مقدّمۀِ حشريهنڭ مقاماتنى ايستهيورسڭز. شيمديكى وضعيتم هيچ بر وجهله مساعده ايتمديگى گبى، حشره دائر يازيلان حقيقتلر، برهانلر عمومه نسبةً إحتياجه تام كافى اولديغندن، چابوق يازماسنه معنًا إجبار ايديلمييورم. بر پارچه تأخير ايديلدى و تعجيل ايديلمدى. هم بن، بوراده قيدلر آلتندهيم.
﴿اَلصَّبْرُ مِفْتَاحُ الْفَرَجِ وَ السُّرُورِ﴾
* * *
﴿بِاسْمِهٖ سُبْحَانَهُ وَاِنْ مِنْ شَىْءٍ اِلَّا يُسَبِّحُ بِحَمْدِهٖ﴾
﴿اَلسَّلَامُ عَلَيْكُمْ وَرَحْمَةُ اللّٰهِ وَبَرَكَاتُهُ﴾
عزيز، ثباتكار، فداكار، صدّيق قارداشلرم!
أوّلا: گلهجك بايرامڭزى تبريك ايدرم. (وَالْفَجْرِ ۞ وَلَيَالٍ عَشْرٍ) قَسَمِ قرآنى ايله فوق العاده قيمتلرى تحقّق ايدن او مبارك گيجهلرده و سحرلرده مبارك قارداشلريمڭ مبارك دعالرى هم بڭا، هم أهلِ ايمانه چوق بركتلى و نورلى اولماسنى رحمتِ رحماندن نياز ايدرم.
ثانيًا: سزه بر كوچك سهوڭ بيوك بر نكتۀِ غيبيهسيله، قارشى صحيفهدهكى حاشيهيى، موقعلرنده يازمق ايچون گوندردم.
ثالثًا: خلوصينڭ بر غائلهسى وار دييه حسّ ايدييورم. مراق ايتمهسين. رسالۀِ النورڭ شاكردلرينه عنايت و رحمت، نظارت و حمايت ايدرلر. دنيانڭ مشقّتلرى مادام ثواب ويرر، گچرلر؛ او مصيبتلره قارشى صبر ايچنده شكر ايله، متانتله مقابله ايديلمك گركدر. هم او، هم سزلر بتون دعالرمده و قزانجلرمده بنمله برابرسڭز.