلاميته خدمت ايتديگى و خدمتِ قرآنيهسنى هيچ بر شيئه آلَت ايتمديگى متعدّد محكمهلرده ده ثابت اولمشدر.
أگر بو مذكور حقيقتلره و أثرلرندهكى حق و حقيقتى گورن حقپرستلرڭ، بديع الزمان و أثرلرنده گوردكلرى و نشر ايتدكلرى عالى مزيت و يوكسك حقيقته مغاير أڭ كوچك بر شى اولسه ايدى، أڭ بيوك علاوهلرله، شعشعهلرله و يايغارهلرله، بو يگرمى بش سنه ايچنده، دين دشمنلرى طرفندن دنيايه إعلان ايديلهجك ايدى.
نتهكيم بتون بتون إفترا و إتهاملرله، جبّار، مستبد دين دشمنلرينڭ تحريكاتيله محكمهلره سَوق ايديلديگى زمان، غزتهلرڭ برنجى صحيفهلرنده، بره يوز علاوهلرله تشهير ايتديريلمسى؛ تحقيقات و محاكمهده هيچ بر صوچ اولماديغى تحقّق ايدهرك برائت ايتديگى وقت سكوت ايديلمسى؛ بو حقيقتڭ آشكار چوق دليللرندن بر دانهسيدر.
بديع الزمان، دين قارداشلرينه زياده شفقتليدر. اونلرڭ ألملريله ألم چكديگى، إسلام دنياسنده حرّيت و إستقلال ايچون جان ويرن، فدائى إسلام مجاهدلرينڭ آجيلريله مضطرب اولديغى، قرآن و إسلاميته ياپيلان ضربهلر آننده چوق إضطرابلر چكديگى، بويله آجى آجيلرڭ تأثيراتيله، ذاتًا پك آز يديگى بر پارچه چورباسنى ده ييهمديگى چوق دفعه گورولمش و گورولمكدهدر.
أكثر گونلرى خستهلقلر و صيقنتيلرله گچمكدهدر. بر نور طلبهسنڭ يازديغى گبى «أى ملّتِ إسلامڭ أبدى رفاه و سعادتى ايچون دنياده راحتلق گورمهين مشفق استادم! سنڭ دوام ايدن خستهلقلرڭ جسمانى دگلدر. دينمزه إجرا ايديلن إستبداد و ظلم صوڭه ايرمدكجه، عالمِ إسلام قورتولمدقجه سنڭ إضطرابڭ ديڭميهجكدر.» أوت، بز ده بو قناعتدهيز.
فقط او أليم آجيلر، بديع الزمانى أصلا يأسه دوشورمهمش، بِالعكس اويله كلّى و عمومى بر دينى جهاده و دعا و عبوديته سَوق ايتمشدر كه: «قورتولوشڭ چارۀِ يگانهسى، قرآنه صاريلمقدر.» ديمش و صاريلمش. قرآنده بولديغى دوا و درمانلرى قلمه آلارق، بو زمانده بر خلاصكارِ إسلام و نوعِ بشرڭ سعادتنه مدار اولان رسالۀِ نور أثرلرينى ميدانه گتيرمشدر.
خونخار دين دشمنلرينڭ دنيوى سطوت و شوكتلرى، بديع الزمانى قطعيًا عطالته دوشورتهمهمشدر.» وظيفهم قرآنه خدمتدر. غالب ايتمك، مغلوب ايتمك جنابِ حقّه عائددر.» دييه ايمان ايدهرك بر آن بيله فعاليتدن گرى قالمامشدر. أوت حضرتِ استاد، اويله بر همّتِ عظيمهيه مالكدر كه اوڭا إجرا ايديلن مدهش مظالم، بو همّتڭ مقابلنده تأثيرسز قالمغه محكوم اولمشدر.
بديع الزمان، أرض و سماواتدهكى موجوداتى، حيرت و إستحسانله تماشا ايدر. قيرلرده و طاغلرده خصوصًا بهار موسمنده چوق گزينتى ياپار. او سيرانگاهلرده ذهنًا مشغوليت و دقيق بر تفكّر و دائمى بر حضور حالندهدر. آغاج و نباتات و چيچكلرى (مَا شَاءَ اللّٰهُ بَارَكَ اللّٰهُ فَتَبَارَكَ اللّٰهُ اَحْسَنُ الْخَالِقٖينَ) و «نه گوزل ياراديلمشلر.» دييهرك عبرت نظريله اونلرى سير ايدر، كائنات كتابنى اوقور. هر آزه و حاسّهلرى گبى گوزينى ده دائما جنابِ حق حسابنه و إذنى دائرهسنده چاليشديرر. گوزى، شو كتابِ كبيرِ كائناتڭ بر مطالعهجيسى و شو عالمدهكى معجزاتِ صنعتِ ربّانيهنڭ بر سيرجيسيدر. و شو كُرۀِ أرض باغچهسندهكى رحمت چيچكلرينڭ بر مبارك آريسى درجهسندهدر.
استاد، خصوصى حياتنده متواضع، وظيفه باشنده وقوردر. تواضع و محويتده نمونۀِ مثال اولاجق بر مرتبهدهدر. بو موضوعده دير كه: «بر نفر نوبتده ايكن باش قوماندان ده گلسه سلاحنى بيراقميهجق. بن قرآنڭ بر خدمتكارى و بر نفرىيم. وظيفه باشنده ايكن قارشيمه كيم چيقارسه چيقسين، حق بودر ديرم، باشمى أگمهم.»
