إزاله ايتدى. ما شاء اللّٰه كاتب عثمان ده، خسرو گبى موجبِ مراق نقطهلرى يازييور. اونڭ مكتوبنى گتيرن خاليجى إبراهيم ديمش كه: «صدّيق سليمان رشدى بورايه گلمك إحتمالى وار.» او قهرمان قارداشم يقينًا بيلسين كه بن، اوندن زياده اوڭا مشتاقم. فقط او هر گون، خاص دائرهسنڭ برنجى صفنده معنًا يانمزده بولونويور، معنوى قزانجلريمزه ده حصّهدار اولويور. بزم مسلگمزده صحبتِ صوريه أهمّيتى آزدر. هم بو دهشتلى عملياتِ داخليه هنگامنده و يول مصرفى چوق زياده اولديغندن، گلمك مناسب اولمايور. و وهّام أهلِ دنيا، بوراده زياده بزه دقّت ايدييورلر. حتّى بو بايرامده قپومى زيارتجيلره قپادق.
حافظ علينڭ مكتوبنده رشدينڭ بر تشبّثى وار كه؛ گنجلره عائد درت بش پارچه درس كه، حافظ مصطفىيه ويرمشدم كه طبع ايتسين. جنابِ حقّه شكر، سزڭ كثرتلى قلملريڭز مطبعهيه إحتياج بيراقمهيور. أگر قولايجه، اوجوزجه ممكن اولسه، أسكى ويا يڭى حروفله ياپارسڭز.
حافظ علينڭ مكتوبنده، رسالۀِ النوره قارشى كمالِ محويتله كمالِ إخلاصى و إرتباطى، اونڭ أسكيدن بَرى تقدير ايتديگم بر خاصيتِ ممتازيهسنى گوسترمكله برابر، بنم گبى بر بيچارهيى ده شفاعتجى ياپوب، بن ده اونڭ كمالِ صميميتنى شفاعتجى ياپوب، دعاسنه آمين ديرم.
مبارك كويندن، مباركلر جماعتندن، مبارك إبراهيمڭ بركتلى مكتوبنى اوقودم. بنى ممنون ايدن چوق سوزلر وار ايچنده. و بِالخاصّه بنم باشمه ياغان ياغموردن رؤياده ايچمهسى و برادرزادهسى عثمانڭ ايلريده رسالۀِ النوره طلبه اولماسى ايچون كندينى اوقوتماسى بزى مسرور أيلدى. جنابِ حق اويله مباركلرى او كويده چوغالتسين. آمين.
* * *