شفقت يوزندن، أساساتِ إسلاميهنڭ خارجندهكى بدعت و ضلالت يوللرينه صاپانلرى چويرن بر حقيقتدر
شفقتِ إنسانيه، مرحمتِ ربّانيهنڭ بر جلوهسى اولديغندن؛ ألبته رحمتڭ درجهسندن آشمامق و رحمةً لِلعالمين ذاتڭ (عصم) مرتبۀِ شفقتندن طاشمامق گركدر. أگر آشسه و طاشسه او شفقت، ألبته مرحمت و شفقت دگلدر؛ بلكه ضلالته و إلحاده سرايت ايدن بر مرضِ روحى و بر سقمِ قلبيدر.
مثلا: كافر و منافقلرڭ جهنّمده يانمالرينى و عذاب و جهاد گبى حادثهلرى كندى شفقتنه صيغيشديرمامق و تأويله صاپمق؛ قرآنڭ و أديانِ سماويهنڭ بر قسمِ عظيمنى إنكار و تكذيب اولديغى گبى، بر ظلمِ عظيم و غايت درجهده بر مرحمتسزلكدر. چونكه معصوم حيوانلرى پارچهلايان جاناوارلره حمايتكارانه شفقت ايتمك، او بيچاره حيوانلره شديد بر غدر و وحشى بر وجدانسزلقدر. و بيڭلر مسلمانلرڭ حياتِ أبديهلرينى محو ايدن و يوزر أهلِ ايمانڭ سوءِ عاقبتنه و مدهش گناهلره سَوق ايدن آدملره شفقتكارانه طرفدار اولمق و مرحمتكارانه جزادن قورتولمالرينه دعا ايتمك، ألبته او مظلوم أهلِ ايمانه دهشتلى بر مرحمتسزلك و شنيع بر غدردر.
رسالۀِ النورده قطعيتله إثبات ايديلمش كه؛ كفر و ضلالت، كائناته بيوك بر تحقير و موجوداته بر ظلمِ عظيمدر و رحمتڭ رفعنه و آفاتڭ نزولنه وسيلهدر. حتّى دڭز ديبنده باليقلر، جانيلردن شكوا ايدرلر كه؛ «إستراحتمزڭ سلبنه سبب اولديلر» دييه روايتِ صحيحه واردر. او حالده كافرڭ عذاب چكمهسنه آجييوب شفقت ايدن آدم، شفقته لايق حدسز معصوملره آجيمايور و شفقت ايتمهيوب و حدسز مرحمتسزلك ايدييور ديمكدر. يالڭز بو وار كه، مستحقلره آفات گلديگى زمان معصوملر ده يانارلر، اونلره آجيمامق اولمايور. فقط جانيلرڭ جزالرندن ضرر گورن مظلوملرڭ حقّنده گيزلى بر مرحمت وار.