خلاصه اولارق أرض ايدرز كه: بديع الزمان، إخلاصِ تامّهيه مالك، خارق العاده، حقيقى بر مفسّرِ قرآندر. هم إخلاصِ أتمّه واصل اولمش، قهرمان و يكتا بر خادمِ قرآندر. رسالۀِ نورڭ مؤلّفى اولمق إعتباريله هم بر متكلّمِ أعظمدر هم علمده غايت درجهده متبحّر و راسخ، محقّق و مدقّق بر علّامهدر هم علمِ منطغڭ يوكسك، نظيرسز بر استاديدر. تعليقات نامندهكى تأليفاتى، منطقده بر شاه أثردر. هم ممتاز و حقپرست و حقيقتبين بر داهيدر هم قرآنله باريشيق مستقيم فلسفهنڭ حقيقتپرور بر فيلسوفيدر هم نظيرسز بر سوسيولوغ (إجتماعياتجى) و بر پسيقولوغ (روحياتجى) و بر پدهغوغدر (تربيهجى) هم دائما حقيقتى ترنّم ايتمش و ايدن، يوكسك و أمثالسز و داهى بر مؤلّف و أديبدر.
سعيد النورسى، سنهلردن بَرى شدّتلى بر إستبداد و تقييدات آلتنده بولونديريلوب طانيتديريلمديغى و هم ده كنديسى، شخصى كمالاتنى ستر ايتديگى، گيزلديگى ايچون مذكور صفتلرڭ هر بريسنه مطّلع اولاميان بولونهبيلير. هم بونلر و هم رسالۀِ نورڭ خصوصيتلرى حقّندهكى بياناتمز، حقيقتپرور و فضيلتپرور بر قسم علماءِ حقيقينڭ و أهل اللّٰهڭ إتّفاق و إجماع قوّتندهكى حكملريدر. هم ده بزم قطعى قناعتلريمزدر.
بديع الزمانڭ، مذكور علم و صفتلره مالك اولديغنه أڭ معتبر و أڭ برنجى و أڭ حقيقى دليلمز، بديع الزمان سعيد النورسىدر. كيمڭ شبههسى وارسه رسالۀِ نورى اوقوسون. أوت، بز ذكر ايتديگمز و ايدهجگمز بو حقائقِ عظمايى، بتون إسلام دنياسنه و عموم بشريت عالمنه إفشا و إعلان ايدييورز. أوت، بيڭ سنهدن بَرى عالمِ إسلاميت و إنسانيت، رسالۀِ نور گبى بر أثره إنتظار ايدييوردى.
بديع الزمان سعيد النورسى، چوق علملرده مستثنا برر أثر يازهبيليردى. فقط او «زمان، ايمانى قورتارمق زمانيدر.» ديمش و بتون همّت و مساعيسنى و حياتنى، علومِ ايمانيهنڭ تأليف و نشرينه حصر ايتمشدر.
أوت، حضرتِ استاد علومِ ايمانيهيى نشر ايتمكله، عالمِ إسلام و عالمِ إنسانيتى حياتدار و ضيادار أيلهمشدر. جنابِ حق، او بيوك استاددن أبديًا راضى اولسون، اوزون عمرلر ويرسين، آمين آمين آمين!
رسالۀِ نور، قرآنِ معجز البيانڭ بو عصرده بر معجزۀِ معنويهسى اولان يوكسك و پارلاق بر تفسيريدر. أوت، رسالۀِ نور قلبلرڭ فاتحى و محبوبى، روحلرڭ سلطانى، عقللرڭ معلّمى، نفسلرڭ مربّى و مزكّيسيدر. رسالۀِ نورڭ بر خصوصيتى ده مكتوباتڭ برنجى جلدينڭ يوز يگرمى طوقوزنجى صحيفهسندهكى شو بحثدر: «بعض سوزلرده، علماءِ علمِ كلامڭ مسلگيله، قرآندن آلينان منهاجِ حقيقينڭ فرقلرى حقّنده شويله بر تمثيل سويلهمشز كه مثلا، بر صو گتيرمك ايچون بعضلرى كنگان (صو بوروسى) ايله اوزاق يردن، طاغلر آلتنده قازار، صو گتيرر. بر قسمى ده هر يرده قويو قازار، صو چيقارير. برنجى قسم چوق زحمتليدر. طيقانير، كسيلير. فقط هر يرده قويولر قازوب صو چيقارمغه أهل اولانلر؛ زحمتسز، هر بر يرده صويى بولدقلرى گبى…
عينًا اويله ده علماءِ علمِ كلام، أسبابى، نهايتِ عالمده تسلسل و دورڭ محاليتى ايله كسوب، صوڭره واجب الوجودڭ وجودينى اونڭله إثبات ايدييورلر. اوزون بر يولده گيديلييور. امّا قرآنِ حكيمڭ منهاجِ حقيقيسى ايسه هر يرده صويى بولويور، چيقارييور. هر بر آيتى، برر عصاىِ موسى گبى نرهيه وورسه آبِ حيات فيشقيرتييور. (وَفٖى كُلِّ شَىْءٍ لَهُ اٰيَةٌ تَدُلُّ عَلٰى اَنَّهُ وَاحِدٌ) دستورينى هر شيئه اوقوتديرييور.
هم ايمان يالڭز علم ايله دگل، ايمانده چوق لطائفڭ حصّهلرى وار. ناصل كه بر يمك معدهيه گيرسه او يمك مختلف أعصابه، مختلف بر صورتده إنقسام ايدوب توزيع اولونويور. علم ايله گلن مسائلِ ايمانيه دخى عقل معدهسنه گيردكدن صوڭره، درجاته گوره روح، قلپ، سرّ، نفس و هكذا… لطائف، كندينه گوره برر حصّه آلير، مصّ ايدر. أگر اونلرڭ حصّهسى اولمازسه نقصاندر.» ايشته رسالۀِ نور هر يرده صويى بولويور، چيقارتييور. أوّلجه گيديلن اوزون يولى قيصهلتييور و مستقيم و سلامتلى ياپييور.
