قهرمان نظيف يازييور كه؛ او إعتراض، رسالۀِ النورڭ إستانبولده فتوحات ياپمغه و پارلامغه وسيله اولدى. و بزه قارشى باشقه جهتلرده كوچوجك تجاوزلر ده اويله نتيجه ويرييور. فقط شيمدى بيچاره بعض خواجهلرى و صوفيلرى رسالۀِ النوره قارشى بر چكينمك، بر صوغوقلق ويرمك ايچون هيچ خاطره گلمهين بر وسيلهيى بولمشلر. شويله كه:
دييورلر: «سعيد، ياننده باشقه كتابلرى بولونديرمييور. ديمك اونلرى بگنمهيور. و إمامِ غزالىيى ده (رض) تام بگنمهيور كه، أثرلرينى ياننه گتيرمييور.» ايشته بو عجيب معناسز سوزلرله بر بولانتى ويرييورلر. بو نوع حيلهلرى ياپان، پرده آلتنده أهلِ زندقهدر؛ فقط، صافدل خواجهلرى و بعض صوفيلرى واسطه ياپييورلر.
بوڭا قارشى ديرز كه: حاشا، يوز دفعه حاشا!.. رسالۀِ النور و شاكردلرينڭ بر استادى اولان حجّة الإسلام إمامِ غزالى و بنى حضرتِ على ايله باغلايان يگانه استاديمى بگنمهمك دگل، بلكه بتون قوّتلريله اونلرڭ تعقيب ايتديگى مسلگى أهلِ ضلالتڭ هجومندن قورتارمق و محافظه ايتمكدر.
فقط اونلرڭ زماننده بو دهشتلى زندقه هجومى، أركانِ ايمانيهيى صارصمايوردى. او محقّق و علاّمه و مجتهد ذاتلرڭ عصرلرينه گوره مناظرۀِ علميهده و دينيهده إستعمال ايتدكلرى سلاحلر هم گچ ألده ايديلير، هم بو زمان دشمنلرينه بردن غلبه ايدهمديگندن؛ رسالۀِ النور، قرآنِ معجز البياندن هم چابوق، هم كسكين، هم تام دشمنلرڭ باشنى طاغيدهجق سلاحلرى بولديغى ايچون، او مبارك و قدسى ذاتلرڭ تزگاهلرينه مراجعت ايتمييور. چونكه عموم اونلرڭ مرجعلرى و منبعلرى و استادلرى اولان قرآن، رسالۀِ النوره تام مكمّل بر استاد اولمشدر. و هم وقت طار، هم بزلر آز اولديغمز ايچون وقت بولامييورز كه، او نورانى أثرلردن ده إستفاده ايتسهك.