معدهلريله مشغول ايدهجكدى وياخود او خدمتڭ إخلاصنى بر درجه قيروب، معيشت دردينڭ بر حصّهسى اونده بولونهجقدى.
ثانيًا: يازيلماسنه شيمديلك لزوم يوق.
ثالثًا: إظهارينه بو زمانده إذن يوق... فقط مادام شاكردلرڭ غيرت و شوق و همّتلرى شيمدىيه قدر مطبعهلره إحتياج بيراقمامشلر. إن شاء اللّٰه او قدسى خدمته دوام ايدوب، او ألماس قلملر ايله نشرِ أنوار ايدهجكلر. مادام بتون بتون مسلگمزه مخالف اولان يڭى حروفى، بر ايكى رساله ايچون قبول ايتديگمز حالده مطبعهجيلر چكينديلر، او خيرِ عظيمى غيب ايتديلر. سز او ايكى رسالهيى بزم حسابمزه، قهرمان قارداشلريمزدن يگرمى اوتوز ذاته توزيع ايدهرك، يگرمى اوتوز نسخهيى أسكى حروفله يازديريڭز. يازان قلم صاحبلرينه دائمى حسنات قزانديران او پك بيوك خيرى، سز قزانڭز. أگر يڭى حروفله، أل ماكينهسيله او ايكى رسالهدن يازيلمش نسخهلر وارسه، بزه بعض نسخهلر گوندريڭز.
* * *
(إشاراتِ قرآنيه و اوچ كرامتِ عَلويه و كرامتِ غوثيه حقّندهكى سكّۀِ غيبيه رسالهسنه بر تنبيه و إخطاردر)
بو غايت محرم رسالهلر، ناصلسه معنّد بر نامحرمڭ ألنه بو رسالهلردن بريسى گچمش. غايت سطحى و عناد نظريله بر ايكى يرينه حقسز بر إعتراض ايله أهمّيتلى بر حادثهيه سببيت ويرديگندن؛ بو مجموعه، رسالۀِ النورڭ خاص طلبهلرينه بلكه أخصِّ خواصّه مخصوص اولديغى حالده و بنم وفاتمدن صوڭره إنتشارينه مساعده اولماسيله برابر؛ شيمدى مذكور حادثهنڭ سببيله هركسه دگل،