أسكى حكما، أحكامِ شرعيهدن بعضلرى ايچون: «بو نقلدر، ايمان ايدرز، عقل بوڭا يتيشهمز.» ديمشلر. حالبوكه بو عصرده عقل حكم ايدييور. بديع الزمان سعيد النورسى ايسه «بتون أحكامِ شرعيه عقليدر. عقلى اولديغنى إثباته حاضرم.» ديمشدر و رسالۀِ نورده إثبات ايتمشدر.
رسالۀِ نورده مستثنا بر أدبيات و بلاغت و ايجاز؛ نظيرسز، جاذب و اوريژينال بر اُسلوب واردر. أوت، بديع الزمان ذاتنه مخصوص بر اسلوبه مالكدر. اونڭ اسلوبى، باشقه اسلوبلرله موازنه و مقايسه ايديلهمز. أثرلرڭ بعض يرلرنده، أدبيات قاعدهسنه ويا باشقه اُسلوبلره نظرًا پك مناسب دوشمهمش گبى ظن ايديلن بر نقطهيه راستلانيرسه اوراده غايت اينجه بر نكته، بر ايما ويا اينجه بر معنا ويا حكمت واردر. و او بيان طرزى، اورايه تام موافقدر. فقط او اينجه اينجهلگى، عالملر ده بردن پك آڭلامدقلرينى إعتراف ايتمشلردر. بونڭ ايچون بديع الزمانڭ أثرلرندهكى خصوصيت و اينجهلكلره، رسالۀِ نورله فضله إشتغال ايتمهمش اولانلر، بردن إنتقال ايدهمزلر.
بيوك شاعريمز، أدبياتمزڭ مدارِ إفتخارى مرحوم محمد عاكف، بر اُدَبا مجلسنده «ويكتور هوغولر، شكسپرلر، دقارتلر؛ أدبياتده و فلسفهده، بديع الزمانڭ بر طلبهسى اولابيليرلر.» ديمشدر.
أديب و شاعرلر، زوال و فراقدن آغلامشلر، ئولومدن واويلا ايتمشلردر. گوز موسمنى حزنله تصوير ايتمشلردر. حتّى دنياجه مشهور عرب أديبلرى «أگر فراق اولماسه ايدى، ئولوم روحلريمزى آلمق ايچون يول بولوب گلهمزدى.» معناسنده (لَوْلَا مُفَارَقَةُ الْاَحْبَابِ مَا وَجَدَتْ لَهَا الْمَنَايَا اِلٰى اَرْوَاحِنَا سُبُلًا) ديمشلردر.
بديع الزمان ايسه «كائناتدهكى زوال، فراق و عدم ظاهريدر. حقيقتده فراق يوق، وصال وار. زوال و عدم يوق، تجدّد وار. و كائناتده هر شى، بر نوع بقايه مظهردر. ئولوم، بو عالمِ فانيدن عالمِ باقيه گيتمكدر. ئولوم، أهلِ هدايت و أهلِ قرآن ايچون اوتهكى عالمه گيتمش أسكى دوست و أحبابلرينه قاووشمغه وسيلهدر. هم حقيقى وطنلرينه گيرمگه واسطهدر. هم زندانِ دنيادن، بوستانِ جنانه بر دعوتدر. هم رحمٰنِ رحيمڭ فضلندن، كندى خدمتنه مقابل أخذِ اجرت ايتمگه بر نوبتدر. هم وظيفۀِ حيات كلفتندن بر ترخيصدر. هم عبوديت و إمتحانڭ تعليم و تعليماتندن بر پايدوسدر. عزرائيل عليه السلام بوگون گلسه خوش گلدڭ، صفا گلدڭ دييه گولهرك قارشيلايهجغم.» دييور.
بديع الزمان، بشرى رسالۀِ نورله سفاهت و ضلالتدن قورتاريركن، قورقو و دهشت ويرمك طرزينى تعقيب ايتمييور. غيرِ مشروع بر لذّتڭ ايچنده، يوز ألمى گوستروب حسّى مغلوب ايدييور. قلب و روحى حسّياته مغلوب اولمقدن محافظه ايدييور. رسالۀِ نورده موازنهلرله كفر و ضلالتده، بر زقّومِ جهنّم تخمى اولديغنى و دنياده دخى جهنّم عذابلرى چكديرديگنى و ايمان و إسلاميت و عبادتده، بر جنّت چكردگى و لذيذ لذّتلر و ذوقلر و جنّت ميوهلرى بولونديغنى، دنياده دخى بر نوع مكافاته نائل أيلهديگنى إثبات ايدييور.
رسالۀِ نور؛ نفاق و شقاقى، تفرقهيى، فتنه و فسادى قالديروب قارداشلغى، اخوّتِ دينيهيى، تساند و تعاونى يرلشديرر. رسالۀِ نور مسلگنڭ بر أساسى ده بودر. رسالۀِ نور؛ غرور و كبر و خودفروشلق و ذلّت گبى أخلاقِ سيّئهدن قورتارهرق تواضع و محويت و عزّت و وقار گبى گوزل أخلاقلره صاحب قيلار.
رسالۀِ نور، إنسان اولان بر إنسانه، عجز و فقرينى درك ايتديرر. بديع الزمان دير كه: «إنسان، عجز و فقرينى آڭلامقله، تام مسلمان و عبد اولور.»
