حاشيهسنده بشنجى سطرنده: «علما ايسه، مصرفلرندن ماللرينڭ قيمتنى بيلمدكلرى» جملهسى ياڭليشدر. صحيحى ايسه، «علما ايسه، معرفتلرندن ماللرينڭ قيمتنى بيلدكلرى ايچون.» هم بو سطرڭ آرقهسندهكى، (آرقهسنده) كلمهسى ياڭليش، صحيحى (آراسنده)در.
* * *
عزيز، صدّيق، مبارك، فداكار قارداشلرم!
دون آلتى أهمّيتلى مكتوبلريڭزى آلدم. هر مكتوبڭزه اوزون بر مكتوب يازمق جدًّا آرزو ايدردم، هم ده حقّڭزدر. فقط بو حروفاتى يازان فيضى شاهددر كه؛ آلتى گيجهدر، آلتى ساعت ياتامادم. يالڭز بو آلتنجى گيجه، بر بچق ساعت قدر ياتابيلدم. اونڭ ايچون، بو أهمّيتلى مكتوبلره قيصهجق برر جمله ايله إكتفا ايدييورم.
أوّلا: رسالۀِ النور سانترالى و خلوصى، حقّى، سليمانى تمثيل ايدن صبرى قارداشم! عُشر، شرعى زكاتدر. زكات ايسه، مستحقلرهدر.
ثانيًا: گل فابريقهسى گلستانلرينى و مرحوم بدوى بلبللرينى قونوشديران خسرو قارداش! رسالۀِ النور، إسپارطهيى آفاتِ سماويه و أرضيهدن محافظهسنه سبب اولديغنى چوق حادثاتله برابر، بو يڭى زلزله حادثهسى و معارض خواجهنڭ طولولرله باشنڭ طوقاتلانماسى، يڭى بر حجّتى اولويور. و معجزاتِ قرآنيه لاحقهسنى سزڭ إصابتلى فكريڭزه حواله ايدييورز. هم سز يازديغڭز مقدارى گوندريڭز. بز بوراده تكميل ايدر، سزه ده صوڭره خبر ويررز.