بو دينسزلرى مغلوب ايتمك ايچون يڭى تحصيلى ده ياپالم ديينلر ويا ياپانلر، نور رسالهلرينى دوام و ثباتله مطالعه ايدهرك، بو هدفلرينه واصل اولورلر و چارۀِ يگانه ده بودر. هم بويلهلكله، مكتب معلوماتلرى ده معارفِ إلٰهيهيه إنقلاب ايدر.
أى، بيڭ سنهدن بَرى إسلاميتڭ بايراقدارلغنى ياپان بر ملّتڭ طورونلرى اولان جنگاور روحلى قارداشلرم! بو زمانڭ و گلهجك عصرلرڭ مسلمانلرى و بزلر، قرآنِ عظيم الشانڭ تفسيرى اولان اويله بر رهبره محتاجز كه تحقيقى ايمان درسلريله، ايمان مرتبهلرنده ترقّى و تعالى ايتديرسين. هم قورقاق دگل، بِالعكس رسالۀِ نور طلبهلرى گبى جسور و قهرمان و فعّال و عملِ صالح صاحبى، متديّن، متّقى و بونڭله برابر، شخصى راحتلق و منفعتلرينى ايمان و إسلاميتڭ قورتولوشى اوغرنده فدا ايدن، فدائى و مجاهد مسلمانلر يتيشديرسين، نهمه لازمجيلقدن قورتارسين. هم تعرّض و إشكنجهلر و ئولوم إحتماللرى قارشيسنده، تحقيقى ايمان قوّتندن گلن بر جسارتله، قرآن و إسلاميت جبههسندن أصلا چكيلمهين، «ئولورسم شهيدم، قاليرسهم قرآنڭ خدمتكارىيم.» ديين و ييلغينلق حالنه دوشمهين صادق و إخلاصلى، يالڭز اللّٰه رضاسى ايچون خدمت ايدن، نور طلبهلرى گبى إسلاميت خادملرى يتيشديرسين، بويله معزّز مسلمانلر ميدانه گتيرسين.
أوت، بو عصره اويله بر قرآن تفسيرى لازم و ألزمدر كه رسالۀِ نور گبى عقل، فكر و منطغى چاليشديرسين، روح و قلب و وجدانى تنوير ايتسين. مسلمانلرى، بشرى اويانديرسين؛ إنتباه ويرسين، غفلتدن قورتارسين. صراطِ مستقيم اولان قرآن يولنى گوسترسين. سنّتِ سنيهيه و إسلاميتڭ شعائرينه مخالف اولارق ياپديريلان و ياپيلان شيلرى فرق ايتديروب، سنّتِ پيغمبرىيه عليه الصلاة والسلام إتّباعى درس ويرسين و إحيا ايتمك جهدينى اويانديرسين.
ايشته رسالۀِ نورڭ بويله خاصيتلرى حاوى بر قرآن تفسيرى اولديغى، اوتوز سنهدن بَرى ميداندهدر و أهلِ حقيقتڭ تصديقيله ثابتدر. هم امانسز دين دشمنلرينڭ پلانلريله محكمهلره سوروكلهنن رسالۀِ نور طلبهلرينڭ مدافعهلرى و بو طلبهلرڭ إسلاميته خدمتلرى أثناسنده، گيزلى إسلاميت دشمنى، إنصافسز، جبّار ظالملرڭ أنتريقهلريله معروض قالدقلرى إشكنجهلردن ييلمامق، شخصلرينى دوشونمهدن، يعنى شخصى رفاهلرينى إسلامڭ رفاه و سعادتى ايچون فدا ايدهرك، صدّيقيتله ثبات ايتمهلرى و أشدِّ ظلمه مقاومت ايتمهلرى آشكار بر دليل تشكيل ايتمكدهدر.
أوت، هم يگرمى بش سنهدن بَرى رسالۀِ نورله ايمان خدمتنه بتون وارلغنى وقف ايدن و شيمدىيه قدر «غدّار دين دشمنلرينڭ» چوق دفعهلر تجاوز و تعرّضنه و تحرّياته معروض قالديغى حالده، يگرمى بش سنهدر إنزوا ايچنده، رسالۀِ نورڭ ناشرلگنى ياپان نور قهرمانلرى آغابگلريمز، بزلره برر نمونۀِ إمتثال اولان، ايمان و إسلاميت فدائيلريدر.
ايشته بز مسلمانلر، بويله بر تفسيرِ قرآن آرايور، بويله بر هادىيى بكلييوردق. او إخلاصلى نور طلبهلرى كه «جنابِ حق، حفيظدر. بن اونڭ عنايتى و حمايتى آلتندهيم. باشمه نه گلسه خيردر.» دييه ايمان ايتمكله برابر عمل ايدرلر. ايمان خدمتنى ياپارلر. دين دشمنلرينه ياقالانمهمق و جانلرندن قيمتلى اولديغنه ايناندقلرى نور رسالهلرينى اونلره قاپديرمهمق ايچون ده إحتياط ايدرلر. شخصلرينه گلهجك ضررلرى نظرِ إعتباره آلمادن خدمتلرينه دوام ايدرلر. حپسه، زندانه آتيلوب، إشكنجه ياپيلديغى زمانده، اونلر ينه استادلرى بديع الزمان ايله علاقهداردرلر. أگر گيزليجه بر إمكان بولورلرسه اونلر ينه رسالۀِ نور ايله مشغولدرلر. حتّى «بلكه حپسه آتيليرم، نور رسالهلريمى ويرمزلر، چاليشمقدن محروم قاليرم.» دييه بعض نورلرى أزبرلهين طلبهلر ده اولمشدر.
مخلص بر نور طلبهسى، حپسخانهدن چيقاريلديغى وقت؛ گويا او قيرباجلى، فلقهلى، درلو درلو إشكنجهلى حپسخانه، اوڭا بر قوّت، بر أنرژى قايناغى اولمش، صداقت و تيقّظله نور خدمتنده قوشديرمق ايچون بر قيرباج تأثيرى ياپمش گبى استادينه داها زياده ياقينلاشير و أسكيسندن داها فضله نورلره چاليشير، نشريات ياپار.
آفيون حادثهسنده، بديع الزمان حپسده ايكن معلّم بر نور طلبهسى، صاوجيلقده رسالۀِ نور و استادى حقّنده قهرمانجه جوابلر ويرديگى ايچون صاوجى قيزمش. «شيمدى سنى حپسه آتارم!» دييه تهديد ايتمش. او إسلام فدائيسى معلّم ده جوابًا «بن حاضرم، درحال حپسه گوندرڭ!» ديمشدر.
ينه آفيون محكمهسنده، بر نور طلبهسى حقّنده توقيف قرارى ويريلييور فقط عدليه بولاماز. او طلبه بوندن خبردار اولور. ديگر نور قارداشلرى گبى «استادم و قارداشلرم حپسده ايكن، ناصل خارجده قالابيليرم؟» دييهرك صاوجيلغه تسليم اولوب، حپسه گيرر.
عين بو حپسخانهده، بر نور طلبهسنى سهوًا تخليه ايدرلر. او ده «استادم و قارداشلرم هنوز حپسدهدرلر. هم إستنساخنى تماملايهجغم يڭى تأليف ايديلن نور رسالهلرى وار.» دييه دوشونهرك حپسخانه مديرينه «بنم قرق گون صوڭره تخليه ايديلمهم لازم. جزا مدّتم داها بيتمدى.» دير. حساب ايدرلر كه حقيقةً بويلهدر، تكرار حپسه قويارلر.
حميتِ دينيه مزيتنه لايق آڭلايشلى قارداشلرم!
سعيد النورسى، كندى حقّنده ويريلن بويله بر معلوماتى گورورسه دييهجكلردر كه: «نه ايچون بويله ياپييورلر؟ شخصمڭ أهمّيتى يوق. قيمت، قرآندن ترشّح ايدن و قرآنِ حكيمڭ مالى اولان رسالۀِ نوردهدر. بن بر هيچم.»
استادڭ شخصنڭ مظهر و آيينه اولديغى قرآنى حقيقتلر و نورلر إعتباريله و نشر ايتديگى ايمان و إسلاميت درسلريله، إخلاصِ تامّه ايله عمومى و كلّى بر طرزده قرآنه و دينه خدمت ايتمهسيله، اونڭ حقّندهكى تقدير و تحسينلر، معناىِ حرفى ايله شخصنه عائد قالمييور. قرآن و إسلاميته راجعدر. اللّٰه نام و حسابنهدر. دين دشمنلرى طرفندن، اوڭا ياپيلان دشمنلق و تعرّضلر ده بديع الزمانڭ خادملگنى ياپديغى قرآن و إسلاميتڭ اورتهدن قالديريلماسى مقصدِ مخصوصنه معطوفدر.
زيرا حقائقِ قرآنيه و ايمانيهيى جامع، او جهانشمول رسالۀِ نور أثرلرى اوڭا إحسان ايديلمشدر.
ايشته بو بديهى حقيقتى بيلن، ماسكهلى، گيزلى و منافق ايمان و إسلاميت معارضلرى و دشمنلرى، ياريم عصره ياقيندر، بديع الزمانڭ چوروتهمدكلرى شخصنى، يالان و يايغارهلرله حالا چوروتمهيه چابالايورلر. مقصدلرى؛ رسالۀِ نور، رغبت و رواج گوروب إنتشار ايتمهسين، ايمان و إسلاميت إنكشاف ايتمهسين. حالبوكه سعيد النورسىيه ايليشدكجه رسالۀِ نور پارلايور. نشريات دائرهسى گنيشلهيور. برر نمونه اولان يگرمى بش سنه ايچندهكى حادثهلر ميداندهدر.
إسلاميت دشمنلرى، بر طرفدن تماميله يالان پروپاغندهلرينه و تعرّضلرينه دوام ايدركن، ديگر طرفدن ده نور طلبهلرينڭ استادلرى و رسالۀِ نور حقّنده إستعدادلرى نسبتنده، إستفاده و إستفاضهلرندن طوغان منّت و شكرانلرينى إفاده ايدن تقديركار يازى و سوزلردن مركّب بر نوع مدافعهلرينى پردهلر آرقهسندن منع ايتمگه چاليشييورلر. بونڭ ايچون صافدل گوردكلرى دوستلرڭ دوستلرينه ويا دوستلره صميمى گورونهرك «إفراطه گيدييورسڭز.» گبى برطاقم شيلر سويلتديرييورلر. ايشته بويله سينسى، بويله دسّاس، بويله أنتريقهلى چشيدلى إفترالرله بزى قورقوتمغه، ييلديرمغه و صوصديرمغه چاليشييورلر.
أوت، عجبا هيچ عقل كارى ميدر كه دين دشمنلرى، إفترا و يالانلردن عبارت يايغارهلرينى ياپسينلر ده بزلر حقيقتى إظهار طرزيله مدافعه ايتمكده صوصالم؟ عجبا هيچ ممكن ميدر كه إسلاميت دشمنلغيله، استاد بديع الزمان حقّنده ظالمانه و جبّارانه حقسزلقلرى إرتكاب ايدن او إنصافسز پروپاغندهجيلر، يالانلرينى صاووروركن بز، استاد و رسالۀِ نورڭ حقّانيتنى إعلان ايدهرك، او عجيب يالانلرينى عقيم بيراقمغه چاليشميهلم؟ عجبا أبلهلك و صافدرونلق اولماز مى كه قرآن و ايمانڭ خونخار و مستبد ظالم دشمنلرى؛ قرآن و إسلاميتى و دينى رسالۀِ نورله كفرِ مطلقه قارشى مدافعه و محافظه خدمتنى ياپان بديع الزمان عليهدارلغنده، متماديًا اويدورمالرله سسلرينى يوكسلتسينلر ده بز حق و حقيقتى بيان و إعلان ايتمكده سكوت ايدهلم، صوصالم ويا «برآز صوصڭ!» گبى بر شيله، پاراوانهلر، پردهلر آرقهسنده إجراءِ فعاليت ياپان او گيزلى دينسزلره بر نوع يارديم ايتمش ويا دستكلهمش اولالم؟
أصلا و كلّا، قطعا و أصلا صوصميهجغز و هم صوصديرهميهجقلردر. طورميهجغز و هم طورطورهميهجقلردر. بو جان بو قفسدن چيقنجهيه قدر، بو روح بو جسددن آيريلنجهيه قدر، بو نَفَس، بو بدندن گيدنجهيه قدر؛ رسالۀِ نورى اوقويهجغز، نشر ايدهجگز. رسالۀِ نورڭ محضِ حقيقت و عينِ حق اولديغنى و بديع الزمان سعيد النورسىنڭ، ياپيلان إتهاملردن تماميله منزّه و مبرّا اولديغنى، إفتراجى و ترتيبجى، خونخار دين دشمنلرينه مقابل، إظهار و إعلان ايدهجگز.
قيمتلى قارداشلرم! إسلام تاريخنده، آلتون صحيفهلرده موقعلرى بولونان، بيوك و نظيرسز ذاتلر ميدانه گلمشدر. او مِثلسز ذاتلرڭ تفسيرلرى و أثرلرى، هيچ بر آوروپالى فيلسوفڭ أثريله قابلِ قياس اولميهجق درجهده أمثالسزدر. او بيوك إسلام مؤلّفلرى و إسلام داهيلرى، هر هانگى بر حكومتڭ، سنهلرجه آغير بر أسارت و قويو بر إستبدادى تحتنده اولمقسزين، قرآن و إسلاميته حقّيله و خالص بر صورتده خدمت ايتمشلردى. تاريخده أشنه راستلانميان بر إستبدادِ مطلق و أشدِّ ظلم آلتنده و دهشتلى بر أسارت ايچنده بيراقيلان و كندينى و أثرلرينى إمحا ايتمگه چاليشان دين دشمنلرينه مقابل، بر شخصِ معنوى اولان بديع الزمان سعيد النورسى، رسولِ أكرم عليه الصلاة والسلام أفنديمزڭ سنّتنه تام إتّباع ايدهرك ياپديغى دينى جهادِ أكبرنده، بشر تاريخنده مِثلى گورولمهمش بر طرزده موفّق و مظفّر اولمشدر.
بديع الزمان گبى يوز اوتوز پارچه ايمانى أثرلرينى شدّتلى بر إستبداد ، تضييقات و تقييدات آلتنده، گيزليدن گيزلىيه تأليف ايدهبيلمك هم قوّتلى بر تقوا و عبوديته صاحب اولمق و هم ده بونلرله برابر، حرب جبههسنده ده فدائى اولارق گوڭللى عسكرلريله محاربه ايتمش اولمق و حرب جبههسنده، آوجى خطّنده دخى فرصت بولدقجه قرآنڭ أڭ اينجه نكتهلرينى و خارقه إعجازينى بيان ايدن بر قرآن تفسيرى تأليف ايتمش اولمق و عين زمانده نفس مجادلهسنده ده غالب اولوب، نفسنى ده دينه خدمتكار ياپمق و حرّيتى غصب ايديلهرك، اوجرا بر كويه سورگون ايديلوب، تجريدِ مطلق و ترصّدلر و هر درلو عذابلر ايچنده آبلوقهيه آلينوب، أنگيزيسيون ظلملرينى چوق گريده بيراقان حاكم بر قوّتڭ تضييقاتى آلتنده، جانى جاناوارلرڭ پك وحشى إشكنجهلرى ايچنده سِرًّا تَنَوَّرَتْ سرّيله پرده آلتنده رسالۀِ نور أثرلرى گبى أثرلر نشر ايتمك و بويلهجه جهانڭ مادّى معنوى «فاتح»ى اولان رسولِ أكرم عليه الصلاة والسلامڭ سنّتِ سنيهسنڭ بر خدمتكارى اولارق، بوگون ميليونلره بالغ اولان بر جامعهيى، عنايتِ إلٰهى ايله قرآنِ حكيمڭ جادّۀِ كبراسنده سلامتله ايلرلتمك و مؤمنلرڭ و بشريتڭ سادهجه دنيالرينى دگل، أبدى سعادتلرينى تأمينه رسالۀِ نور گبى بر أثرله وسيله اولمق؛ بو مذكور خصوصيتلرڭ معنوى شخصنده طوپلانماسى، رسالۀِ نور مؤلّفى بديع الزمان سعيد النورسى گبى تاريخده هانگى بر ذاته داها نصيب اولمشدر عجبا؟
أوت قارداشلرم! رسالۀِ نور، اويله بر ضياءِ حقيقت، اويله بر برهانِ حق و بر سراجِ حقيقت نشر ايدييور و ايكى جهانڭ سعادتنى تأمين ايدهجك، قرآن و ايمان حقيقتلرينى درس ويرييور و اويله بر لطفِ إلٰهيدر كه يگرمى بش سنهدن بَرى، چولوق چوجق، گنج إختيار، قادين أركك، معلّمى، فيلسوفى، طلبهسى، عالمى، متصوّفى گبى هر بر طبقۀِ إنسانيه، بو نورڭ عاشغى، بو نورڭ پروانهسى، بو نورڭ مجلوبى، بو نورڭ محبّى اولمشلر؛ بو نوره قوشمشلر، بو نورڭ سينهسنه آتيلمشلر، بو نوردن مدد ايستهمشلر. ميليونلرجه بختيار كيمسهلردن متشكّل معظّم بر كتله، بو نورله نورلانوب بو نورله قورتولمشلردر.
أوت قارداشلرم! مخزنِ معجزات و معجزۀِ كبرا اولان قرآنِ عظيم الشانڭ حقيقى بر تفسيرى اولان رسالۀِ نور، او قدر مراقآور، او قدر جاذبهدار، او قدر دهشتلى و معظّم حقيقتلرى درس ويرييور و مسائلى إثبات ايدييور كه ايمان و إسلاميتڭ قِطعهلر گنيشلگنده إنكشاف و فتوحاتنه مدار اولويور و اولاجقدر.
أوت رسالۀِ نور قلبلره او درجه بر عشق و محبّت، روحلره او قدر بر وجد و هيجان ويرمش، عقل و منطقلرى اويله بر طرزده إقناع ايتمش و اويله بر إطمئنانِ قلب حاصل ايتمشدر كه ميليونلرجه نور طلبهلرينه، كندينى دفعهلرجه اوقوتمش، يازديرمش و بر عمر بوينجه مطالعه ايتديرمش و سنهلردن بَرى عادتا كندى كندينى نشر ايتمشدر.
عزيز قارداشلرم! أجنبى پارمغيله إداره ايديلن زندقه قوميتهلرى، إسلاميتى إمحا ايچون إسلام مملكتلرنده، بِالخاصّه توركيهده، اويله دسيسهلرله أنتريقهلر چويرمشلر، خائنجه دولابلر دوندورمشلر، خونخارانه و وحشيانه ظلملر إرتكاب و شيطانى و منفور پلانلر تطبيق ايتمشلر و إغفالاتده بولونمشلر؛ إبليسانه، سينسى متودلر تعقيب ايتمشلر و قارداشى قارداشله چارپيشديرمشلر و اويله آلداتيجى يالان و پروپاغندهلر و يايغارهلر ياپمشلر، فتنه و فساد و تفرقه تخملرى صاچمشلردر كه بونلر إسلامڭ بُنْيهسنده درين رخنهلر آچمش و بيوك تخريباتلر ياپمشدر.
فقط او مصيبتلر، جنابِ حقّڭ إمدادى ايله تحريك و إستخدام اولونان بديع الزمان سعيد النورسى گبى إخلاصِ تامّى قزانمش اولان بر ذات واسطهسيله، رحمتِ إلٰهى ايله مددرس و شفارسان و جهانپسند و جهانشمول بر ماهيتى حائز رسالۀِ نور أثرلرينڭ ميدانه گلمهسنه سبب اولمشدر. و عين زمانده، مسلمانلرى اويانديرمش؛ اونلرى خلاص، قورتولوش چارهلرينى آرامغه سَوق ايتمشدر. أبدى آخرت حياتلرينى قورتارمق ايچون حقيقى ايمان درسلرينى آلمق و اللّٰهه إلتجا و أمرلرينه إطاعت ايتمك إحتياجنى شدّتله حسّ ايتديرمش و بو خصوصدهكى غفلت و قصوراتى؛ او مصيبتلرڭ إخطار ايتديگنى، إدراك ايتديرمشدر. ذاتًا إنسانلرڭ، مؤمنلرڭ باشنه گلن بلا و مصيبتلرڭ حكمتى بودر.
أوت او أجنبيلرڭ، جاناوارلر گبى ياپدقلرى معامله و ظلملر، إسلام دنياسنده، حرّيت و إستقلال و إتّحادِ إسلام جرياننى ده خيزلانديرمشدر. نهايت، مستقل إسلام دولتلرينڭ تشكيلنى إنتاج ايتمشدر. إن شاء اللّٰهُ تعالى، جماهيرِ متّفقۀِ إسلاميه ده ميدانه گلهجك و إسلاميت، دنيايه حاكم و حكمران اولاجقدر. رحمتِ إلٰهيدن قوّتله اميد و نياز ايدييورز.
ايشته رسالۀِ نور مؤلّفى بديع الزمان سعيد النورسى، اويله بر مجاهدِ إسلامدر كه و تأليفاتى رسالۀِ نور، اويله اويانديريجى و اويله خلاصكار و اويله فوق العاده و جهانگير بر أثردر كه دين عليهندهكى بتون او قوميتهلرڭ بللرينى قيرمش، مذكور مضر و خبيث فعاليتلرينى عقامته دوچار و دينسزلك أساسلرينڭ تمل طاشلرينى پارهم پارچه ايتمش و كوكيله كسمشدر و إسلامى و ايمانى فتوحاتى، پرده آلتنده، قلبدن قلبه إنكشاف ايتديرمش و قرآنِ عظيم الشانڭ حاكميتِ مطلقهسنه زمين إحضار ايتمشدر.
أوت رسالۀِ نور، او تخريباتى قرآنڭ ألماس حقيقتلريله و قرآنِ كريمدهكى أڭ قيصه و أڭ مستقيم بر طريقله تعمير و او يارهلرى، قرآنِ حكيمڭ أجزاخانۀِ كبراسندهكى أدويهلرله تداوى ايدييور و ايدهجكدر. هم معصوم مسلمانلرڭ قانلرينى سومورن و ثروتلرى تحجّر ايتمش ملّت قانى اولان، پارازيت، طُفيلى و آج گوزلى جاناوار و باربار أمپرياليستلرى، مستملكهجيلرى و اونلرڭ ايچمزدهكى، سادهجه شخصى منفعت زبونى، ظالم، خونخار، حريص و مستبد اوشاقلرينى، خاك ايله يكسان ايدوب اضمحلال و إنهدامِ مطلقله مغلوب ايدن و ايدهجك يگانه چارهنڭ قرآنِ معجز البيانڭ بو عصرده بر معجزۀِ معنويسى اولان رسالۀِ نور أثرلرى اولديغنده، بصيرتلى إسلام مجاهدلرى و عالملرى، إجراآت و مشاهداته مستند، يقينى بر قناعتِ قطعىيه ايله متّفقدرلر.
أوت تاريخِ بشر، رسالۀِ نور گبى بر أثر گوسترمييور. ديمك، آڭلاشيلييور كه رسالۀِ نور، قرآنڭ أمثالسز بر تفسيريدر.
أوت بديع الزمان سعيد النورسىيه، يالڭز عالمِ إسلام دگل، خرستيان دنياسى ده مديون و منّتداردر كه دينسزلگه قارشى عمومى جهادنده مظهر اولديغى موفّقيت و غالبيتدن طولايى رومادهكى پاپا دخى كنديسنه رسمًا تبريك و تشكّرنامه يازمشدر.
شيمدى رسالۀِ نور كلّياتندن ايمان، قرآن و حضرتِ پيغمبر عليه الصلاة والسلام أفنديمز حقّنده اولان أثرلردن بعض قسملرى عينًا اوقويهجغم. سز بو أثرلرى ألده ايدوب تمامنى اوقورسڭز. اوقوركن بلكه ايضاح ايديلمهسنى ايستهين قارداشلريمز اولاجقدر. فقط بو خصوصده أرض ايدهيم كه: استاديمز بديع الزمان، بر نور طلبهسنه رسالۀِ نوردن بعضًا اوقويوويرمك نعمتنى بخش ايدركن ايضاح ايتمييور، دييور كه: «رسالۀِ نور، ايمانى مسئلهلرى لزومى درجهسنده ايضاح ايتمش. رسالۀِ نورڭ خواجهسى، رسالۀِ نوردر. رسالۀِ نور، باشقهلرندن درس آلمغه إحتياج بيراقمييور. هركس إستعدادى نسبتنده كندى كندينه إستفاده ايدر. عقلڭز هر بر مسئلهيى تام آڭلاماسه ده روح، قلب و وجدانڭز حصّهسنى آلير. نه قدر إستفاده ايتسهڭز بيوك بر قزانجدر.»
اوقونان توركجه ويا عربجه بر رسالهنڭ ايضاحى، باشقه بر رسالهده وارسه اونى گتيرتوب اوقويور. رسالۀِ نوردهكى غايت اينجه نكتهلرى درك ايدن بصيرتلى عالملر ده دير كه: بر عالمڭ يوكسك بر علمى اولابيلير فقط رسالۀِ نورى جماعته اوقوركن تفصيلاته گيريشوب أسكى معلوماتلريله آچيقلارسه بو ايضاحاتى، رسالۀِ نورڭ بيان ايتديگى، عصريمزڭ فهمنه اويغون و إحتياجنه تام جواب ويرن حقيقتلرڭ آڭلاشيلماسنده و تأثيراتنده و رسالۀِ نورڭ ماهيتنڭ دركنده بر پرده اولابيلير. بونڭ ايچون بعض لغتلرڭ معنالرينى سويلهيهرك عينًا اوقومق داها مؤثّر و داها أفضلدر.
إستانبول اونورسيتهسندهكى قارداشلريمز ده بويله اوقويورلر. بز ده خلاصةً ديرز كه: رسالۀِ نور، غايت فصيح و وجيزدر. سوزڭ قيمتى؛ ايجازندهدر، قيصهلغندهدر. بر مسئلۀِ ايمانيه و قرآنيه عمومه درس ويريليركن مجمل اولارق تدريسنده، داها فضله إستفاضه و إستفاده واردر.
أى استاديمز أفنديمز! عموم قدرشناس إنسانلر رسالۀِ نورى و سزى أبديًا تبجيل و تكريم ايدهجكلردر. تحقيقى ايمان درسلريله ايمانمزى قورتاران جهانبها و جهاندگر بر قيمتده اولان رسالۀِ نورى بتون روحِ جانمزله، بتون موجوديتمزله سَوييور و تكريم ايدييورز. بو عشق و بو محبّت، بو تعظيم و بو حرمت؛ نسلدن نسله، عصردن عصره، دوردن دوره إنتقال ايدهجكدر.
أوت، رسالۀِ نوردهكى حقائقِ قرآنيه اويله بر قوّتدر كه بو قدرت قارشيسنده، كفرِ مطلقڭ و دينسزلگڭ تمللرى تارمار اولاجق؛ إنهدام چوقورلرينه يووارلانارق گبرهجكدر. باقى قالانلر، ايمان و قرآن نوريله فلاح و نجات بولاجقلردر.
أوت طاغلرى، طاشلرى، پاموق گبى طاغيدهجق؛ دمير و غرانتلرى ياغ گبى أريتهجك درجهده اولان بو قوّتِ قرآنيه دنيايى نور و سعادته غرق ايدهجك. بو قرآن، ايمانلرڭ قورتولوشنده، دنيايه حاكم و حكمران اولاجقدر.
﴿وَاٰخِرُ دَعْوٰيهُمْ اَنِ الْحَمْدُ لِلّٰهِ رَبِّ الْعَالَمٖينَ﴾
* * *